Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as Mobile (āīūŋńñţđņļ). Alternatives:
[ ASCII (aiumnntdnl) | IAST Unicode (āīūṃṅñṭḍṇḷ) | Velthuis (aaiiuu.m'n~n.t.d.n.l) ]

 

Aŋguttara Nikāya
Ekādasako Nipāto

Sutta 78

Adapted from the 1995 edition of the digital version of the Sri Lanka Buddha Jayanti Tripitaka Series.

Aniccānupassanā Suttaŋ

Ekādasahi bhikkhave aŋgehi samannāgato gopālako abhabbo gogaņaŋ Pariharituŋ phātikatuŋ, katamehi ekādasahi: idha bhikkhave gopālako na Rūpaññu hoti, na lakkhaņa kusalo hoti, na āsāţikaŋ sāţetā hoti, na Vaņaŋ paţicchādetā hoti, na dhūmaŋ kattā hoti, na titthaŋ jānāti, na pītaŋ Jānāti, na vīthiŋ jānāti, na gocarakusalo hoti, anavasesadohi ca Hoti, ye te usabhā gopitaro goparināyakā te na atirekapūjāya Pūjetā hoti, imehi kho bhikkhave ekādasahi aŋgehi samannāgato Gopālako abhabbo gogaņaŋ pariharituŋ phātikatuŋ.|| ||

Evam eva kho bhikkhave ekādasahi dhammehi samannāgato bhikkhu abhabbo Saddesu aniccānupassī viharituŋ.|| ||

Katamehi ekādasahi:

Idha, bhikkhave, bhikkhu na rūpaññū hoti. Na lakkhaņakusalo hoti, na āsāţikaŋ sāţetā hoti, na vaņaŋ paţicchādetā hoti, na dhūmaŋ kattā hoti, na titthaŋ jānāti, na pītaŋ jānāti, na gocarakusalo hoti. Anavasesadohī ca hoti. Ye te bhikkhu therā rattaññū cirapabbajitā saŋghapitaro saŋghaparināyakā te na atireka pūjāya pūjetā hoti.|| ||

1. Kathañ ca bhikkhave bhikkhu na rūpaññū hoti: idha bhikkhave bhikkhu yaŋ kiñci rūpaŋ sabbaŋ taŋ rūpaŋ cattāri mahābhūtāni catunnañca mahābhūtānaŋ upādāya rūpanti yathābhūtaŋ nappajānāti. Evaŋ kho bhikkhave bhikkhū na rūpaññū hoti.|| ||

2. Kathañ ca bhikkhave bhikkhu na lakkhaņakusalo hoti: idha bhikkhave bhikkhu, kamma lakkhaņo bālo, kammalakkhaņo paņđito'ti yathābhūtaŋ nappajānāti. Evaŋ kho bhikkhave bhikkhu na lakkhaņakusalo hoti.|| ||

3. Kathañ ca bhikkhave bhikkhu na āsāţikaŋ sāţetā hoti: idha bhikkhave bhikkhu uppannaŋ kāmavitakkaŋ adhivāseti nappajahati vinodeti na byantīkaroti na anabhāvaŋ gameti. Uppannaŋ vyāpādavitakkaŋ adhivāseti nappajahati na vinodeti na byantīkaroti na anabhāvaŋ gameti. Uppannaŋ vihiŋsāvitakkaŋ adhivāseti nappajahati na vinodeti na byantīkaroti, na anabhāvaŋ gameti. Uppannūppanne pāpake akusale dhamme adhivāseti nappajahati na vinodeti na byantīkaroti na anabhāvaŋ gameti. Evaŋ kho bhikkhave bhikkhu na āsāţikaŋ sāţetā hoti.|| ||

4. Kathañ ca bhikkhave bhikkhu na vaņaŋ paţicchādetā hoti: idha bhikkhave bhikkhu cakkhunā rūpaŋ disvā nimittaggāhī hoti anubyañjanaggāhī, 'yatvādhikaraņame taŋ cakkhundriyaŋ asaŋvutaŋ viharantaŋ abhijjhā domanassā pāpakā akusalā dhammā anvāssaveyyuŋ, tassa saŋvarāya na paţipajjati, na rakkhati cakkhundriyaŋ, cakkhundriye na saŋvaraŋ āpajjati.|| ||

Sotena saddaŋ sutvā nimittaggāhī hoti anubyañjanaggāhī, 'yatvādhikaraņame taŋ sotindriyaŋ asaŋvutaŋ viharantaŋ abhijjhā domanassā pāpanā akusalā dhammā anvāssaveyyuŋ, tassa saŋvarāya na paţipajjati, na rakkhati sotindriyaŋ, sotindriye na saŋvaraŋ āpajjati.|| ||

Ghānena gandhaŋ ghāyitvā nimittaggāhī hoti anubyañjanaggāhī, 'yatvādhikaraņame taŋ ghānindriyaŋ asaŋvutaŋ viharantaŋ abhijjhā domanassā pāpanā akusalā dhammā anvāssaveyyuŋ, tassa saŋvarāya na paţipajjati, na rakkhati ghānindriyaŋ, ghānindriye na saŋvaraŋ āpajjati.|| ||

