Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
56. Sacca Saŋyutta
IV. Siŋsapā Vagga

Sutta 38

Dutiya Suriyupamā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evam me sutaɱ:|| ||

Ekaɱ samayam Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Yāva kīvañ ca me bhikkhave, candimasuriyā loke n'ūppajjanti,||
n'eva tāva mahato ālokassa pātubhāvo hoti||
mahato obhāsassa.|| ||

Andhantamaɱ tadā hoti||
andhakāratimisā.|| ||

N'eva tāva rattindivā paññāyanti||
na māsaddhamāsā paññāyanti||
na utusaŋvaccharā paññāyanti.|| ||

Yato ca kho bhikkhave, candimasuriyā loke uppajjati,||
atha mahato ālokassa pātubhāvo hoti,||
mahato obhāsassa.|| ||

[443] N'eva andhantamaɱ tadā hoti,||
na andhakāratimisā.|| ||

Atha rattindivā paññāyanti||
māsaddhamāsā paññāyanti||
utusaŋVaccharā paññāyanti.|| ||

Evam eva kho bhikkhave, yāva kīvañ ca Tathāgato loke n'ūppajjati arahaɱ sammāsambuddho,||
n'eva tāva mahato ālokassa pātubhāvo hoti||
mahato obhāsassa.|| ||

Andhantamaɱ tadā hoti||
andhakāratimisā.|| ||

N'eva tāva catunnaɱ ariyasaccānaɱ ācikkhanā hoti||
desanā||
paññāpanā||
paṭṭhapanā||
vivaraṇā||
vibhajanā||
uttānīkammaɱ.|| ||

Yato ca kho bhikkhave, Tathāgato loke uppajjati arahaɱ sammāsambuddho||
atha mahato ālokassa pātubhāvo hoti||
mahato obhāsassa.|| ||

N'eva andhantamaɱ tadā hoti||
na andhakāratimisā.|| ||

Atha kho catunnaɱ ariyasaccānaɱ ācikkhanā hoti||
desanā||
paññāpanā||
paṭṭhapanā||
vivaraṇā||
vibhajanā||
uttānīkammaɱ.|| ||

Katamesaŋ catunnaɱ?|| ||

Dukkhassa ariyasaccassa,||
dukkha-samudayassa ariyasaccassa,||
dukkha-nirodhassa ariyasaccassa,||
dukkha-nirodha-gāminī paṭipadāya ariyasaccassa.|| ||

Tasmā ti ha bhikkhave,||
'idaɱ dukkhan' ti yogo karaṇīyo,||
'ayaɱ dukkha-samudayo' ti yogo karaṇīyo,||
'ayaɱ dukkha-nirodho' ti yogo karaṇīyo,||
'ayaɱ dukkha-nirodha-gāminī paṭipadā' ti yogo karaṇīyo" ti.|| ||

 


Contact:
E-mail
Copyright Statement   Webmaster's Page