Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
56. Sacca Saŋyutta
III. Koṭigāma Vagga

Sutta 30

Gavampati Suttaɱ

Adapted from the 2008 Pali Text Society Saŋyutta-Nikaya, edited by M. Leon Feer

 


 

[1][pts][bodh] Evam me sutaɱ:|| ||

Ekaɱ samayaɱ sambahulā therā bhikkhū Cetīsu viharanti||
Sahajātiyaɱ.|| ||

Tena kho pana samayena sambahulānaɱ therānaɱ bhikkhūnaɱ pacchābhattaɱ piṇḍapātapaṭikkantānaɱ maṇḍalamāle sannisinnānaɱ sannipatitānaɱ ayamantarā kathā udapādi:|| ||

"Yo nu kho āvuso dukkhaɱ passati dukkhasamudayam pi so passati dukkhanirodhampi passati dukkhanirodhagāminiɱ paṭipadampi passatī" ti.|| ||

Evaɱ vutte āyasmā gavampati thero bhikkhū etad avoca:|| ||

"Sammukhā me taɱ āvuso Bhagavato sutaɱ,||
sammukhā paṭiggahitaɱ:|| ||

[437] 'Yo bhikkhave, dukkhaɱ passati||
dukkha-samudayam pi so passati||
dukkha-nirodham pi passati,||
dukkha-nirodha-gāminiɱ paṭipadam pi passati.|| ||

Yo dukkha-samudayaɱ passati,||
dukkham pi so passati||
dukkha-nirodham pi passati||
dukkha-nirodha-gāminī paṭipadam pi passati.|| ||

Yo dukkha-nirodhaɱ passati,||
dukkham pi so passati||
dukkha-samudayam pi passati||
dukkha-nirodha-gāminiɱ paṭipadam pi passati.|| ||

Yo dukkha-nirodha-gāminiɱ paṭipadaɱ passati,||
dukkham pi so passati||
dukkha-samudayam pi passati||
dukkha-nirodham pi passatī'" ti.|| ||

Koṭigāma Vaggo

 


Contact:
E-mail
Copyright Statement   Webmaster's Page