Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
56. Sacca Saŋyutta
IV. Siŋsapā Vagga

Sutta 39

Indakhīlo Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evam me sutaɱ:|| ||

Ekaɱ samayam Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Ye hi keci, bhikkhave, samaṇā vā brāhmaṇā vā||
'idaɱ dukkhan' ti||
yathā-bhūtaɱ nappajānanti||
'ayaɱ dukkhasamudayo' ti||
yathā-bhūtaɱ nappajānanti||
'ayaɱ dukkhanirodho' ti||
yathā-bhūtaɱ nappajānanti||
'ayaɱ dukkhanirodhagāminī paṭipadā' ti||
yathā-bhūtaɱ nappajānanti.|| ||

Te aññassa samaṇassa vā brāhmaṇassa vā mukhaɱ olokenti:|| ||

'Ayaɱ nuna bhavaɱ||
jānaɱ jānāti||
passaŋ passatī' ti.|| ||

Seyyathā pi bhikkhave, tūlapicu vā||
kappāsapicu vā||
lahuko vātupādāno same bhumibhāge nikkhitto,||
tamenaɱ [444] puratthimo vāto pacchimena saŋhareyya,||
pacchimo vāto puratthimena saŋhareyya,||
uttaro vāto dakkhiṇena saŋhareyya,||
dakkhiṇo vāto uttarena saŋhareyya.|| ||

Taɱ kissa hetu?|| ||

Lahukattā bhikkhave, kappāsapicuno.|| ||

Evam eva kho bhikkhave, ye keci samaṇā vā brāhmaṇā vā||
'idaɱ dukkhan' ti||
yathā-bhūtaɱ nappajānanti||
'ayaɱ dukkhasamudayo' ti||
yathā-bhūtaɱ nappajānanti||
'ayaɱ dukkhanirodho' ti||
yathā-bhūtaɱ nappajānanti||
'ayaɱ dukkhanirodhagāminī paṭipadā' ti||
yathā-bhūtaɱ nappajānanti.|| ||

Te aññassa samaṇassa vā brāhmaṇassa vā mukhaɱ olokenti:|| ||

'Ayaɱ nuna bhavaɱ||
jānaɱ jānāti||
passaŋ passatī' ti.|| ||

Taɱ kissa hetu?|| ||

Adiṭṭhattā bhikkhave, catunnaɱ ariyasaccānaɱ.|| ||

 


 

Ye ca kho keci bhikkhave, samaṇā vā brāhmaṇā vā||
'idaɱ dukkhan' ti||
yathā-bhūtaɱ pajānanti||
'ayaɱ dukkhasamudayo' ti||
yathā-bhūtaɱ pajānanti||
'ayaɱ dukkhanirodho' ti||
yathā-bhūtaɱ pajānanti||
'ayaɱ dukkhanirodhagāminī paṭipadā' ti||
yathā-bhūtaɱ pajānanti.||| ||

te nāññassa samaṇassa vā brāhmaṇassa vā mukhaɱ olokenti:|| ||

'Ayaɱ nuna bhavaɱ||
jānaɱ jānāti||
passaŋ passatī' ti.|| ||

Seyyathā pi bhikkhave, ayokhīlo vā||
indakhīlo vā||
gambhīranemo sunikhāto acalo asampakampī.|| ||

Puratthimāya ce pi disāya āgaccheyya bhusā vātavuṭṭhi,||
n'eva naɱ saŋkampeyya na sampakampeyya na sampacāleyya.|| ||

Pacchimāya ce pi disāya āgaccheyya bhusā vātavuṭṭhi,||
n'eva naɱ saŋkampeyya na sampakampeyya na sampacāleyya.|| ||

Uttarāya c epi disāya āgaccheyya bhusā vātavuṭṭhi,||
n'eva naɱ saŋkampeyya na sampakampeyya na sampacāleyya.|| ||

Dakkhiṇāya ce pi disāya āgaccheyya bhusā vātavuṭṭhi,||
n'eva naɱ saŋkampeyya na sampakampeyya na sampacāleyya.|| ||

Taɱ kissa hetu?|| ||

Gambhīrattā bhikkhave, nemassa,||
sunikhātattā indakhīlassa.|| ||

Evam eva kho bhikkhave, ye hi keci samaṇā vā brāhmaṇā vā||
'idaɱ dukkhan' ti||
yathā-bhūtaɱ pajānanti||
'ayaɱ dukkhasamudayo' ti||
yathā-bhūtaɱ pajānanti||
'ayaɱ dukkhanirodho' ti||
yathā-bhūtaɱ pajānanti||
'ayaɱ dukkhanirodhagāminī paṭipadā' ti||
yathā-bhūtaɱ pajānanti.||| ||

te nāññassa samaṇassa vā brāhmaṇassa vā mukhaɱ olokenti:|| ||

'Ayaɱ nuna bhavaɱ||
jānaɱ jānāti||
passaŋ passatī' ti.|| ||

Taɱ kissa hetu?|| ||

Sudiṭṭhattā bhikkhave, catunnaɱ ariyasaccānaɱ.|| ||

Katamesaŋ catunnaɱ?|| ||

Dukkhassa ariyasaccassa,||
dukkha-samudayassa ariyasaccassa,||
dukkha-nirodhassa ariyasaccassa,||
dukkha-nirodha-gāminī paṭipadāya ariyasaccassa.|| ||

Tasmā ti ha bhikkhave,||
'idaɱ dukkhan' ti yogo karaṇīyo,||
'ayaɱ dukkha-samudayo' ti yogo karaṇīyo,||
'ayaɱ dukkha-nirodho' ti yogo karaṇīyo,||
'ayaɱ dukkha-nirodha-gāminī paṭipadā' ti yogo karaṇīyo" ti.|| ||

 


Contact:
E-mail
Copyright Statement   Webmaster's Page