Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
56. Sacca Saŋyutta
IV. Siŋsapā Vagga

Sutta 32

Khadira Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evam me sutaɱ:|| ||

Ekaɱ samayam Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Yo bhikkhave, evaɱ vadeyya:|| ||

"Ahaɱ dukkhaɱ ariyasaccaɱ yathā-bhūtaɱ anabhisamecca,||
dukkha-samudayaɱ ariyasaccaɱ yathā-bhūtaɱ anabhisamecca,||
dukkha-nirodhaɱ ariyasaccaɱ yathā-bhūtaɱ anabhisamecca,||
dukkha-nirodha-gāminīpaṭipadaɱ ariyasaccaɱ yathā-bhūtaɱ anabhisamecca||
sammā dukkhassantaɱ karissāmī' ti.|| ||

N'etaɱ ṭhānaɱ vijjati.|| ||

Seyyathā pi bhikkhave, yo evaɱ vadeyya:|| ||

'Ahaɱ khadirapattānaɱ vā||
salalapattānaɱ vā||
āmalakapattānaɱ vā||
[439] puṭaɱ karitvā udakaɱ vā||
tālapakkaɱ vā harissāmī' ti.|| ||

Netaɱ ṭhānaɱ vijjati.|| ||

Evam eva kho bhikkhave, yo evaɱ vadeyya:|| ||

'Ahaɱ dukkhaɱ ariyasaccaɱ yathā-bhūtaɱ anabhisamecca,||
dukkhasamudayaɱ ariyasaccaɱ yathā-bhūtaɱ anabhisamecca,||
dukkhanirodhaɱ ariyasaccaɱ yathā-bhūtaɱ anabhisamecca,||
dukkhanirodhagāminīpaṭipadaɱ ariyasaccaɱ yathā-bhūtaɱ anabhisamecca sammā dukkhassantaɱ karissāmī" ti.|| ||

N'etaɱ ṭhānaɱ vijjati.|| ||

 


 

Yo ca kho bhikkhave, evaɱ vadeyya:|| ||

'Ahaɱ dukkhaɱ ariyasaccaɱ yathā-bhūtaɱ abhisamecca,||
dukkhasamudayaɱ ariyasaccaɱ yathā-bhūtaɱ abhisamecca,||
dukkhanirodhaɱ ariyasaccaɱ yathā-bhūtaɱ abhisamecca,||
dukkhanirodhagāminīpaṭipadaɱ ariyasaccaɱ yathā-bhūtaɱ abhisamecca||
sammā dukkhassantaɱ karissāmī" ti.|| ||

Ṭhāname taɱ vijjati.|| ||

Seyyathā pi bhikkhave, yo evaɱ vadeyya:|| ||

'Ahaɱ padumapattānaɱ vā||
palāsapattānaɱ vā||
māluvāpattānaɱ vā||
puṭaɱ karitvā udakaɱ vā||
tālapakkaɱ vā harissāmī" ti.|| ||

Ṭhāname taɱ vijjati.|| ||

Evam eva kho, bhikkhave, yo evaɱ vadeyya:|| ||

'Ahaɱ dukkhaɱ ariyasaccaɱ yathā-bhūtaɱ abhisamecca,||
dukkhasamudayaɱ ariyasaccaɱ yathā-bhūtaɱ abhisamecca,||
dukkhanirodhaɱ ariyasaccaɱ yathā-bhūtaɱ abhisamecca,||
dukkhanirodhagāminīpaṭipadaɱ ariyasaccaɱ yathā-bhūtaɱ abhisamecca||
sammā dukkhassantaɱ karissāmī" ti.|| ||

ṭhāname taɱ vijjati.|| ||

Tasmā ti ha bhikkhave,||
'idaɱ dukkhan' ti yogo karaṇīyo,||
'ayaɱ dukkha-samudayo' ti yogo karaṇīyo,||
'ayaɱ dukkha-nirodho' ti yogo karaṇīyo,||
'ayaɱ dukkha-nirodha-gāminī paṭipadā' ti yogo karaṇīyo" ti.|| ||

 


Contact:
E-mail
Copyright Statement   Webmaster's Page