Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as Velthuis (aaiiuu.m'n~n.t.d.n.l). Alternatives:
[ ASCII (aiumnntdnl) | IAST Unicode (āīūṃṅñṭḍṇḷ) ]

 

A'nguttara Nikaaya
Tika Nipaato
XII: Kesi Vagga

Sutta 113

Assaajaaniiya-patoda Sutta.m

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts][ati] Cattaarome bhikkhave bhadraa assaajaaniiyaa santo sa.mvijjamaanaa lokasmi.m.|| ||

Katame cattaaro?|| ||

Idha, bhikkhave, ekacco bhadro assaajaaniiyo patodacchaaya.m disvaa sa.mvijjati sa.mvega.m aapajjati:||
"ki.mnu kho ma.m ajja assadammasaarathii kaara.na.m kaaressati,||
kimassaaha.m patikaromii" ti.|| ||

Eva ruupopi bhikkhave idh'ekacco bhadro assaajaaniyo hoti.|| ||

Aya.m bhikkhave pa.thamo bhadro assaajaaniiyo santo sa.mvijjamaano lokasmi.m.|| ||

[2][pts][ati] Puna ca para.m bhikkhave idh'ekacco bhadro assaajaaniiyo naheva kho patodacchaaya.m disvaa sa.mvijjati sa.mvega.m aapajjati,||
api ca kho lomavedhaviddho sa.mvijjati sa.mvega.m aapajjati:||
"ki.mnu kho ma.m ajja assadammasaarathii kaara.na.m kaaressati,||
kimassaaha.m patikaremii" ti.|| ||

Evaruupopi bhikkhave idh'ekacco bhadro assaajaaniiyo hoti.|| ||

Aya.m bhikkhave dutiyo bhadro assaajaaniiyo santo sa.mvijjamaano lokasmi.m.|| ||

[3][pts][ati] Puna ca para.m bhikkhave idh'ekacco bhadro assaajaaniiyo naheva kho patodacchaaya.m disvaa sa.mvijjati sa.mvega.m aapajjati,||
napi lomavedhaviddho sa.mvijjati sa.mvega.m aapajjati.|| ||

Api ca kho cammavedhaviddho sa.mvijjati sa.mvega.m aapajjati:||
"ki.mnu kho ma.m ajja assadammasaarathii kaara.na.m kaaressati,||
kimassaaha.m patikaromii" ti.|| ||

Evaruupopi bhikkhave idh'ekacco bhadro assaajaaniiyo hoti.|| ||

Aya.m bhikkhave tatiyo bhadro assaajaaniiyo santo sa.mvijjamaano lokasmi.m.|| ||

[4][pts][ati] Puna ca para.m bhikkhave idh'ekacco bhadro assaajaaniiyo naheva kho patodacchaaya.m disvaa sa.mvijjati sa.mvega.m aapajjati,||
napi lomavedhaviddho sa.mvijjati sa.mvega.m aapajjati.|| ||

Napi cammavedhaviddho sa.mvijjati sa.mvega.m aapajjati.|| ||

Api ca kho a.t.thivedhaviddho sa.mvijjati sa.mvega.m aapajjati:||
[115] "ki.mnu kho ma.m ajja assadammasaarathii kaara.na.m kaaressati,||
kimassaaha.m patikaromii" ti.|| ||

Evaruupopi bhikkhave idh'ekacco bhadro assaajaaniiyo hoti.|| ||

Aya.m bhikkhave catuttho bhadro assaajaaniiyo santo sa.mvijjamaano lokasmi.m.|| ||

Ime kho bhikkhave cattaaro bhadraa assaajaaniiyaa santo sa.mvijjamaanaa lokasmi.m.|| ||

[5][pts][ati] Evam eva kho bhikkhave cattaarome bhadraa purisaajaaniiyaa santo sa.mvijjamaanaa lokaasmi.m.|| ||

Katame cattaaro?|| ||

Idha, bhikkhave, ekacco bhadro purisaajaaniiyo su.naati amukasmi.m naama gaame vaa nigame vaa itthii vaa puriso vaa dukkhito vaa kaalakato vaati.|| ||

So tena sa.mvijjati sa.mvega.m aapajjati.|| ||

Sa.mviggo yoniso padahati.|| ||

Pahitatto kaayena c'eva paramasacca.m sacchikaroti,||
pa~n~naaya ca ativijjha passati.|| ||

seyyathaa pi so bhikkhave bhadro assaajaaniyo patodacchaaya.m disvaa sa.mvijjati sa.mvega.m aapajjati,||
tathuupamaaha.m bhikkhave ima.m bhadra.m purisaajaaniiya.m vadaami.|| ||

