Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saṃyutta Nikāya
5. Mahā-Vagga
46. Bojjhaṅga Saṃyutta
3. Udāyi Vagga

Sutta 24

A-yoniso Suttaṃ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[84]

[1][pts][bodh] Evam me sutaṃ:|| ||

Ekaṃ samayam Bhagavā Sāvatthiyaṃ viharati Jetavane Anāthapindikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṃ.|| ||

Bhagavā etad avoca:|| ||

"A-yoniso bhikkhave, mana-sikaroto||
anuppanno c'eva kāma-c-chando uppajjati,||
uppanno ca kāma-c-chando bhiyyo-bhāvāya||
vepullāya saṃvaṭṭati.|| ||

[85] Anuppanno c'eva vyāpādo uppajjati,||
uppanno ca vyāpādo bhiyyo-bhāvāya||
vepullāya saṃvaṭṭati.|| ||

Anuppannañ c'eva thīna-middhaṃ uppajjati,||
uppannañ ca thīna-middhaṃ bhiyyo-bhāvāya||
vepullāya saṃvaṭṭati.|| ||

Anuppannañ c'eva uddhacca-kukkuccaṃ uppajjati,||
uppannañ c'eva uddhacca-kukkuccaṃ bhiyyo-bhāvāya||
vepullāya saṃvaṭṭati.|| ||

Anuppannā c'eva vicikicchā uppajjati,||
uppannā ca vicikicchā bhiyyo-bhāvāya||
vepullāya saṃvaṭṭati.|| ||

 

§

 

Anuppanno ca sati-sambojjh'aṅgo n'ūppajjati,||
uppanno ca sati-sambojjh'aṅgo nirujjhati.|| ||

Anuppanno ca dhamma-vicaya-sambojjh'aṅgo n'ūppajjati,||
uppanno ca dhamma-vicaya-sambojjh'aṅgo nirujjhati.|| ||

Anuppanno ca viriya-sambojjh'aṅgo n'ūppajjati,||
uppanno ca viriya-sambojjh'aṅgo nirujjhati.|| ||

Anuppanno ca pīti-sambojjh'aṅgo n'ūppajjati,||
uppanno ca pīti-sambojjh'aṅgo nirujjhati.|| ||

Anuppanno ca passaddhi-sambojjh'aṅgo n'ūppajjati,||
uppanno ca passaddhi-sambojjh'aṅgo nirujjhati.|| ||

Anuppanno ca samādhi-sambojjh'aṅgo n'ūppajjati,||
uppanno ca samādhi-sambojjh'aṅgo nirujjhati.|| ||

Anuppanno ca upekhā-sambojjh'aṅgo n'ūppajjati,||
uppanno ca upekhā-sambojjh'aṅgo nirujjhati.|| ||

 

§

 

Yoniso bhikkhave, mana-sikaroto||
anuppanno c'eva kāma-c-chando n'ūppajjati,||
uppanno ca kāma-c-chando pahīyati.|| ||

Anuppanno c'eva vyāpādo n'ūppajjati,||
uppanno ca vyāpādo pahīyati.|| ||

Anuppannañ c'eva thīna-middhaṃ n'ūppajjati,||
uppannañ ca thīna-middhaṃ pahīyati.|| ||

Anuppannañ c'eva uddhacca-kukkuccaṃ n'ūppajjati,||
uppannañ ca uddhacca-kukkuccaṃ pahīyati.|| ||

Anuppannā c'eva vicikicchā n'ūppajjati,||
uppannā ca vicikicchā pahīyati.|| ||

 

§

 

Anuppanno ca sati-sambojjh'aṅgo uppajjati,||
uppanno ca sati-sambojjh'aṅgo bhāvanā-pāripūriṃ gacchati.|| ||

Anuppanno ca dhamma-vicaya-sambojjh'aṅgo uppajjati,||
uppanno ca dhamma-vicaya-sambojjh'aṅgo bhāvanā-pāripūriṃ gacchati.|| ||

Anuppanno ca viriya-sambojjh'aṅgo uppajjati,||
uppanno ca viriya-sambojjh'aṅgo bhāvanā-pāripūriṃ gacchati.|| ||

Anuppanno ca pīti-sambojjh'aṅgo uppajjati,||
uppanno ca pīti-sambojjh'aṅgo bhāvanā-pāripūriṃ gacchati.|| ||

Anuppanno ca passaddhi-sambojjh'aṅgo uppajjati,||
uppanno ca passaddhi-sambojjh'aṅgo bhāvanā-pāripūriṃ gacchati.|| ||

Anuppanno ca samādhi-sambojjh'aṅgo uppajjati,||
uppanno ca samādhi-sambojjh'aṅgo bhāvanā-pāripūriṃ gacchati.|| ||

Anuppanno ca upekhā-sambojjh'aṅgo uppajjati,||
uppanno ca upekhā-sambojjh'aṅgo bhāvanā-pāripūriṃ gacchatī" ti.|| ||

 


Contact:
E-mail
Copyright Statement