Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as Mobile (āīūŋńñţđņļ). Alternatives:
[ ASCII (aiumnntdnl) | IAST Unicode (āīūṃṅñṭḍṇḷ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
XX: Mahā Vagga

Sutta 200

Pema Suttaŋ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts][than] Evaŋ me sutaŋ:|| ||

Ekaŋ samayaŋ Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuŋ.|| ||

Bhagavā etad avoca:|| ||

Cattār'imāni bhikkhave jāyanti.||
Katamāni cattāri?|| ||

Pemā pemaŋ jāyati.||
Pemā doso jāyati.||
Dosā pemaŋ jāyati.||
Dosā doso jāyati.|| ||

2. Kathañ ca bhikkhave pemā pemaŋ jāyati?|| ||

Idha, bhikkhave, puggalo puggalassa iţţho hoti kanto manāpo.||
Taŋ pare iţţhena kantena manāpena samudācaranti.||
Tass'evaŋ hoti:||
yo kho myāyaŋ puggalo iţţho kanto manāpo hoti||
taŋ pare iţţhena kantena manāpena samūdācarantī ti||
so tesu pemaŋ janeti.|| ||

Evaŋ kho bhikkhave pemā pemaŋ jāyati.|| ||

3. Kathañ ca bhikkhave pemā doso jāyati?|| ||

Idha, bhikkhave, puggalo puggalassa iţţho hoti kanto manāpo. Taŋ pare aniţţhena akantena amanāpena samudācaranti. Tass'evaŋ hoti: yo kho myāyaŋ puggalo iţţho kanto manāpo, taŋ pare aniţţhena akantena amanāpena samudācarantīti.||
So tesu dosaŋ janeti.|| ||

Evaŋ kho bhikkhave pemā doso jāyati.|| ||

Kathañ ca bhikkhave dosā pemaŋ jāyati?|| ||

Idha, bhikkhave, puggalo puggalassa aniţţho hoti akanto amanāpo. Taŋ pare aniţţhena akantena amanāpena samūdācaranti. Tass'evaŋ hoti: yo kho myāyaŋ puggalo aniţţho akanto amanāpo, taŋ pare aniţţhena akantena amanāpena samudācarantīti||
so tesu pemaŋ janeti.|| ||

Evaŋ kho bhikkhave dosā pemaŋ jāyati.|| ||

5. Kathañ ca bhikkhave dosā doso jāyati?|| ||

Idha, bhikkhave, puggalo puggalassa aniţţho hoti akanto [214] amanāpo taŋ pare iţţhena kantena manāpena samūdācaranti. Tass'evaŋ hoti: yo kho myāyaŋ puggalo aniţţho akanto amanāpo, taŋ pare iţţhena kantena manāpena samudācarantiti.||
So tesu dosaŋ janeti.|| ||

Evaŋ kho bhikkhave dosā doso jāyati.|| ||

Imāni kho bhikkhave cattāri jāyanti.|| ||

6. Yasmiŋ bhikkhave samaye bhikkhu vivicc'eva kāmehi vivicca akusalehi dhammehi savitakkaŋ savicāraŋ vivekajaŋ pīti-sukhaŋ paţhamaŋ-jhānaŋ||
upasampajja viharati,||
yaŋ pi'ssa pemā pemaŋ jāyati,||
tam pi'ssa tasmiŋ samaye na hoti.||
Yo pi'ssa pemā doso jāyati,||
so pi'ssa tasmiŋ samaye na hoti.||
Yo pi'ssa pemā doso jāyati,||
so pi'ssa tasmiŋ samaye na hoti.||
Yam pi'ssa dosā pemaŋ jāyati,||
tam pi'ssa tasmiŋ samaye na hoti.||
Yo pi'ssa dosā doso jāyati,||
so pi'ssa tasmiŋ samaye na hoti.|| ||

7. Yasmiŋ bhikkhave samaye bhikkhu vitakka vicāranaŋ vūpasamā ajjhattaŋ sampasādanaŋ cetaso ekodi-bhāvaŋ avitakkaŋ avicāraŋ samādhijaŋ pīti-sukhaŋ dutiyaŋ-jhānaŋ||
upasampajja pemaŋ viharati,||
yam pi'ssa pemā pemaŋ jāyati.||
Tam pi'ssa tasmiŋ samaye na hoti.||
Yo pi'ssa pemā doso jāyati,||
so pi'ssa tasmiŋ samaye na hoti.||
Yam pi'ssa dosā pemaŋ jāyati,||
tam pi'ssa tasmiŋ samaye na hoti.||
Yo pi'ssa dosā doso jāyati,||
so pi'ssa tasmiŋ samaye na hoti.|| ||

