Aṅguttara-Nikāya
III. Tika Nipāta
II. Rathakāra Vagga
Sutta 12
Sāraṇīya Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][bodh][upal] Evaṃ me sutaṃ:
Ekaṃ Bhagavā Sāvatthiyaṃ viharati Jetavane Anāthapiṇḍakassa ārāme.|| ||
"Tīṇ'imāni bhikkhave rañño khattiyassa muddhā-vasittassa yāva-jīvaṃ sārāṇiyāni bhavanti.|| ||
Katamāni tīṇi?|| ||
Yasmiṃ bhikkhave padese rājā khattiyo muddhā-vasitto jāto hoti.|| ||
Idaṃ, bhikkhave, paṭhamaṃ rañño khattiyassa muddhā-vasittassa yāva-jīvaṃ sārāṇīyaṃ hoti.|| ||
Puna ca paraṃ bhikkhave yasmiṃ padese rājā khattiyo muddhā-vasitto hoti.|| ||
Idaṃ, bhikkhave, dutiyaṃ rañño khattiyassa muddhā-vasittassa yāva-jīvaṃ sārāṇīyaṃ hoti.|| ||
Puna ca paraṃ bhikkhave yasmiṃ padese rājā khattiyo muddhā-vasitto saṅgāmaṃ abhivijinitvā vijita-saṅgāmo tam eva saṅgāmasīsaṃ ajjhā-vasati.|| ||
Idaṃ bhikkhava tatiyaṃ rañño khattiyassa muddhā-vasittassa yāva-jīvaṃ sārāṇīyaṃ hoti.|| ||
Imāni kho bhikkhave tīṇi rañño khattiyassa muddhā-vasittassa yāva-jīvaṃ sārāṇiyāni bhavanti.|| ||
[107] Evam eva kho bhikkhave tiṇ'imāni bhikkhussa yāva-jīvaṃ sārāṇiyāni bhavanti.|| ||
■
Katamāni tīṇi?|| ||
Yasmiṃ bhikkhave padese bhikkhu kesa-massuṃ ohāretvā kāsāyāni vatthāni acchādetvā agārasmā anagāriyaṃ pabba-jito hoti.|| ||
Idaṃ, bhikkhave, paṭhamaṃ bhikkhussa yāva-jīvaṃ sārāṇiyaṃ hoti.|| ||
Puna ca paraṃ bhikkhave yasmiṃ padese bhikkhu||
'Idaṃ dukkhan' ti yathā-bhūtaṃ pajānāti,||
'Ayaṃ dukkha-samudayo' ti yathā-bhūtaṃ pajanāti,||
'Ayaṃ dukkha-nirodho' ti yathā-bhūtaṃ pajānāti,||
'Ayaṃ dukkha-nirodha-gāminī paṭipadā' ti yathā-bhūtaṃ pajānāti.|| ||
Idaṃ bhikkhave dutiyaṃ bhikkhussa yāva-jīvaṃ sārāṇiyaṃ hoti.|| ||
Puna ca paraṃ bhikkhave yasmiṃ padese bhikkhu āsavānaṃ khayā anāsavaṃ ceto-vimuttiṃ paññā-vimuttiṃ diṭṭhe'va dhamme sayaṃ abhiññā sacchi-katvā upasampajja viharati.|| ||
Idaṃ, bhikkhave, tatiyaṃ bhikkhussa yāva-jīvaṃ sārāṇiyaṃ hoti.|| ||
Imāni kho bhikkhave tīṇi bhikkhussa yāva-jīvaṃ sārāṇiyāni bhavantī" ti.|| ||