Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
56. Sacca Saŋyutta
V. Papāta Vagga

Sutta 43

Pariḷāha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evam me sutaɱ:|| ||

Atthi bhikkhave, mahāpariḷāho nāma nirayo tattha yaɱ kiñci cakkhunā rūpaɱ passati,||
aniṭṭharūpaɱyeva [451] passati,||
no iṭṭharūpaɱ.|| ||

Akantarūpaɱyeva passati,||
no kantarūpaɱ.|| ||

Amanāparūpaɱ yeva passati,||
no manāparūpaɱ.|| ||

Yaɱ kiñci sotena saddaɱ suṇāti aniṭṭhasaddaɱyeva suṇāti,||
no iṭṭhasaddaɱ.|| ||

Akantasaddaɱyeva suṇāti,||
no kantasaddaɱ.|| ||

Amanāpasaddaɱ yeva suṇāti,||
no manāpasaddaɱ.|| ||

Yaɱ kiñci ghānena gandhaɱ ghāyati,||
aniṭṭhagandaɱyeva ghāyati,||
no iṭṭhagandhaɱ.|| ||

Akantagandhaɱyeva ghāyati,||
no kantagandhaɱ.|| ||

Amanāpagandhaɱ yeva ghāyati||
no manāpagandhaɱ.|| ||

Yaɱ kiñci jīvhāya rasaŋ sāyati,||
aniṭṭharasaŋyeva sāyati,||
no iṭṭharasaɱ.|| ||

Akantarasaŋyeva sāyati,||
no kantarasaɱ.|| ||

Amanāparasaŋ yeva sāyati,||
no manāparasaɱ.|| ||

Yaɱ kiñci kāyena phoṭṭhabbaɱ phusati,||
aniṭṭhaphoṭṭhabbaɱyeva phusati,||
no iṭṭhaphoṭṭhabbaɱ.|| ||

Akantaphoṭṭhabbaɱyeva phusati||
no kantaphoṭṭhabbaɱ.|| ||

Amanāpaphoṭṭhabbaɱ yeva phusati||
no manāpaphoṭṭhabbaɱ.|| ||

Yaɱ kiñci manasā dhammaɱ vijānāti||
aniṭṭharūpaɱ yeva vijānāti||
no iṭṭharūpaɱ.|| ||

Akantarūpaɱyeva vijānāti,||
no kantarūpaɱ.|| ||

Amanāparūpaɱyeva vijānāti||
no manāparūpan" ti.|| ||

Evaɱ vutte aññataro bhikkhu Bhagavantaɱ etad avoca:|| ||

"Mahā vata so bhante, pariḷāho||
sumahā vata so bhante, pariḷāho.|| ||

Atthi nu kho bhante, etamhā pariḷāhā||
añño pariḷāho mahantataro ca bhayānakatarocā" ti?|| ||

"Atthi kho bhikkhu etamhā pariḷāhā||
añño pariḷāho mahantataro ca bhayānakataro cā" ti.|| ||

"Katamo pana bhante, etamhā pariḷāhā||
añño pariḷāho mahantataro ca bhayānakataro cā" ti?|| ||

"Ye hi keci bhikkhu samaṇā vā brāhmaṇā vā||
'idaɱ dukkhan' ti||
yathābhūtaɱ na pajānanti.|| ||

'Ayaɱ dukkha-samudayo' ti||
yathābhūtaɱ na pajānanti.|| ||

'Ayaɱ dukkha-nirodho' ti||
yathābhūtaɱ na pajānanti.|| ||

'Ayaɱ dukkha-nirodha-gāminī paṭipadā' ti||
yathābhūtaɱ na pajānanti.|| ||

Te jāti-saɱvattanikesu sankhāresu abhiramanti.|| ||

Jarā-saɱvattanikesu sankhāresu abhiramanti.|| ||

Maraṇa-saɱvattanikesu sankhāresu abhiramanti.|| ||

Soka-parideva-dukkha-domanass'upāyāsa-saɱvattanikesu sankhāresu abhiramanti.|| ||

Te jāti-saɱvattanikesu sankhāresu abhiratā||
jarā-saɱvattanikesu sankhāresu abhiratā||
maraṇa-saɱvattanikesu sankhāresu abhiratā||
soka-parideva-dukkha-domanass'upayā-sasaɱvattanikesu sankhāresu abhiratā||
jāti-saɱvattanike pi sankhāre abhisaŋkharonti.|| ||

