Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
V. MahāVagga
55. Sotapatti Saŋyuttaa
VI: Sappañña Vaggo

Sutta 52

Vassavuttha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts]Evam me sutaɱ:|| ||

Ekaɱ samayam Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tena kho pana samayena aññataro bhikkhu||
Sāvatthiyaɱ vassaŋ vuttho||
Kapilavatthuɱ anuppatto hoti||
kenacid'eva karaṇīyena.|| ||

Assosuɱ kho Kāpilavatthavā Sakkā||
"Aññataro kira bhikkhu Sāvatthiyaɱ vassaŋ vuttho||
Kapilavatthuɱ anuppatto" ti.|| ||

Atha kho Kāpilavatthavā Sakkā yena so bhikkhu ten'upasaŋkamiɱsu.|| ||

Upasaŋkamitvā taɱ bhikkhuɱ abhivādetvā eka-m-antaɱ nisīdiɱsu.|| ||

Eka-m-antaɱ nisinnā kho Kāpilavatthavā Sakkā taɱ bhikkhuɱ etad avocuɱ:|| ||

"Kacci bhante, Bhagavā||
arogo c'eva balavā cā" ti?|| ||

"Bhagavā āvuso arogā ca balavanto cā ti?|| ||

"Sāriputta-Moggallānā pi kho āvuso,||
arogā ca balavanto cā" ti.|| ||

"Kacci pana bhante, bhikkhusaŋgho||
arogo ca balavā cā" ti?|| ||

"Bhikkhusaŋgho pi kho āvuso||
arogo ca balavā cā" ti.|| ||

"Atthi pana bhante,||
kiñci iminā antaravassena Bhagavato sammukhā sutaɱ sammukhā paṭiggahitan" ti?|| ||

"Sammukhā me taɱ āvuso, Bhagavato sutaɱ||
sammukhā paṭiggahitaɱ:|| ||

'Appakā te bhikkhave,||
bhikkhū ye āsavānaɱ khayā||
anāsavaɱ ceto vimuttiɱ||
paññā-vimuttiɱ||
diṭṭhe va dhamme||
sayaɱ abhiññā sacchikatvā||
upasampajja viharanti.|| ||

Atha kho eteva bahutarā bhikkhū||
ye pañcannaɱ orambhāgiyānaɱ saŋyojanānaɱ parikkhayā||
opapātikā tattha parinibbāyino||
anāvattidhammā asmā lokā' ti.|| ||

Aparam pi kho me āvuso Bhagavato||
sammukhā sutaɱ||
sammukhā paṭiggahitaɱ:|| ||

'Appakā te bhikkhave, bhikkhū||
ye pañcannaɱ orambhāgiyānaɱ saŋyojanānaɱ parikkhayā||
opapātikā tattha paranibbāyino anāvattidhammā asmā lokā.|| ||

Atha kho ete bahutarā bhikkhū ye tiṇṇaɱ saŋyojanānaɱ parikkhayā||
rāga-dosa-mohānaɱ tanuttā||
sakadāgāmino sakid eva||
imaɱ lokaɱ āgantvā dukkhassantaɱ karissantī' ti.|| ||

Aparam pi kho me āvuso Bhagavato||
sammukhā sutaɱ||
sammukhā paṭiggahitaɱ:|| ||

'Appakā te bhikkhave, bhikkhū ye tiṇṇaɱ saŋyojanānaɱ parikkhayā||
rāga-dosa-mohānaɱ tanuttā||
sakadāgāmino sakid eva||
imaɱ lokaɱ āgantvā dukkhassantaɱ karissanti,||
atha kho ete va bahutarā bhikkhū ye tiṇṇaɱ saŋyojanānaɱ parikkhayā||
sotāpannā||
avinipātadhammā||
niyatā||
sambodhiparāyanā'" ti.|| ||

 


Contact:
E-mail
Copyright Statement   Webmaster's Page