8. Yasmiŋ bhikkhave samaye bhikkhu vitakka vicāranaŋ vūpasamā ajjhattaŋ sampasādanaŋ cetaso ekodi-bhāvaŋ avitakkaŋ avicāraŋ samādhijaŋ pīti-sukhaŋ tatiyaŋ-jhānaŋ||
upasampajja pemaŋ viharati,||
yam pi'ssa pemā pemaŋ jāyati.||
Tam pi'ssa tasmiŋ samaye na hoti.||
Yo pi'ssa pemā doso jāyati,||
so pi'ssa tasmiŋ samaye na hoti.||
Yam pi'ssa dosā pemaŋ jāyati.||
tam pi'ssa tasmiŋ samaye na hoti.||
Yo pi'ssa dosā doso jāyati,||
so pi'ssa tasmiŋ samaye na hoti.|| ||

Yasmiŋ bhikkhave samaye bhikkhu vitakka vicāranaŋ vūpasamā ajjhattaŋ sampasādanaŋ cetaso ekodi-bhāvaŋ avitakkaŋ avicāraŋ samādhijaŋ pīti-sukhaŋ catutthaŋ-jhānaŋ||
upasampajja pemaŋ viharati,||
yam pi'ssa pemā pemaŋ jāyati.||
Tam pi'ssa tasmiŋ samaye na hoti.||
Yo pi'ssa pemā doso jāyati,||
so pi'ssa tasmiŋ samaye na hoti.||
Yam pi'ssa dosā pemaŋ jāyati.||
tam pi'ssa tasmiŋ samaye na hoti.||
Yo pi'ssa dosā doso jāyati,||
so pi'ssa tasmiŋ samaye na hoti.|| ||

Yasmiŋ bhikkhave samaye bhikkhu āsavānaŋ khayā anāsavaŋ ceto-vimuttiŋ paññā-vimuttiŋ diţţhe va dhamme sayaŋ abhiññā sacchikatvā||
upasampajja viharati,||
yam pi'ssa pemā pemaŋ jāyati,||
tam pi'ssa pahīnaŋ hoti.||
Ucchinnamūlaŋ tāla-vatthu-kataŋ anabhāvakataŋ āyatiŋ anuppādadhammaŋ.||
Yo pi'ssa pemā doso jāyati||
so pi'ssa pahīņo hoti,||
ucchinnamūlo tālāvatthukato anabhāvakato āyatiŋ anuppādadhammo.||
Yam pi'ssa dosā pemaŋ jāyati,||
tam pi'ssa pahīnaŋ hoti,||
ucchinnamūlaŋ tāla-vatthu-kataŋ anabhāvakataŋ anuppādadhammaŋ.||
Yo pi'ssa dosā doso jāyati,||
so pi'ssa pahīņo hoti ucchinnamūlo tālāvatthukato anabhāvakato āyatiŋ anuppādadhammo.|| ||

Ayaŋ vuccati bhikkhave bhikkhu nevusseneti nappaţisseneti na dhūpāyani na pajjalati na apajjhāyati.|| ||

9. Kathañ ca bhikkhave bhikkhu usseneti?|| ||

Idha, bhikkhave, bhikkhu rūpaŋ attato samanupassati,||
rūpavantaŋ vā attānaŋ,||
attani vā rūpaŋ,||
rūpasmiŋ vā attānaŋ.|| ||

Vedanaŋ attato samanupassati,||
[215] vedanāvantaŋ vā attānaŋ||
attani vā vedanaŋ,||
vedanāya vā attānaŋ.|| ||

Saññaŋ attato samanupassati,||
saññāvantaŋ vā attānaŋ,||
attani vā saññaŋ,||
saññāya vā attānaŋ.|| ||

Saŋkhāre attato samanupassati,||
saŋkhāravantaŋ vā attānaŋ,||
attani vā saŋkhāre,||
saŋkhāresu vā attānaŋ.|| ||

Viññāņaŋ attato samanupassati,||
viññāņavantaŋ vā attānaŋ,||
attani vā viññāņaŋ,||
viññāņasmiŋ vā attānaŋ.|| ||

Evaŋ kho bhikkhave bhikkhu usseneti.|| ||

10. Kathañ ca bhikkhave bhikkhu na usseneti?|| ||

Idha, bhikkhave, bhikkhu na rūpaŋ attato samanupassati,||
na rūpavantaŋ vā attānaŋ,||
na attani vā rūpaŋ,||
na rūpasmiŋ vā attānaŋ.|| ||

Na vedanaŋ attato samanupassati,||
na vedanāvantaŋ vā attānaŋ,||
na attani vā vedanaŋ,||
na vedanāya vā attānaŋ.|| ||

Na saññaŋ attato samanupassati,||
na saññāvantaŋ vā attānaŋ,||
na attani vā saññaŋ,||
na saññāya vā attānaŋ.|| ||

Na saŋkhāre attato samanupassati,||
na saŋkāravantaŋ vā attānaŋ,||
na attani vā saŋkhāre,||
na saŋkhāresu vā attānaŋ.|| ||

Na viññāņaŋ attato samanupassati,||
na viññāņavantaŋ vā attānaŋ,||
na attani vā viññāņaŋ,||
na viññāņasmiŋ vā attānaŋ.|| ||