Jarā-saɱvattanike pi sankhāre abhisaŋkharoti.|| ||

Maraṇa-saɱvattanike pi sankhāre abhisaŋkharonti.|| ||

Soka-parideva-dukkha-domanass'upāyāsa-saɱvattanike pi sankhāre abhisaŋkharonti.|| ||

Te jāti-saɱvattanike pi sankhāre abhisaŋkharitvā jarā-saɱvattanike pi sankhāre abhisaŋkharitvā||
maraṇa-saɱvattanike pi sankhāre abhisaŋkharitvā||
soka-parideva-dukkha-domanass'upāyāsa-saɱvattanike pi sankhāre abhisaŋkharitvā||
jāti-pariḷāhena pi pariḍayhanti||
jarā-pariḷāhena pi pariḍayhanti||
maraṇa-pariḷāhena pi pariḍayhanti||
soka-parideva-dukkha-domanass'upāyāsa-pariḷāhena pi pariḍayhanti.|| ||

Te na parimuccanti||
jātiyā jarāya maraṇena sokehi paridevehi dukkhehi domanassehi upāyāsehi,||
na parimuccanti dukkhasmā ti vadāmi.|| ||

 


 

Ye ca kho keci bhikkhu samaṇā vā brāhmaṇā vā||
'idaɱ dukkhan' ti||
yathābhūtaɱ pajānanti||
'ayaɱ dukkhasamudayo' ti||
yathābhūtaɱ pajānanti||
'ayaɱ dukkhanirodho' ti||
yathābhūtaɱ pajānanti||
'ayaɱ dukkhanirodhagāminī paṭipadā' ti||
yathābhūtaɱ pajānanti.|| ||

Te jāti-saɱvattanikesu sankhāresu nābhiramanti.|| ||

Jarā-saɱvattanikesu sankhāresu nābhiramanti.|| ||

Maraṇa-saɱvattanikesu sankhāresu nābhiramanti.|| ||

Soka-parideva-dukkha-domanass'upāyāsa-saɱvattanikesu sankhāresu nābhiramanti.|| ||

Te jāti-saɱvattanikesu sankhāresu anabhiratā||
jarā-saɱvattanikesu sankhāresu anabhiratā||
maraṇa-saɱvattanikesu sankhāresu anabhiratā||
soka-parideva-dukkha-domanass'upāyāsa-saɱvattanikesu sankhāresu anabhiratā||
jāti-saɱvattanike pi sankhāre nābhisaŋkharonti.|| ||

Jarā-saɱvattanike pi sankhāre nābhisaŋkharonti.|| ||

Maraṇa-saɱvattanike pi sankhāre nābhisaŋkharonti.|| ||

Soka-parideva-dukkha-domanass'upāyāsa-saɱvattanike pi sankhāre nābhisaŋkharonti.|| ||

Te jāti-saɱvattanike pi sankhāre anabhisaŋkharitvā||
jarā-saɱvattanike pi sankhāre anabhisaŋkharitvā||
maraṇa-saɱvattanike pi sankhāre anabhisaŋkharitvā||
soka-parideva-dukkha-domanass'upāyāsa saɱvattanike pi sankhāre anabhisaŋkharitvā||
jāti-pariḷāhena pi na pariḍayhanti,||
jarā-pariḷāhena pi na pariḍayhanti,||
maraṇa-pariḷāhena pi na pariḍayhanti,||
soka-parideva-dukkha-domanass'upāyāsapariḷāhena pi na pariḍayhanti.|| ||

Te parimuccanti jātiyā jarāya maraṇena sokehi paridevehi dukkhehi domanassehi upāyāsehi,||
parimuccanti dukkhasmā ti vadāmi.|| ||

Tasmāt iha bhikkhu,||
'idaɱ dukkhan' ti yogo karaṇīyo||
'ayaɱ dukkha-samudayo' ti yogo karaṇīyo||
'ayaɱ dukkhanirodho' ti yogo karaṇīyo||
'ayaɱ dukkha-nirodha-gāminī paṭipadā' ti yogo karaṇīyo" ti.|| ||

 


Contact:
E-mail
Copyright Statement   Webmaster's Page