Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
56. Sacca Saŋyutta
V. Papāta Vagga

Sutta 47

Dutiya Chiggaḷa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evam me sutaɱ:|| ||

Ekaɱ samayam Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Seyyathā pi bhikkhave, puriso mahāsamudde ekacchiggaḷaɱ yugaɱ pakkhipeyya.|| ||

Tatrā pi'assa kāṇo kacchapo||
yo vassasatassa vassasatassa accayena||
sakiɱ sakiɱ ummujjeyya.|| ||

Taɱ kim maññatha bhikkhave?|| ||

Api nu so kāṇo kacchapo vassasatassa vassasatassa accayena||
sakiɱ sakiɱ ummujjanto||
amusmiɱ ekacchiggaḷe yuge gīvaɱ paveseyyā" ti?|| ||

[456] "Yadi nūna bhante, kadāci karahaci dīghassa addhuno accayenā" ti.|| ||

"Khippataraɱ kho so bhikkhave, kāṇo kacchapo vassasatassa vassasatassa accayena||
sakiɱ sakiɱ ummujjanto||
amusmiɱ ekacchiggale yuge gīvaɱ paveseyya,||
na tv evāhaɱ bhikkhave,||
sakiɱ vinipātagatena bālena manussattaɱ vadāmi.|| ||

Taɱ kissa hetu?|| ||

Na h'ettha bhikkhave, atthi dhammacariyā||
samacariyā||
kusalakiriyā||
puññakiriyā.|| ||

Aññamaññakhādikā ettha bhikkhave,||
vattati dubbalakhādikā.|| ||

Taɱ kissa hetu?|| ||

Adiṭṭhattā bhikkhave, catunnaɱ ariyasaccānaɱ.|| ||

Katamesaŋ catunnaɱ?

Dukkhassa ariyasaccassa,||
dukkha-samudayassa ariyasaccassa,||
dukkha-nirodhassa ariyasaccassa,||
dukkha-nirodha-gāminī paṭipadāya ariyasaccassa.|| ||

Tasmāt iha bhikkhu,||
'idaɱ dukkhan' ti yogo karaṇīyo||
'ayaɱ dukkha-samudayo' ti yogo karaṇīyo||
'ayaɱ dukkhanirodho' ti yogo karaṇīyo||
'ayaɱ dukkha-nirodha-gāminī paṭipadā' ti yogo karaṇīyo" ti.|| ||

 


Contact:
E-mail
Copyright Statement   Webmaster's Page