Saṃyutta Nikāya
5. Mahā-Vagga
56. Sacca Saṃyutta
1. Samādhi Vagga
Sutta 7
Vitakkā Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][bodh] Evaṃ me sutaṃ:|| ||
Ekaṃ samayaṃ Bhagavā Sāvatthiyaṃ viharati||
Jetavane Anāthapiṇḍikassa ārāme.|| ||
Tatra kho Bhagavā bhikkhū āmantesi:|| ||
"Bhikkhavo" ti.|| ||
"Bhadante" ti te bhikkhū Bhagavato paccassosuṃ.|| ||
Bhagavā etad avoca:|| ||
"Mā bhikkhave, pāpake akusale vitakke vitakkeyyātha.|| ||
Seyyath'īdaṃ:|| ||
Kāma-vitakkaṃ||
vyāpāda-vitakkaṃ||
vihiṃsā-vitakkaṃ.|| ||
Taṃ kissa hetu?|| ||
N'ete bhikkhave, vitakkā attha-saṅhitā||
n'ādiBrahma-cariyakā||
[418] na nibbidāya||
na virāgāya||
na nirodhāya||
na upasamāya||
na abhiññāya||
na sambodhāya||
na Nibbānāya saṃvaṭṭanti.|| ||
Vitakkento ca kho tumhe bhikkhave,||
'idaṃ dukkhan' ti vitakkeyyātha,||
'ayaṃ dukkha-samudayo' ti vitakkeyyātha,||
'ayaṃ dukkha-nirodho' ti vitakkeyyātha,||
'ayaṃ dukkha-nirodha-gāminī paṭipadā' ti vitakkeyyātha.|| ||
Taṃ kissa hetu?|| ||
Ete bhikkhave, vitakkā attha-saṅhitā ete ādiBrahma-cariyakā||
ete nibbidāya||
virāgāya||
nirodhāya||
upasamāya||
abhiññāya||
sambodhāya||
Nibbānāya saṃvaṭṭanti. || ||
Tasmātiha bhikkhave,||
'idaṃ dukkhan' ti yogo karaṇīyo,||
'ayaṃ dukkha-samudayo' ti yogo karaṇīyo,||
'ayaṃ dukkha-nirodho' ti yogo karaṇīyo,||
'ayaṃ dukkha-nirodha-gāminī paṭipadā' ti yogo karaṇīyo" ti.|| ||
