Aṅguttara Nikāya


[Home]  [Sutta Indexes]  [Glossology]  [Site Sub-Sections]


 

Aṅguttara Nikāya
Catukka Nipāta
XIX: Yodhajīva Vagga

Sutta 184

Jāṇussonī Suttaṃ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[173]

[1][pts][than] Evaṃ me sutaṃ:|| ||

Ekaṃ samayaṃ Bhagavā Sāvatthiyaṃ viharati.|| ||

Atha kho Jāṇussonī brāhmaṇo yena Bhagavā ten'upasaṅkami.|| ||

Upasaṅkamitvā Bhagavatā saddhiṃ sammodī.|| ||

Sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||

Eka-m-antaṃ nisinno kho Jāṇussonī brāhmaṇo Bhagavantaṃ etad avoca:|| ||

"Ahaṃ hi bho Gotama evaṃ-vādī evaṃ-diṭṭhi:|| ||

'N'atthi yo so maraṇa-dhammo samāno na bhāyati||
na santāsaṃ āpajjati maraṇassā' ti.|| ||

"Atthi brāhmaṇa maraṇa-dhammo samāno bhāyati,||
santāsaṃ āpajjati maraṇassa.|| ||

 

§

 

Atthi pana brāhmaṇa maraṇa-dhammo samāno na bhāyati,||
na santāsaṃ āpajjanati maraṇassa.|| ||

2. Katamo ca brāhmaṇa maraṇa-dhammo samāno bhāyati,||
santāsaṃ āpajjati maraṇassa?|| ||

Idha brāhmaṇa ekacco kāmesu avīta-rāgo hoti avigata- [174] chando avigata-pemo avigata-pipāso avigata-pariḷāho avigata-taṇho,||
tam enaṃ aññataro gāḷho rogātaṅko phusati.|| ||

Tass aññatarena gāḷhena rogātaṅkena phuṭṭhassa evaṃ hoti:

Piyā vata maṃ kāmā jahissanti,||
piye vāhaṃ kāme jahissāmī ti.|| ||

So socati kilamati paridevati uratthalaṃ kandati sammohaṃ āpajjati.|| ||

Ayaṃ pi kho brāhmaṇa maraṇa-dhammo samāno bhāyati,||
santāsaṃ āpājjati maraṇassa.|| ||

3. Puna ca paraṃ brāhmaṇa idh'ekacco kāye avīta-rāgo hoti avigata-chando avigata-pemo avigata-pipāso avigata-pariḷāho avigata-taṇho||
tam enaṃ aññataro gāḷho rogātaṅko phusati.|| ||

Tass aññatarena gāḷhena rogātaṅkena phuṭṭhassa evaṃ hoti:

Piyā vata maṃ kāmā jahissanti,||
piye vāhaṃ kāme jahissāmī ti.|| ||

So socati kilamati paridevati uratthalaṃ kandati sammohaṃ āpajjati.|| ||

Ayam pi kho brāhmaṇa maraṇa-dhammo samāno bhāyati,||
santāsaṃ āpajjati maraṇassa.|| ||

4. Puna ca paraṃ brāhmaṇa idh'ekacco akata-kalyāṇo hoti akata-kusalo akata-bhīruttāṇo||
kata-pāpo kata-luddo kata-kibbiso,||
tam enaṃ aññataro gāḷho rogātaṅko phusati.|| ||

Tass aññatarena gāḷhena rogātaṅkena phuṭṭhassa evaṃ hoti:

Akataṃ vata me kalyāṇaṃ,||
akataṃ kusalā,||
akataṃ hīruttāṇaṃ||
kataṃ pāpaṃ,||
kataṃ luddaṃ,||
kataṃ kibbisaṃ.|| ||

Yāvatā bho akata-kalyāṇānaṃ akata-kusalānaṃ akata-bhīruttāṇānaṃ kata-pāpānaṃ kata-luddānaṃ kata-kibbisānaṃ gati,||
taṃ gatiṃ pecca gacchāmī ti.|| ||

So socati kilamatī paridevati uratthalaṃ kandati sammohaṃ āpajjati.|| ||

Ayam pi kho brāhmaṇa maraṇa-dhammo samāno bhāyati,||
santāsaṃ āpajjati maraṇassa.|| ||

5. Puna ca paraṃ brāhmaṇa idh'ekacco kaṅkhī hoti vecikicchi aniṭṭhaṅ-gato Sad'Dhamme,||
tam enaṃ aññataro gāḷho rogātaṅko phusati.|| ||

Tass aññatarena gāḷhena rogātaṅkena phuṭṭhassa evaṃ hoti:

Kaṅkhī vat'amhi vecikicchi aniṭṭhaṅ-gato Sad'Dhamme ti.|| ||

So socati kilamati paridevati uratthalaṃ kandati sammohaṃ āpajjati.|| ||

Ayam pi kho brāhmaṇa maraṇa-dhammo samāno bhāyati,||
santāsaṃ āpajjati maraṇassa.|| ||

