Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya,
V: Mahā-Vagga
56. Sacca Saɱyutta
II Dhamma-Cakka-Pavattana Vagga

Sutta 12

Dutiya Tathāgatena Vutta Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh][olds] Evam me sutaɱ:|| ||

Idaɱ dukkhaɱ ariya-saccanti bhikkhave, Tathāgatānaɱ pubbe ananussutesu dhammesu cakkhuɱ udapādi, ñāṇaɱ udapādi, paññā udapādi, vijjā udapādi, āloko udapādi. Taɱ kho pana idaɱ dukkhaɱ ariya-saccaɱ pariññeyyanti bhikkhave, Tathāgatānaɱ pubbe ananussutesu dhammesu cakkhuɱ udapādi, ñāṇaɱ udapādi, paññā udapādi, vijjā udapādi, āloko udapādi. Taɱ kho pana idaɱ dukkhaɱ ariya-saccaɱ pariññātanti bhikkhave, Tathāgatānaɱ pubbe ananussutesu dhammesu cakkhuɱ udapādi, ñāṇaɱ udapādi, paññā udapādi, vijjā udapādi, āloko udapādi.|| ||

Idaɱ dukkha-samudayo ariya-saccanti bhikkhave, Tathāgatānaɱ pubbe ananussutesu dhammesu cakkhuɱ udapādi, ñāṇaɱ udapādi, paññā udapādi, vijjā udapādi, āloko udapādi. Taɱ kho pana idaɱ dukkha-samudayo ariya-saccaɱ pahātabbanti bhikkhave, Tathāgatānaɱ pubbe ananussutesu dhammesu cakkhuɱ udapādi, ñāṇaɱ udapādi, paññā udapādi, vijjā udapādi, āloko udapādi. Taɱ kho pana idaɱ dukkha-samudayo ariya-saccaɱ pahīnanti bhikkhave, Tathāgatānaɱ pubbe ananussutesu dhammesu cakkhuɱ udapādi, ñāṇaɱ udapādi, paññā udapādi, vijjā udapādi, āloko udapādi.|| ||

Idaɱ dukkha-nirodho ariya-saccanti bhikkhave, Tathāgatānaɱ pubbe ananussutesu dhammesu cakkhuɱ udapādi, ñāṇaɱ udapādi, paññā udapādi, vijjā udapādi, āloko udapādi. Taɱ kho pana idaɱ dukkha-nirodho ariya-saccaɱ sacchi-kātabbanti bhikkhave, Tathāgatānaɱ pubbe ananussutesu dhammesu cakkhuɱ udapādi, ñāṇaɱ udapādi, paññā udapādi, vijjā udapādi, āloko udapādi. Taɱ kho pana idaɱ dukkha-nirodho ariya-saccaɱ [425] sacchi-katanti bhikkhave, Tathāgatānaɱ pubbe ananussutesu dhammesu cakkhuɱ udapādi, ñāṇaɱ udapādi, paññā udapādi, vijjā udapādi, āloko udapādi.|| ||

Idaɱ dukkha-nirodha-gāminī paṭipadā ariya-saccanti bhikkhave, Tathāgatānaɱ pubbe ananussutesu dhammesu cakkhuɱ udapādi, ñāṇaɱ udapādi, paññā udapādi, vijjā udapādi, āloko udapādi. Taɱ kho pana idaɱ dukkha-nirodha-gāminī ariya-saccaɱ bhāvetabbanti bhikkhave, Tathāgatānaɱ pubbe ananussutesu dhammesu cakkhuɱ udapādi, ñāṇaɱ udapādi, paññā udapādi, vijjā udapādi, āloko udapādi. Taɱ kho pana idaɱ dukkha-nirodha-gāminī paṭipadā ariya-saccaɱ bhāvitanti bhikkhave, Tathāgatānaɱ pubbe ananussutesu dhammesu cakkhuɱ udapādi, ñāṇaɱ udapādi, paññā udapādi, vijjā udapādi, āloko udapādi.|| ||

 


Contact:
E-mail
Copyright Statement