Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara-Nikāya
III. Tikanipāta
IV. Devadūta Vagga

Sutta 37

Dutiya Catumahārāja Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1979 Pali Text Society Anguttara-Nikaya edited by The Rev. Richard Morris, M.A., LL.D., Second Edition, revised by A.K. Warder, B.A., Ph.D., Lecturer in Sanskrit in the University of Edinburgh

 


 

[1][bit][pts][bodh] Evaɱ me sutaɱ.|| ||

Ekaɱ samayaɱ Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

Bhūtapubbaɱ bhikkhave Sakko devānam indo deve Tāvatiɱse anunayamāno tāyaɱ velāyaɱ imaɱ gāthaɱ abhāsi:|| ||

[144] Cātuddasiɱ pañcadasi yāva pakkhassa aṭṭhamī||
Pāṭihāriyapakkhañ ca aṭṭhaŋgasusamāgataɱ,||
Uposathaɱ upavaseyya yo p'assa mādiso naro ti.|| ||

Sā kho pan'esā bhikkhave Sakkena devānam indena gāthā duggītā, na sugītā,||
dubbhāsitā, na subhāsitā.|| ||

Taɱ kissa hetu?|| ||

Sakko bhikkave devānam indo avītarāgo avītadoso avītamoho.|| ||

Yo ca kho so bhikkhave bhikkhu arahaɱ khīṇāsavo vusitavā katakaraṇīyo ohitabhāro anuppatta-sadattho parikkhīṇabhavasaɱyojano sammadaññā-vimutto.|| ||

Tassa kho etaɱ bhikkhave bhikkhuno kallaɱ vacanāya:|| ||

Cātuddasiɱ pañcadasi yāva pakkhassa aṭṭhamī||
Pāṭihāriyapakkhaɱ ca aṭṭhaŋgasusamāgataɱ,||
Uposathaɱ upavaseyya yo p'assa mādiso naro ti.|| ||

Taɱ kissa hetu?|| ||

So hi bhikkhave bhikkhu vītarāgo vītadoso vītamoho ti.|| ||

Bhūtapubbaɱ bhikkhave Sakko devānam indo deve Tāvatiɱse anunayamāno tāyaɱ velāyaɱ imaɱ gāthaɱ abhāsi:-|| ||

Cātuddasi pañcadasi yāva pakkhassa aṭṭhamī,||
Pāṭihāriyapakkhaɱ ca aṭṭhaŋgasusamāgataɱ||
Uposathaɱ upavaseyya yo p'assa mādiso naro ti.|| ||

Sā kho pan'esā bhikkhave Sakkena devānam indena gāthā duggītā, na sugītā,||
dubbhāsitā, na subhāsitā.|| ||

Taɱ kissa hetu?|| ||

Sakko hi bhikkhave devānam indo aparimutto jātiyā jarāya maraṇena sokehi paridevehi dukkhehi domanassehi upāyāsehi,||
aparimutto dukkhasmā ti vadāmi.|| ||

Yo ca kho so bhikkhave bhikkhu arahaɱ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaɱyojano sammadaññā-vimutto,||
tassa kho etaɱ bhikkhave bhikkhuno kallaɱ vacānāya.|| ||

Cātuddasi pañcadasī yāva pakkhassa aṭṭhamī||
Pāṭihāriyapakkhañ ca aṭṭhaŋgasusamāgataɱ,||
Uposathaɱ upavaseyya yo p'assa mādiso naro ti. || ||

[145] Taɱ kissa hetu?|| ||

So bhikkhave bhikkhu parimutto jātiyā jarāyā maraneṇa sokehi paridevehi dukkhehi domanassehi upāyāsehi,||
parimutto dukkhasmā ti vadāmi.|| ||

 


Contact:
E-mail
Copyright Statement   Webmaster's Page