Ime kho brāhmaṇa cattāro maraṇa-dhammā samānā bhāyani santāsaṃ āpajjanti maraṇassa.|| ||

 

§

 

[175] Katamo ca brāhmaṇa maraṇa-dhammo samāno na bhāyati,||
na santāsaṃ āpajjati maraṇassa?|| ||

6. Idha brāhmaṇa ekacco kāmesu vīta-rāgo hoti vigata-c-chando vigata-pemo vigata-pipāso vigata-pariḷāgo vigata-taṇho,||
tam enaṃ aññataro gāḷho rogātaṅko phusati.|| ||

Tass aññatarena gāḷhena rogātaṅkena phuṭṭhassa na evaṃ hoti:

Piyā vata maṃ kāmā jahissanti,||
piye vāhaṃ kāme jahissāmī ti.|| ||

So na socati na kilamati na paridevati na uratthalaṃ kandati na sammohaṃ āpajjati.|| ||

Ayaṃ pi kho brāhmaṇa maraṇa-dhammo samāno na bhāyati,||
na santāsaṃ āpajjati maranassa.|| ||

7. Puna ca paraṃ brāhmaṇa idh'ekacco kāye terāgo hoti vigata-c-chando vigata-pemo vigata-pipāso vigata-pariḷāho vigata-taṇho,||
tam enaṃ aññataro gāḷho rogātaṅko phusati.|| ||

Tass aññatarena gāḷhena rogātaṅkena phuṭṭhassa na evaṃ hoti:

Piyo vata maṃ kāyo jahi'ssati,||
piyaṃ vāhaṃ kāyaṃ jahissāmī ti.|| ||

So na socati na kilamati na paridevati na uratthalaṃ kandati na sammohaṃ āpajjati.|| ||

Ayam pi kho brāhmaṇa maraṇa-dhammo samāno na bhāyati,||
na santāsaṃ āpajjati maraṇassa.|| ||

8. Puna ca paraṃ brāhmaṇa idh'ekacco akata-pāpo hoti akata-luddo,||
akata-kibbiso||
kata-kalyāṇo hoti kata-kusalo kata-hīruttāṇo,||
tam enaṃ aññataro gāḷho rogātaṅko phusati.|| ||

Tass aññatarena gāḷhena rogātaṅkena phuṭṭhassa evaṃ hoti:

Akataṃ vata me pāpaṃ,||
akataṃ luddaṃ,||
akataṃ kibbisaṃ,||
kataṃ kalyāṇaṃ,||
kataṃ kusalaṃ,||
kataṃ bhīruttāṇaṃ.|| ||

Yāvatā bho akata-pāpānaṃ akata-luddānaṃ akatabbisānaṃ kata-kalyāṇānaṃ kata kusalānaṃ kata-bhīruttāṇānaṃ gati taṃ gatiṃ pecca gacchāmi ti.|| ||

So na socati na kilamati na paridevati na uratthalaṃ kandati na sammohaṃ āpajjati.|| ||

Ayam pi kho brāhmaṇa maraṇa-dhammo samāno na bhāyati na santāsaṃ āpajjati maraṇassa.|| ||

9. Puna ca paraṃ brāhmaṇa idh'ekacco akaṅkhī hoti avecikicchi niṭṭhaṅ-gato Sad'Dhamme,||
tam enaṃ aññataro gāḷho rogātaṅko phusati.|| ||

Tass aññatarena gāḷhena rogātaṅkena phuṭṭhassa evaṃ hoti:||
akaṅkhi vat'amhi avecikicchi niṭṭhaṃ-gato Sad'Dhamme ti.|| ||

So na socati na kilamati||
na paridevati||
na uratthalaṃ kandati||
na sammohaṃ āpajjati.|| ||

[176] Ayam pi kho brāhmaṇa maraṇa-dhammo samāno||
na bhāyati,||
na santāsaṃ āpajjati maraṇassa.|| ||

Ime kho brāhmaṇa cattāro maraṇa-dhammā samānā||
na bhāyanti,||
na santāsaṃ āpajjati maraṇassāti.|| ||

 

§

 

Abhikkantaṃ bho Gotama!|| ||

Abhikkantaṃ bho Gotama!|| ||

Seyyathā pi bho Gotama,||
nikkujjitaṃ vā ukkujjeyya,||
paṭi-c-channaṃ vā vivareyya,||
muḷhassa vā Maggaṃ ācikkheyya,||
andha-kāre vā tela-pajjotaṃ dhāreyya cakkhu-manto rūpāni dakkhintī ti,||
evam eva bhotā Gotamena aneka-pariyāyena dhammo pakāsito.|| ||

Es'āhaṃ Bhagavantaṃ Gotamaṃ saraṇaṃ gacchāmi dhammaṃ ca bhikkhu-saṅghaṃ ca.|| ||

Upāsakaṃ maṃ bhavaṃ Gotamo dhāretu ajja-t-agge pāṇupetaṃ saraṇaṃ gatan ti.|| ||

 


Contact:
E-mail
Copyright Statement