Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
56. Sacca Saŋyutta
I. Samādhi Vaggo

Sutta 9

Viggāhika-Kathā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati||
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Mā bhikkhave, viggāhika-kathaɱ katheyyātha:|| ||

'Na tvaɱ imaɱ dhamma-vinayaɱ ājānāsi,||
ahaɱ imaɱ dhamma-vinayaɱ ājānāmi.|| ||

Kiɱ tvaɱ imaɱ dhamma-vinayaɱ ājānissasi?|| ||

Micchā-paṭipanno tvam asi.|| ||

Aham asmi sammā-paṭipanno.|| ||

Pure vacanīyaɱ pacchā avaca,||
pacchā vacanīyaɱ pure avaca.|| ||

Sahitaɱ me,||
asahitaɱ te.|| ||

Āciṇṇaɱ te viparāvattaɱ.|| ||

Āropito te vādo.|| ||

Cara vādappamokkhāya,||
niggahito si,||
nibbaṭhehi sace pahosī' ti.|| ||

Taɱ kissa hetu?|| ||

N'esā bhikkhave, kathā atthasaŋhitā,||
nādibrahmacariyakā,||
na nibbidāya||
na virāgāya||
na nirodhāya||
na upamāya||
na abhiññāya||
na sambodhāya||
na nibbānāya saŋvattati.|| ||

 


 

Kathentā ca kho tumhe bhikkhave:||
'idaɱ dukkhan' ti cinteyyātha,||
'ayaɱ dukkha-samudayo' ti cinteyyātha,||
'ayaɱ dukkha-nirodho' ti cinteyyātha,||
'ayaɱ dukkha-nirodha-gāminī paṭipadā' ti cinteyyātha.|| ||

Taɱ kissa hetu?|| ||

Esā bhikkhave, cintā atthasaŋhitā,||
esā ādibrahmacariyakā,||
esā nibbidāya||
virāgāya||
nirodhāya||
upasamāya||
abhiññāya||
sambodhāya||
nibbānāya saŋvattati.|| ||

Tasmā ti ha bhikkhave,||
'idaɱ dukkhan' ti yogo karaṇīyo,||
'ayaɱ dukkha-samudayo' ti yogo karaṇīyo,||
'ayaɱ dukkha-nirodho' ti yogo karaṇīyo,||
'ayaɱ dukkha-nirodha-gāminī paṭipadā' ti yogo karaṇīyo" ti.|| ||

 


Contact:
E-mail
Copyright Statement   Webmaster's Page