Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
56. Sacca Saŋyutta
VI. Abhisamaya Vagga

Sutta 55

Paṭhama Pathavī Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evam me sutaɱ:|| ||

Ekaɱ samayam Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Seyyathā pi bhikkhave, puriso mahāpaṭhaviyā satta kolaṭṭhimattiyo guḷikā upanikkhipeyya.|| ||

Taɱ kiɱ maññatha bhikkhave?|| ||

Katamaɱ nu kho bahutaraɱ||
yaɱ vā satta kolaṭṭhimattiyo guḷikā upanikkhittā,||
ayaɱ vā mahāpaṭhavī" ti?|| ||

Etad eva bhante, bahutaraɱ||
yad idaɱ mahāpaṭhavī,||
appamattikā satta kolaṭṭhimattiyo guḷikā upanikkhittā,||
saŋkham pi na upenti||
upanidhim pi na upenti||
kalabhāgam pi na upenti||
mahāpaṭhaviɱ upanidhāya satta kolaṭṭhimattiyo guḷikā upanikkhittā" ti.|| ||

"Evam eva kho, bhikkhave, ariyasāvakassa diṭṭhi-sampannassa puggalassa abhisametāvino etad eva bahutaraɱ dukkhaɱ||
yad idaɱ parikkhīṇaɱ pariyādinnaɱ,||
appamattakaɱ avasiṭṭhaɱ,||
saŋkham pi na upeti||
upanidhim pi na upeti||
kalabhāgam pi na upeti||
purimaɱ dukkha-kkhandhaɱ parikkhīṇaɱ pariyādinnaɱ upanidhāya||
yad idaɱ sattakkhattuparamatā.|| ||

Yo 'idaɱ dukkhan' ti||
yathā-bhūtaɱ pajānā' ti,||
'ayaɱ dukkha-samudayo' ti||
yathā-bhūtaɱ pajānāti,||
'ayaɱ dukkhanirodho' ti||
yathā-bhūtaɱ pajānāti,||
'ayaɱ dukkha-nirodha-gāminī paṭipadā' ti||
yathā-bhūtaɱ pajānāti. || ||

Tasmāt iha bhikkhave,||
'idaɱ dukkhan' ti yogo karaṇīyo||
'ayaɱ dukkha-samudayo' ti yogo karaṇīyo||
'ayaɱ dukkhanirodho' ti yogo karaṇīyo||
'ayaɱ dukkha-nirodha-gāminī paṭipadā' ti yogo karaṇīyo" ti.|| ||

 


Contact:
E-mail
Copyright Statement   Webmaster's Page