Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as Mobile (āīūŋńñţđņļ). Alternatives:
[ ASCII (aiumnntdnl) | IAST Unicode (āīūṃṅñṭḍṇḷ) | Velthuis (aaiiuu.m'n~n.t.d.n.l) ]

 

Aŋguttara-Nikāya
III. Tikanipāta
IX. Samaņa Vagga

Sutta 86

Dutiya Sikkha Suttaŋ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1979 Pali Text Society Anguttara-Nikaya edited by The Rev. Richard Morris, M.A., LL.D., Second Edition, revised by A.K. Warder, B.A., Ph.D., Lecturer in Sanskrit in the University of Edinburgh

 


 

[1][pts][than] Evaŋ me sutaŋ.|| ||

Ekaŋ samayaŋ Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuŋ.|| ||

Bhagavā etad avoca:|| ||

86

Sādhikam idaŋ bhikkhave diyađđha-sikkhāpadasataŋ anvaddhamāsaŋ uddesaŋ āgacchati,||
yattha atthakāmā kulaputtā sikkhanti.|| ||

Tisso imā bhikkhave sikkhā,||
yatth'etaŋ sabbaŋ samodhānaŋ gacchati.|| ||

Katamā tisso?|| ||

Adhisīla-sikkhā,||
adhicitta-sikkhā,||
adhipaññā-sikkhā.|| ||

Imā ko bhikkhave tisso sikkhā,||
yatth'etaŋ sabbaŋ samodhānaŋ gacchati.|| ||

2. Idha, bhikkhave, bhikkhū sīlesu paripūrakārī hoti,||
samādhismiŋ mattaso kārī||
paññāya mattaso kārī.|| ||

So yāni tāni khuddānudhuddakāni sikkhāpadāni||
tāni āpajjati pi||
vuţţhāti pi.|| ||

Taŋ kissa hetu?|| ||

Na hi m'ettha bhikkhave abhabbatā vuttā.|| ||

Yāni kho tani sikkhāpadāni ādibrahmacariyikāni brahmacirayasāruppāni,||
tattha dhūvasīlo ca hoti||
ţhitha-sīlo ca||
samādāya sikkhati sikkhāpadesu.|| ||

So tiņņaŋ saŋyojanānaŋ parikkhayā sattakkhattuparamo hoti:||
sattakkhattuparamaŋ deve ca manusse ca||
sandhāvitvā saŋsaritvā dukkhass antaŋ karoti.|| ||

So tiņņaŋ saññojanānaŋ parikkhayā kolaŋkolo hoti:||
dve vā tīņi vā kulāni||
sandhāvitvā saŋsaritvā dukkhass antaŋ karoti.|| ||

So tiņņaŋ saññojanānaŋ parikkhayā ekabīji hoti:||
ekaŋ yeva mānusakaŋ bhavaŋ nibbattetvā dukkhassantaŋ karoti.|| ||

So tiņņaŋ saññojanānaŋ parikkhayā rāga-dosa-mohānaŋ tanuttā sakadāgāmi hoti:||
sakid eva imaŋ lokaŋ āganatvā dukkhassa antaŋ karoti.|| ||

3. Idhapana bhikkhave bhikkhū||
sīlesu paripūrakārī hoti,||
samādhismiŋ paripūrakārī,||
paññāya mattasokārī.|| ||

So yāni tāni khuddānukhuddakāni sikkhāpadāni,||
tāni āpaññati pi||
vuţţhāti pi.|| ||

Taŋ kissa hetu?|| ||

Na hi mettha bhikkhave abhabbatā vuttā.|| ||

Yāni ca kho tāni sikkhāpadāni ādibrahmacariyikāni brahmacariyasāruppāni,||
tattha dhūvasīli ca hoti ţhitasīli ca,||
samādāya sikkhati sikkhāpadesu.|| ||

So pañcannaŋ orambhāgiyānaŋ saññojanānaŋ parikkhayā||
uddhaŋsoto hoti akaniţţhagāmi.|| ||

So pañcannaŋ orambhāgiyānaŋ saññojanānaŋ parikkhayā||
asankhāra-parinibbāyī hoti.|| ||

So pañcannaŋ orambhāgiyānaŋ saññojanānaŋ parikkhayā||
sasankhāra-parinibbāyī hoti.|| ||

So pañcannaŋ orambhāgiyānaŋ saññojanānaŋ parikkhayā||
upahacca-parinibbāyī hoti.|| ||

So pañcannaŋ orambhāgiyānaŋ saññojanānaŋ parikkhayā||
antarā-parinibbāyī hoti.|| ||

4. Idhapana bhikkhave bhikkhū||
sīlesu paripūrakārī hoti,||
samādhismiŋ paripūrakārī,||
paññāya paripūrakārī.|| ||

So yāni [234] tāni khuddānukhuddakāni sikkhāpadāni,||
tāni āpaññati pi||
vuţţhāti pi.|| ||

Taŋ kissa hetu?|| ||

Na hi m'ettha bhikkhave abhabbatā vuttā.|| ||

Yāni kho tāni sikkhāpadāni ādibrahmacariyikāni buhmacariyasāruppāni,||
tattha dhuvasīlo ca hoti||
ţhitasīli ca||
samādāya sikkhati sikkhāpadesu.|| ||

So āsavānaŋ khayā anāsavaŋ||
cetā-vimuttiŋ||
paññā-vimuttiŋ||
diţţhe va dhamme sayaŋ abhiññā sacchikatvā||
upasampajja viharati.|| ||

Iti kho bhikkhave padesaŋ padesakārī ārādheti||
paripūraŋ paripūrakārī.|| ||

Avañjhāni tvevāhaŋ bhikkhave sikkhāpadāni vadāmī ti.|| ||

 


[ed1] See the Outline comparing Suttas 85-86-87.

 


Contact:
E-mail
Copyright Statement   Webmaster's Page