Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as Velthuis (aaiiuu.m'n~n.t.d.n.l). Alternatives:
[ ASCII (aiumnntdnl) | IAST Unicode (āīūṃṅñṭḍṇḷ) ]

 

Anguttara Nikaaya
Sattaka Nipaata
Mahaa Vaggo

Sutta 67

Bhaavanaanuyutta Sutta.m

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society A'nguttara-Nikaaya edited by Prof. E. Hardy, PhD., D.D..

 


 

[1][pts] EVA.M ME SUTA.M.|| ||

Eka.m samaya.m Bhagavaa Saavatthiya.m viharati||
Jetavane Anaathapi.n.dikassa aaraame.|| ||

Tatra kho Bhagavaa bhikkhuu aamantesi bhikkhavo ti.|| ||

Bhadante ti te bhikkhuu Bhagavato paccassosu.m.|| ||

Bhagavaa etad avoca:|| ||

2. Bhaavana.m ananuyttassa bhikkhave bhikkhuno viharato ki~ncaapi eva.m icchaa uppajjeyya:|| ||

"Aho vata me anupaadaaya aasavehi citta.m vimucceyyaa" ti.|| ||

Atha khvassa n'eva anupaadaaya aasavehi citta.m vimuccati.|| ||

Ta.m kissa hetu?|| ||

"Abhaavitattaatissa vacaniiya.m."|| ||

Kissa abhaavitattaa?|| ||

Catunna.m satipa.t.thaanaana.m,||
catunna.m sammappadhaanaana.m,||
catunna.m iddhipaadaana.m,||
pa~ncanna.m indriyaana.m,||
pa~ncanna.m balaana.m,||
sattanna.m bojjha'ngaana.m,||
ariyassa a.t.tha'ngikassa maggassa.|| ||

Seyyathaa pi, bhikkhave, kukku.tiyaa a.n.daani a.t.tha vaa||
dasa vaa dvaadasa vaa,||
taanassu kukku.tiyaa na sammaa adhisayitaani na sammaa pariseditaani na sammaa paribhaa- [126] vitaani.|| ||

Ki~n caa pi tassaa kukku.tiyaa eva.m icchaa uppajjeyya:|| ||

"Aho vata me kukku.tapotakaa paadanakhasikhaaya vaa||
mukhatu.n.dakena vaa||
a.n.dakosa.m padaaletvaa sottinaa abhinibbhijjeyyun" ti.|| ||

Atha kho abhabbaava te kukku.tapotakaa paadanakhasikhaaya vaa||
mukhatu.n.dakena vaa||
a.n.dakosa.m padaaletvaa sotthinaa abhinibbhijjitu.m.|| ||

Ta.m kissa hetu?|| ||

Tathaa hi bhikkhave kukku.tiyaa a.n.daani na sammaa adhisayitaani na sammaa pariseditaani,||
na sammaa paribhaavitaani,||
evam eva kho, bhikkhave,||
bhaavana.m ananuyuttassa bhikkhuno viharato ki~ncaa pi eva.m icchaa uppajjeyya:|| ||

"Aho vata me anupaadaaya aasavehi citta.m vimucceyyaa" ti.|| ||

Atha khavassa n'eva anupaadaaya aasavehi citta.m vimuccati.|| ||

Ta.m kissa hetu?|| ||

Abhaavitattaatissa vacaniiya.m.|| ||

Kissa abhaavitattaa?|| ||

Catunna.m satipa.t.thaanaana.m,||
catunna.m sammappadhaanaana.m,||
catunna.m iddhipaadaana.m,||
pa~ncanna.m indriyaana.m,||
pa~ncanna.m balaana.m,||
sattanna.m bojjha'ngaana.m,||
ariyassa a.t.tha'ngikassa maggassa.|| ||

