Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
56. Sacca Saŋyutta
V. Papāta Vagga

Sutta 41

Cintā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evam me sutaɱ:|| ||

Ekaɱ samayaɱ Bhagavā Rājagahe viharati Veḷuvane Kalandakanivāpe.|| ||

2. Tatra kho Bhagavā bhikkhū āmantesi.|| ||

"Bhūtapubbaɱ bhikkhave, aññataro puriso Rājagahā nikkhamitvā loka- [447] cintaɱ cintessāmī ti yena Sumāgavā pokkharaṇī ten'upasaŋkami.|| ||

Upasaŋkamitvā Sumāgavāya pokkharaṇiyā tīre nisīdi lokacintaɱ cintento.|| ||

3. Addasā kho bhikkhave, so puriso Sumāgavāya pokkharaṇiyā tīre caturaŋginiɱ senaɱ bhisamūḷālaɱ pavisantiɱ.|| ||

Disvān'assa etad ahosi:|| ||

'Ummatto'smi nāmāhaɱ.|| ||

Yaɱ loke n'atthi taɱ mayā diṭṭhan' ti.|| ||

4. Atha kho bhikkhave, so puriso nagaram Rājagahaɱ pavisitvā mahājanakāyassa ārocesi.|| ||

'Ummatto'smi nāmāhaɱ bhante,||
viceto'smi nāmāhaɱ bhante.|| ||

Yaɱ loke n'atthi taɱ mayā diṭṭhan' ti.|| ||

Yathā katham pana tvaɱ ambho purisa ummatto?|| ||

Kathaɱ viceto?|| ||

Kiñ ca loke n'atthi yaɱ tayā diṭṭhan' ti?|| ||

5. 'Idhāhaɱ bhante, Rājagahā nikkhamitvā lokacintaɱ cintessāmī ti yena Sumāgavā pokkharaṇī ten'upasaŋkamiɱ.|| ||

Upasaŋkamitvā sumāgavāya pokkhaṇiyā tīre nisīdiɱ lokacintaɱ cintento.|| ||

Addasaŋ kho haɱ bhante Sumāgavāya pokkharaṇiyā caturaŋginiɱ senaɱ bhisamūḷālaɱ pavisantiɱ.|| ||

Evaɱ khvāhaɱ bhante ummatto.|| ||

Evaɱ viceto.|| ||

Idañ ca loke n'atthi yaɱ mayā diṭṭhan' ti.|| ||

'Taggha tvaɱ ambho purisa ummatto.|| ||

Taggha viceto.|| ||

Idañ ca loke n'atthi yaɱ tayā diṭṭhan' ti.|| ||

6. Taɱ kho pana bhikkhave so puriso bhūtaɱ yeva addasa,||
no abhūtaɱ.|| ||

Bhutapubbaɱ bhikkhave, devāsurasaŋgāmo samūpabbuḷho ahosi,||
tasmiɱ kho pana bhikkhave,||
saŋgāme devā jiniɱsu.|| ||

Asurā parājiniɱsu.|| ||

Parājitā [448] ca kho bhikkhave,||
Asurā bhītā bhisamūḷālena Asurapuraɱ pavisiɱsu||
devānaɱ yeva kho bhayamānā.|| ||

Tasmāt iha bhikkhave, mā lokacintaɱ cintetha,||
sassato loko ti vā asassato loko ti vā.|| ||

Antavā loko ti vā anantavā loko ti vā.|| ||

Taɱ jīvaɱ taɱ sarīran ti vā aññaɱ jīvaɱ aññaɱ sarīran ti vā.|| ||

Hoti Tathāgato param māraṇā ti vā.|| ||

Na hoti Tathāgato param māraṇā ti vā.|| ||

Hoti ca na ca hoti Tathāgato param māraṇā ti vā.|| ||

N'eva hoti na na hoti Tathāgato param māraṇā ti vā.|| ||

Taɱ kissa hetu?|| ||

8. N'esā bhikkhave, cintā atthasaŋhitā,||
n'ādibramhacariyikā,||
na nibbidāya,||
na virāgāya,||
na nirodhāya,||
na upasamāya,||
na abhiññāya,||
na sambodhāya||
na nibbānāya, saŋvattati.|| ||

9. Cintentā ca kho tumhe bhikkhave,|| ||

"Idaɱ dukkhan" ti cinteyyātha,|| ||

"Ayaɱ dukkhasamudayo" ti cinteyyātha,|| ||

"Ayaɱ dukkhanirodho" ti cinteyyātha,|| ||

"Ayaɱ dukkhanirodhagāminī paṭipadā" ti cinteyyātha.|| ||

Taɱ kissa hetu?|| ||

Esā bhikkhave, cintā atthasaŋhitā,||
esā ādibrahmacariyikā,||
esā nibbidāya||
virāgāya||
nirodhāya||
upasamāya||
abhiññāya||
sambodhāya||
nibbānāya saŋvattati.|| ||

Tasmāt iha bhikkhave,|| ||

"Idaɱ dukkhan" ti yogo karaṇīyo|| ||

"Ayaɱ dukkhasamudayoti" yogo karaṇīyo|| ||

"Ayaɱ dukkhanirodhoti" yogo karaṇīyo|| ||

"Ayaɱ dukkhanirodhagāminī paṭipadā" ti yogo karaṇīyoti.|| ||

 


Contact:
E-mail
Copyright Statement   Webmaster's Page