Evaruupopi bhikkhave idh'ekacco bhadro purisaajaaniiyo hoti.|| ||

Aya.m bhikkhave pa.thamo bhadro purisaajaaniiyo santo sa.mvijjamaano lokasmi.m.|| ||

[6][pts][ati] Puna ca para.m bhikkhave idh'ekacco bhadro purisaajaaniiyo naheva kho su.naati amukasmi.m naama gaame vaa nigame vaa itthii vaa puriso vaa dukkhito vaa kaalakato vaa ti.|| ||

Api ca kho saama.m passati.|| ||

Itthi.m vaa purisa.m vaa dukkhita.m vaa kaalakata.m vaa.|| ||

So tena sa.mvijjati sa.mvega.m aapajjati.|| ||

Sa.mviggo yoniso padahati.|| ||

Pahitatto kaayena c'eva paramasacca.m sacchikaroti,||
pa~n~naaya ca ativijjha passati.|| ||

seyyathaa pi so bhikkhave bhadro assaajaaniiyo lomavedhaviddho sa.mvijjati sa.mvega.m aapajjati,||
tathuupamaaha.m bhikkhave ima.m bhadra.m purisaajaaniiya.m vadaami.|| ||

Evaruupopi bhikkhave idh'ekacco bhadro purisaajaaniiyo hoti.|| ||

Aya.m bhikkhave dutiyo bhadro purisaajaaniiyo santo sa.mvijjamaano lokasmi.m.|| ||

[7][pts][ati] Puna ca para.m bhikkhave idh'ekacco bhadro purisaajaaniiyo naheva kho su.naati amukasmi.m naama gaame vaa nigame vaa itthii vaa puriso vaa dukkhito vaa kaalakato vaa ti, napi saama.m passati.|| ||

Itthi.m vaa purisa.m vaa dukkhita.m vaa kaalakata.m vaa.|| ||

Api ca khvassa ~naati vaa saalohito vaa dukkhito vaa hoti kaalakato vaa.|| ||

So tena sa.mvijjati sa.mvega.m aapajjati.|| ||

[116] Sa.mviggo yoniso padahati.|| ||

Pahitatto kaayena c'eva paramasacca.m sacchikaroti,||
pa~n~naaya ca ativijjha passati.|| ||

seyyathaa pi so bhikkhave bhadro assaajaaniiyo cammavedhaviddho sa.mvijjati sa.mvega.m aapajjati,||
tathuupamaaha.m bhikkhave ima.m bhadra.m purisaajaaniiya.m vadaami,||
evaruupopi bhikkhave idh'ekacco bhadro purisaajaaniiyo hoti.|| ||

Aya.m bhikkhave tatiyo bhadro purisaajaaniiyo santo sa.mvijjamaano lokasmi.m.|| ||

[8][pts][ati] Puna ca para.m bhikkhave idh'ekacco bhadro purisaajaaniiyo naheva kho su.naati amukasmi.m naama gaame vaa nigame vaa itthii vaa puriso vaa dukkhito vaa kaalakato vaa ti.|| ||

Napi saama.m passati itthi.m vaa purisa.m vaa dukkhita.m vaa kaalakata.m vaa.|| ||

Napi'ssa ~naati vaa saalohito vaa dukkhito vaa hoti kaalakato vaa.|| ||

Api ca kho saama.m yeva phu.t.tho hoti saariirikaahi vedanaahi dukkhaahi tibbaahi kharaahi ka.tukaahi asaataahi amanaapaahi paa.naharaahi.|| ||

So tena sa.mvijjati,||
sa.mvega.m aapajjati,||
sa.mviggo yoniso padahati.|| ||

Pahitatto kaayena c'eva paramasacca.m sacchikaroti,||
pa~n~naaya ca ativijjha passati.|| ||

seyyathaa pi so bhikkhave bhadro assaajaaniiyo a.t.thivedhaviddho sa.mvijjati sa.mvega.m aapajjati,||
tathuupamaaha.m bhikkhave ima.m bhadra.m purisaajaaniiya.m vadaami,||
evaruupopi bhikkhave idh'ekacco bhadro purisaajaaniiyo hoti.|| ||

Aya.m bhikkhave catuttho bhadro purisaajaaniiyo santo sa.mvijjamaano lokasmi.m.|| ||

Ime kho bhikkhave cattaaro bhadraa purisaajaaniiyaa santo sa.mvijjamaanaa lokasmin ti.|| ||

 


Contact:
E-mail
Copyright Statement