3. Bhaavana.m anuyuttassa bhikkhave, bhikkhuno viharato ki~ncaapi na eva.m icchaa uppajjeyya:|| ||

"Aho vata me anupaadaaya aasavehi citta.m vimucceyyaa" ti.|| ||

Atha khvassa anupaadaaya aasavehi citta.m vimuccati.|| ||

Ta.m kissa hetu?|| ||

Bhaavitattaatissa vacaniiya.m.|| ||

Kissa bhaavitattaa?|| ||

Catunna.m satipa.t.thaanaana.m,||
catunna.m sammappadhaanaana.m,||
catunna.m iddhipaadaana.m,||
pa~ncanna.m indriyaana.m,||
pa~ncanna.m balaana.m,||
sattanna.m bojjha'ngaana.m,||
ariyassa a.t.tha'ngikassa maggassa.|| ||

Seyyathaa pi, bhikkhave, kukku.tiyaa a.n.daani a.t.tha vaa dasa vaa dvaadasa vaa,||
taan'assu kukku.tiyaa sammaa-adhisayitaani sammaa-pariseditaani sammaa-paribhaavitaani.|| ||

Ki~ncaapi tassaa kukku.tiyaa na eva.m icchaa uppajjeyya:|| ||

"Aho vata me kukku.tapotakaa paadanakhasikhaaya vaa mukhatu.n.dakena vaa||
a.n.dakosa.m padaaletvaa sottinaa abhinibbhijjeyyun" ti.|| ||

Atha kho bhabbaa'va te kukku.tapotakaa paadanakhasikhaaya vaa mukhatu.n.dakena vaa a.n.dakosa.m padaaletvaa sotthinaa abhinibbhijjitu.m.|| ||

Ta.m kissa hetu?|| ||

Tathaa h'amuni bhikkhave kukku.tiyaa a.n.daani sammaa-adhisayitaani sammaa-pariseditaani, sammaa-paribhaavitaani.|| ||

Evam eva kho bhikkhave bhaavana.m ananuyuttassa bhikkhuno viharato ki~n caa pi na eva.m icchaa uppajjeyya:|| ||

"Aho [127] vata me anupaadaaya aasavehi citta.m vimucceyyaa" ti.|| ||

Atha khavassa anupaadaaya aasavehi citta.m vimuccati.|| ||

Ta.m kissa hetu?|| ||

Bhaavitattaa ti'ssa vacaniiya.m.|| ||

Kissa bhaavitattaa?|| ||

Catunna.m satipa.t.thaanaana.m,||
catunna.m sammappadhaanaana.m,||
catunna.m iddhipaadaana.m,||
pa~ncanna.m indriyaana.m,||
pa~ncanna.m balaana.m,||
sattanna.m bojjha'ngaana.m,||
ariyassa a.t.tha'ngikassa maggassa.|| ||

4. Seyyathaa pi, bhikkhave, palaga.n.dassa vaa palaga.n.dantevaasikassa vaa dissante'va vaasija.te a'ngulipadaani dissati a'ngu.t.thapada.m, no ca khvaassa eva.m ~naa.na.m hoti:|| ||

"Ettaka.m vaa me ajja vaasija.tassa khii.na.m,||
ettaka.m hiiyyo,||
ettaka.m pare" ti.|| ||

Atha khavaassa khii.ne khii.nante'va ~naa.na.m hoti:|| ||

Evam eva kho bhikkhave, bhaavana.m anuyuttassa bhikkhuno viharato ki~ncaapi na eva.m ~naa.na.m hoti:|| ||

"Ettaka.m me ajja aasavaana.m khii.na.m,||
ettaka.m vaa bhiyyo,||
ettaka.m vaa pare" ti.|| ||

Atha khavaassa khii.ne khii.nante'va ~naa.na.m hoti.|| ||

Seyyathaa pi, bhikkhave, saamuddikaaya naavaaya vettabandhanabaddhaaya chammaasaani udake pariyaadaaya hemantikena thale ukkhittaaya vaataatapaparetaani bandhanaani,||
taani paavussakena meghena ahippavu.t.taani appakasiren'eva pa.tippassambhanti putikaani bhavanti:||
evam eva kho, bhikkhave, bhaavana.m anuyuttassa bhikkhuno viharato appakasiren'eva sa.myojanaani pa.tippassambhanti puutikaanii bhavantii ti.|| ||

 


Contact:
E-mail
Copyright Statement