Jivhāya rasaŋ sāyitvā nimittaggāhī hoti anubyañjanaggāhī, 'yatvādhikaraņame taŋ1 jivhindriyaŋ asaŋvutaŋ viharantaŋ abhijjhā domanassā pāpanā akusalā dhammā anvāssaveyyuŋ, tassa saŋvarāya na paţipajjati, na rakkhati jivhindriyaŋ, jivhindriye na saŋvaraŋ āpajjati.|| ||

Kāyena phoţţhabbaŋ phusitvā nimittaggāhī hoti anubyañjanaggāhī, 'yatvādhikaraņame taŋ1 kāyendriyaŋ asaŋvutaŋ viharantaŋ abhijjhā domanassā pāpanā akusalā dhammā anvāssaveyyuŋ, tassa saŋvarāya na paţipajjati, na rakkhati kāyindriyaŋ, kāyindriye na saŋvaraŋ āpajjati.|| ||

Manasādhammaŋ viññāya nimittaggāhī hoti anubyañjanaggāhī, yatvādhikaraņame taŋ manindriyaŋ asaŋvutaŋ viharantaŋ abhijjhā domanassā pāpakā akusalādhammā anvāssaveyyuŋ, tassa saŋvarāya na paţipajjati, na rakkhati, manindriyaŋ manindriye saŋvaraŋ nāpajjati. Evaŋ bhikkhave bhikkhu na vaņaŋ paţicchādetā hoti.|| ||

5. Kathañ ca bhikkhave bhikkhu na dhūmaŋ kattā hoti: idha bhikkhave bhikkhu na yathāsutaŋ yathāpariyan taŋ dhammaŋ vitthārena paresaŋ desetā hoti. Evaŋ kho bhikkhave bhikkhu na dhūmaŋ kattā hoti.|| ||

6. Kathañ ca bhikkhave bhikkhu na titthaŋ jānāti: idha bhikkhave bhikkhu ye te bhikkhū bahussutā āgatāgamā dhammadharā vinayadharā mātikādharā, te kālena kālaŋ upasaŋkamitvā na paripucjati, na paripañhati, 'idaŋ bhante kathaŋ, imassa ko atthoti? Tassa te āyasmanto avivaţañ c'eva na vivaranti, anuttānīkatañ ca na uttānīŋ karonti. Anekavivihitetasu ca kaŋkhaţţhānīyesu dhammesu kaŋkhaŋ na paţivinodenti. Evaŋ kho bhikkhave bhikkhu na titthaŋ jānāti.|| ||

7. Kathañ ca bhikkhave bhikkhu na pītaŋ jānāti: idha bhikkhave bhikkhu Tathāgatappavedite dhamma-vinaye desiyamāne na labhati atthavedaŋ, na labhati dhammavedaŋ, na labhati dhammūpasaŋhitaŋ pāmujjaŋ. Evaŋ kho bhikkhave bhikkhu na pītaŋ jānāti.|| ||

8. Kathañ ca bhikkhave bhikkhu na vīthiŋ jānāti: idha bhikkhave bhikkhu ariyaŋ aţţhaŋgikaŋ maggaŋ yathābhūtaŋ nappajānāti. Evaŋ kho bhikkhave bhikkhu na vīthiŋ jānāti.|| ||

9. Kathañ ca bhikkhave bhikkhu na gocarakusalo hoti: idha bhikkhave bhikkhu cattāro satipaţţhāne yathābhūtaŋ nappajānāti. Evaŋ kho bhikkhave bhikkhu na gocarakusalo hoti.|| ||

10. Kathañ ca bhikkhave bhikkhu anavasesadohī hoti: idha bhikkhave Bhikkhuŋ saddhā gahapatikā abhihaţţhuŋ pavārenti Cīvarapiņđapātasenāsanagilānapaccayabhesajjaparikkhārena. Tatra bhikkhu mattaŋ na Jānāti paţiggahanāya, evaŋ kho bhikkhave bhikkhu anavasesadohī hoti.|| ||

11. Kathañ ca bhikkhave bhikkhu ye te bhikkhu therā rattaññū cirapabbajitā saŋgha pitaro saŋghaparināyakā, te na atireka pūjāya pūjetā hoti. Idha, bhikkhave, bhikkhu ye te bhikkhu therā rattaññū cirapabbajitā saŋghapitaro saŋghaparināyakā, tesu na mettaŋ kāyakammaŋ paccupaţţhāpeti āvī c'eva raho ca. Na mettaŋ vacīkammaŋ paccupaţţhāpeti āvī c'eva raho ca. Na mettaŋ manokammaŋ pacacupaţţhāpeti āvīc'eva raho ca. Evaŋ kho bhikkhave bhikkhu ye te bhikkhū therā rattaññū cirapabbajitā saŋghapitaro saŋghaparināyakā, te na atireka pūjāya pūjetā hoti. Imehi kho bhikkhave ekādasahi dhammehi samannāgato bhikkhu abhabbo saddesu aniccānupassī viharituŋ.|| ||

 


Contact:
E-mail
Copyright Statement   Webmaster's Page