Aṅguttara Nikāya
Catukka Nipāta
XIX: Yodhajīva Vagga
Sutta 188
Upaka Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ Bhagavā Rājagahe viharati Gijjhakuṭe pabbate.|| ||
Atha kho Upako Maṇḍikā-putto yena Bhagavā ten'upasaṅkami.|| ||
Upasaṅkamitvā Bhagavantaṃ abhivādetvā eka-m-antaṃ nisīdi.|| ||
Eka-m-antaṃ nisinno kho Upako Maṇḍikā-putto Bhagavantaṃ etad avoca:|| ||
Ahaṃ hi bhante evaṃ-vādī evaṃ-diṭṭhi:|| ||
Yo ko ci parūpārambhaṃ vatteti||
parūpārambhaṃ vattento sābbaso na upapādeti,||
anupapādento gārayho hoti upavajjo ti.|| ||
■
Parūpārambhaṃ ce Upaka vattento na upapādeti,||
anupapā- [182] dento gārayho hoti upavajjo.|| ||
Tvaṃ kho pi Upaka parūpārambhaṃ vattesi||
parūpārambhaṃ vattento na upapādi||
anuppādento gārayho hosi upavajjo ti.|| ||
§
2. Seyyathā pi bhante ummujjamānakaṃ yeva mahatā pāsena bandheyya,||
evam eva kho ahaṃ bhante ummujjamānako yeva Bhagavatā mahatā vādapāsena baddho' ti.|| ||
§
Idaṃ akusalan ti kho Upaka mayā paññattaṃ||
tattha aparimāṇā padā,||
aparimāṇā vyañjanā,||
aparimāṇā Tathāgatassa Dhamma-desanā:|| ||
Iti p'idaṃ akusalan,|| ||
taṃ kho pan'idaṃ akusalaṃ pahātabban ti kho Upaka mayā paññattaṃ||
tattha aparimāṇā padā,||
aparimāṇā vyañjanā,||
aparimāṇā Tathāgatassa Dhamma-desanā:|| ||
Iti p'idaṃ akusalaṃ pahātabban ti.|| ||
■
Idaṃ kusalan ti kho Upaka mayā paññattaṃ||
tattha aparimāṇā padā,||
aparimāṇā vyañjanā,||
aparimāṇā Tathāgatassa Dhamma-desanā:|| ||
Iti pidaṃ kusalan ti.|| ||
taṃ kho pana idaṃ kusalaṃ bhāvetabbanti kho Upaka mayā paññattaṃ||
tattha aparimāṇā padā||
aparimāṇā vyañjanā,||
aparimāṇā Tathāgatassa Dhamma-desanā:|| ||
Iti pidaṃ kusalaṃ bhāvetabban ti.|| ||
§
Atha kho Upako Maṇḍikaputto Bhagavato bhāsitaṃ abhinan'ditvā anumo-ditvā uṭṭhāy āsanā Bhagavantaṃ abhivādetvā pādakkhiṇaṃ katvā yena Rājā Māgadho Ajātasattu Vedehi-putto ten'upasaṅkami.|| ||
Upasaṅkamitvā yāvatako ahosi Bhagavatā saddhiṃ kathā-sallāpo||
taṃ sabbaṃ rañño Māgadhassa Ajātasattussa Vedehi-puttassa ārocesi.|| ||
Evaṃ vutte Rājā Māgadho Ajātasattu Vedehi-putto kupito anatta-mano Upakaṃ Maṇḍikā-puttaṃ etad avoca:|| ||
Yāva dhaṃsi vāyaṃ loṇakārakadārako,||
yāva mukharo yāva pagabbho,||
yatra hi nāma taṃ Bhagavantaṃ Arahantaṃ Sammā Sambuddhaṃ āsādetabbaṃ maññissati,||
apehi tvaṃ Upaka, vinassa, mā tvaṃ addasan ti.|| ||
