Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as Mobile (āīūŋńñţđņļ). Alternatives:
[ ASCII (aiumnntdnl) | IAST Unicode (āīūṃṅñṭḍṇḷ) | Velthuis (aaiiuu.m'n~n.t.d.n.l) ]

 

Saŋyutta-Nikāya
Nidāna-vaggo

20. Opammasamyutta
Sutta 8

Kaliŋgaro Suttaŋ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][rhyc] EVAŊ ME SUTAŊ:|| ||

Ekaŋ samayaŋ Bhagavā Vesāliyaŋ viharati Mahāvane Kūţāgārasālāyaŋ.|| ||

[2] Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhu Bhagavato paccassosuŋ.|| ||

Bhagavā etad avoca:|| ||

[3] Kaliŋgarūpadhānā bhikkhave,||
etarahi Licchavī viharanti appamattā ātāpino upāsanasmiŋ.|| ||

Tesaŋ rājā Māgadho Ajātasattu Vedehi-putto na labhati otāraŋ,||
na labhati ārammaņaŋ.|| ||

[4] Bhavissanti bhikkhave,||
anāgatam addhānaŋ Licchavī sukhumālā mudutaluņahatthapādā||
te mudukā suseyyā sutūlabimbohanāsu yāva suriyuggamanā seyyaŋ kappessanti.|| ||

Tesaŋ rājā Māgadho Ajātasattu Vedehi-putto lacchati otāraŋ,||
lacchati ārammaņaŋ.|| ||

[5] Kaliŋgarūpadhānā bhikkhave,||
etarahi bhikkhū viharanti appamattā ātāpino padhānasmiŋ.|| ||

Tesaŋ Māro pāpimā na labhati otāraŋ,||
na labhati ārammaņaŋ.|| ||

[6] Bhavissanti bhikkhave,||
anāgatam addhānaŋ bhikkhū sukhumālā mudutaluņahatthapādā||
te mudukā suseyyā sutūlabimbohanāsu yāva sūriyuggamanā seyyaŋ kappessanti.|| ||

Tesaŋ Māro pāpimā lacchati otāraŋ,||
lacchati ārammaņaŋ.|| ||

[7] Tasmāt iha bhikkhave,||
evaŋ sikkhitabbaŋ:|| ||

"Kaliŋgarūpadhānā viharissāma appamattā ātāpino padhānasmin" ti.|| ||

Evaŋ hi vo bhikkhave, sikkhitabbanti.|| ||


Contact:
E-mail
Copyright Statement   Webmaster's Page