Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
56. Sacca Saŋyutta
V. Papāta Vagga

Sutta 45

Chiggaḷa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh][than] Evam me sutaɱ:|| ||

Ekaɱ samayaɱ Bhagavā Vesāliyaɱ viharati Mahāvane Kūṭāgārasālāyaɱ.|| ||

Atha kho āyasmā Ānando pubbaṇhasamayaɱ nivāsetvā pattacīvaram ādāya Vesāliɱ piṇḍāya pāvisi.|| ||

Addasā kho āyasmā Ānando sambahule Licchavi-kumārake santhāgāre upāsanaɱ karonte||
dūrato va sukhumena tālacchiggalena asanaɱ atipātente poŋkhānupoŋkhaɱ avirādhitaɱ.|| ||

Disvānassa etad ahosi:|| ||

"Sikkhitā vat'ime Licchavi-kumārakā.|| ||

Susikkhitā vat'ime Licchavi-kumārakā.|| ||

Yatra hi nāma dūrato va sukhumena tālacchiggalena asanaɱ atipātessanti poŋkhānupoŋkhaɱ avirādhitan" ti.|| ||

Atha kho āyasmā Ānando Vesāliyaɱ piṇḍaya caritvā pacchābhantaɱ piṇḍapātapaṭikkanto yena Bhagavā ten'upasaɱkami.|| ||

Upasaɱkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Ānando Bhagavantaɱ etad avoca:|| ||

"Idhāhaɱ bhante, pubbaṇhasamayaɱ nivāsetvā pattacīvaram ādāya Vesāliɱ piṇḍāya pāvisiɱ.|| ||

Addasaɱ khvāhaɱ bhante, sambahule Licchavi-kumārake santhāgāre upāsanaɱ karonte||
dūrato va sukhumena tālacchiggalena asanaɱ atipātente poŋkhānupoŋkhaɱ avirādhitaɱ.|| ||

Disvāna me etad ahosi:|| ||

"Sikkhitā vat'ime Licchavi-kumārakā.|| ||

Susikkhitā vatime Licchavi-kumārakā.|| ||

Yatra hi nāma dūrato va sukhumena tālacchiggalena asanaɱ atipātessanti poŋkhānupoŋkhaɱ avirādhitan" ti.|| ||

[454] "Taɱ kiɱ maññasi Ānanda?|| ||

Katamaɱ nu kho dukkarataraɱ vā durabhisambhavataraɱ vā,||
yo ca dūrato va sukhumena tālacchiggalena asanaɱ atipāteyya poŋkhānupoŋkhaɱ avirādhitaɱ||
yo vā satadhā bhinnassa vālassa koṭiyā koṭiɱ paṭivijjhayyā" ti?|| ||

"Etad eva bhante,||
dukkarataraɱ c'eva durabhisambhavataraɱ ca||
yo vā satadhā bhinnassa vālassa koṭiyā koṭiɱ paṭivijjhayyā" ti.|| ||

"Atha kho te Ānanda duppaṭivijjhataraɱ paṭivijjhanti ye||
'idaɱ dukkhan' ti||
yathābhūtaɱ paṭivijjhanti||
'ayaɱ dukkhasamudayo' ti||
yathābhūtaɱ paṭivijjhanti||
'ayaɱ dukkhanirodho' ti||
yathābhūtaɱ paṭivijjhanti||
'ayaɱ dukkhanirodhagāminī paṭipadā' ti||
yathābhūtaɱ paṭivijjhanti.|| ||

Tasmāt iha Ānanda,||
'idaɱ dukkhan' ti yogo karaṇīyo||
'ayaɱ dukkha-samudayo' ti yogo karaṇīyo||
'ayaɱ dukkhanirodho' ti yogo karaṇīyo||
'ayaɱ dukkha-nirodha-gāminī paṭipadā' ti yogo karaṇīyo" ti.|| ||

 


Contact:
E-mail
Copyright Statement   Webmaster's Page