Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
56. Sacca Saŋyutta
V. Papāta Vagga

Sutta 49

Paṭhama Sineru Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evam me sutaɱ:|| ||

Ekaɱ samayam Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Seyyathā pi bhikkhave, puriso Sinerussa pabbatarājassa||
satta muggamattiyo pāsāṇasakkharā upanikkhipeyya.|| ||

Taɱ kim maññatha bhikkhave?|| ||

Katamaɱ nu kho bahutaraɱ||
yā vā satta muggamattiyo pāsāṇasakkharā upanikkhittā||
yo ca Sineru-pabbatarājā" ti?|| ||

"Etad eva bhante, bahutaraɱ||
yad idaɱ Sineru-pabbatarājā.|| ||

Appamattikā satta muggamattiyo pāsāṇasakkharā upanikkhittā.|| ||

Saŋkham pi na upenti||
upanidhim pi na upenti||
kalabhāgam pi na upenti||
Sineruɱ-pabbatarājaɱ upanidhāya satta muggamattiyo pāsāṇasakkharā upanikkhittāya" ti.|| ||

[458] "Evam eva kho bhikkhave, ariyasāvakassa diṭṭhi-sampannassa puggalassa abhisametāvino etad eva bahutaraɱ dukkhaɱ||
yad idaɱ parikkhīṇaɱ pariyādinnaɱ,||
appamattakaɱ avasiṭṭhaɱ saŋkhampi na upeti||
upanidhim pi na upeti||
kalabhāgam pi na upeti||
purimaɱ dukkha-kkhandhaɱ parikkhīṇaɱ pariyādinnaɱ upanidhāya||
yad idaɱ sattakkhattum paramatā.|| ||

Yo 'idaɱ dukkhan' ti||
yathā-bhūtaɱ pajānā' ti,||
'ayaɱ dukkha-samudayo' ti||
yathā-bhūtaɱ pajānāti,||
'ayaɱ dukkhanirodho' ti||
yathā-bhūtaɱ pajānāti,||
'ayaɱ dukkha-nirodha-gāminī paṭipadā' ti||
yathā-bhūtaɱ pajānāti. || ||

Tasmāt iha bhikkhave,||
'idaɱ dukkhan' ti yogo karaṇīyo||
'ayaɱ dukkha-samudayo' ti yogo karaṇīyo||
'ayaɱ dukkhanirodho' ti yogo karaṇīyo||
'ayaɱ dukkha-nirodha-gāminī paṭipadā' ti yogo karaṇīyo" ti.|| ||

 


Contact:
E-mail
Copyright Statement   Webmaster's Page