Aṅguttara Nikāya


[Home]  [Sutta Indexes]  [Glossology]  [Site Sub-Sections]


 

Aṅguttara Nikāya
X. Dasaka-Nipāta
XI: Samaṇa-Saññā-Vagga

Sutta 104

Bīja Suttaṃ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than] Evaṃ me sutaṃ:|| ||

Ekaṃ samayaṃ Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṃ.|| ||

Bhagavā etad avoca:|| ||

"Micchā-diṭṭhikassa bhikkhave purisa puggalassa micchā saṃkappassa||
- micchā vācassa||
- micchā kammantassa||
- micchā ājīvassa||
- micchā vāyāmassa||
- micchā satissa||
- micchā samādhissa||
- micchā ñāṇissa||
- micchā vimuttissa||
yañ c'eva kāya-kammaṃ yathā diṭṭhi samattaṃ samādinnaṃ,||
yañ ca vacī-kammaṃ yathā diṭṭhi samattaṃ samādinnaṃ||
yañ ca mano-kammaṃ yathā diṭṭhi samattaṃ samādinnaṃ,||
yā ca cetanā yā ca patthanā,||
yo ca paṇidhi,||
ye ca saṅkhārā,||
sabbe te dhammā,||
aniṭṭhāya akantāya amanāpāya ahitāya dukkhāya saṃvaṭṭanti.|| ||

Taṃ kissa hetu?|| ||

Diṭṭhi hi bhikkhave pāpikā.|| ||

Seyyathā pi, bhikkhave, nimbabījaṃ vā kosātakī bījaṃ tittakālābu bījaṃ vā allāya paṭhaviyā nikkhittaṃ [213] yañ c'eva paṭhavirasaṃ upādiyati.|| ||

Yañ ca āporasaṃ upādiyati.|| ||

Sabbaṃ taṃ tittakattāya kaṭukattāya asātattāya saṃvaṭṭanti.|| ||

Taṃ kissa hetu?|| ||

Bījaṃ hi bhikkhave pāpakaṃ.|| ||

Evam eva kho bhikkhave micchā-diṭṭhikassa purisa puggalassa||
- micchā saṃkappassa||
- micchā vācassa||
- micchā kammantassa||
- micchā ājīvassa||
- micchā vāyāmassa||
- micchā satissa||
- micchā samādhissa||
- micchā ñāṇissa||
- micchā vimuttissa||
yañ c'eva kāya-kammaṃ yathā diṭṭhi samattaṃ samādinnaṃ,||
yañ ca vacī-kammaṃ yathā diṭṭhi samattaṃ samādinnaṃ||
yañ ca mano-kammaṃ yathā diṭṭhi samattaṃ samādinnaṃ,||
yā ca cetanā yā ca patthanā,||
yo ca paṇidhi,||
ye ca saṅkhārā,||
sabbe te dhammā,||
aniṭṭhāya akantāya amanāpāya ahitāya dukkhāya saṃvaṭṭanti.|| ||

Taṃ kissa hetu?|| ||

Diṭṭhi hi bhikkhave pāpikā.|| ||

 

§

 

Sammā-diṭṭhikassa bhikkhave purisa-puggalassa||
- sammā saṃkappassa||
- sammā vācassa||
- sammā kammantassa||
- sammā ājīvassa||
- sammā vāyāmassa||
- sammā satissa||
- sammā samādhissa||
- sammā ñāṇissa||
- sammā vimuttissa||
yañc'eva kāya-kammaṃ yathā diṭṭhi samattaṃ samādinnaṃ,||
yañ ca vacī-kammaṃ yathā diṭṭhi samattaṃ samādinnaṃ||
yañ ca mano-kammaṃ yathā diṭṭhi samattaṃ samādinnaṃ,||
yā ca cetanā,||
yā ca patthanā yo ca paṇidhi,||
ye ca saṅkhārā sabbe te dhammā iṭṭhāya kantāya manāpāya hitāya sukhāya saṃvaṭṭanti.|| ||

Taṃ kissa hetu?|| ||

Diṭṭhi hi bhikkhave bhaddikā.|| ||

Seyyathā pi, bhikkhave,||
ucchubījaṃ vā sā'i bījaṃ vā muddikā bījaṃ vā allāya paṭhaviyā nikkhittaṃ yañ c'eva paṭhavirasaṃ upādiyati,||
yañ ca āporasaṃ upādiyati,||
sabbaṃ taṃ sātattāya madhurattāya asecanakattāya saṃvaṭṭati.|| ||

Taṃ kissa hetu?|| ||

Bījaṃ hi bhikkhave bhaddakaṃ.|| ||

Evam eva kho bhikkhave||
sammā diṭṭhikassa purisa-puggalassa||
sammā saṃkappassa||
- sammā vācassa||
- sammā kammantassa||
- [214] sammā ājīvassa||
- sammā vāyāmassa||
- sammā satissa||
- sammā samādhissa||
- sammā ñāṇassa||
- sammā vimuttissa||
yañ c'eva kāya-kammaṃ yathā diṭṭhi samattaṃ samādinnaṃ,||
yañ ca vacī-kammaṃ yathā diṭṭhi samattaṃ samādinnaṃ||
yañ ca mano-kammaṃ yathā diṭṭhi samattaṃ samādinnaṃ,||
yā ca cetanā,||
yā ca patthanā||
yo ca paṇidhi,||
ye ca saṅkhārā||
sabbe te dhammā iṭṭhāya kantāya manāpāya hitāya sukhāya saṃvaṭṭanti.|| ||

Taṃ kissa hetu?|| ||

Diṭṭhi hi bhikkhave bhaddikā" ti.|| ||

 


Contact:
E-mail
Copyright Statement