Evaŋ kho bhikkhave bhikkhu na usseneti.|| ||

11. Kathañ ca bhikkhave bhikkhu paţisseneti?|| ||

Idha, bhikkhave, bhikkhu akkosantaŋ paccakkosati,||
rosantaŋ paţirosati,||
bhaņđantaŋ paţibhaņđati.|| ||

Evaŋ kho bhikkhave bhikkhu paţisseneti.|| ||

12. Kathañ ca bhikkhave bhikkhu na paţisseneti?|| ||

Idha, bhikkhave, bhikkhu akkosantaŋ na paccakkosati,||
rosantaŋ na paţirosati,||
bhaņđantaŋ na paţibhaņđati.|| ||

Evaŋ kho bhikkhave bhikkhu na paţisseneti.|| ||

13. Kathañ ca bhikkhave bhikkhu dhūpāyati?|| ||

Asmīti bhikkhave sati||
itthasmīti hoti,||
evasmīti hoti,||
aññathasmīti hoti,||
asasmīti hoti,||
satasmīti hoti,||
santi hoti,||
itthaŋ santi hoti,||
evaŋ santi hoti,||
aññathā santi hoti,||
api ha santi hoti,||
api itthaŋ santi hoti,||
api evaŋ santi hoti,||
api aññathā santi hoti,||
bhavissanti hoti,||
itthaŋ bhavissanti hoti,||
evaŋ bhavissanti hoti,||
aññathā bhavissanti hoti.|| ||

Evaŋ kho bhikkhave bhijhu dhūpāyati.|| ||

14. Kathañ ca bhikkhave bhikkhu na dhūpāyati?|| ||

Asmīti bhikkhave asati||
itthasmīti na hoti,||
aññathasmīti na hoti,||
asasmīti na hoti,||
satasmīti na hoti,||
santi na hoti,||
itthaŋ santi na hoti,||
evaŋ santi na hoti,||
aññathā santi na hoti,||
apiha santi na hoti,||
api itthaŋ santi na hoti,||
api evaŋ santi na hoti,||
api aññathā [216] santi na hoti,||
bhavissanti na hoti,||
itthaŋ bhavissanti na hoti,||
eva bhavissanti na hoti,||
aññathā bhavissanti na hoti.|| ||

Evaŋ kho bhikkhave bhikkhu na dhūpāyati.|| ||

15. Kathañ ca bhikkhave bhikkhu pajjalati?|| ||

Iminā asmīti bhikkhave sati||
iminā itthasmīti hoti,||
iminā evasmīti hoti||
iminā aññathasmīti hoti,||
iminā asasmīti hoti,||
iminā satasmīti hoti,||
iminā santi hoti,||
iminā itthaŋ santi hoti,||
iminā evaŋ santi santi hoti,||
iminā apiha santi hoti,||
iminā aññathā santi hoti,||
iminā apiha santi hoti,||
iminā api itthaŋ santi hoti,||
iminā api evaŋ santi hoti,||
iminā api aññathā santi hoti,||
iminā bhavissanti hoti,||
iminā itthaŋ bhavissanti hoti,||
iminā evaŋ bhavissanti hoti,||
iminā aññathā bhavissanti hoti.|| ||

Evaŋ kho bhikkhave bhikkhu pajjalati.|| ||

16. Kathañ ca bhikkhave bhikkhu na pajjalati?|| ||

Iminā asmīti bhikkhave asati||
iminā itsmīti na hoti,||
iminā evasmīti na hoti,||
iminā aññathasmīti na hoti,||
iminā asasmīti na hoti,||
iminā satasmīti na hoti,||
iminā santi na hoti,||
iminā itthaŋ santi na hoti,||
iminā evaŋ santi na hoti,||
iminā aññathā santi na hoti,||
iminā apiha santi na hoti,||
iminā api itthaŋ santi na hoti,||
iminā api evaŋ santi na hoti,||
iminā api aññathā santi na hoti,||
iminā bhavassanti na hoti,||
iminā itthaŋ bhavissanti na hoti,||
iminā evaŋ bhavissanti na hoti,||
iminā aññathā bhavissanti na hoti.|| ||

Evaŋ kho bhikkhave bhikkhu na pajjalati.|| ||

17. Kathañ ca bhikkhave bhikkhu pajjhāyati?|| ||

Idha, bhikkhave, bhikkhuno asmimāno pahīņo na hoti,||
ucchinnamūlo tālāvatthukato anabhāvakato āyatiŋ uppādadhammo.|| ||

Evaŋ bhikkhave bhikkhu pajjhāyati.|| ||

Kathañ ca bhikkhave bhikkhu na pajjhāyati?|| ||

Idha, bhikkhave, bhikkhuno asmimāno pahīņo hoti,||
ucchinnamūlo tālāvatthukato anabhāvakato āyatiŋ anuppādadhammo.|| ||

Evaŋ kho bhikkhave bhikkhu na pajjhāyatī ti.|| ||

MAHĀVAGGO PAÑCAMO

 


Contact:
E-mail
Copyright Statement   Webmaster's Page