Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara-Nikāya
III. Tikanipāta
IV. Devadūta Vagga

Sutta 38

Sukhumāla Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1979 Pali Text Society Anguttara-Nikaya edited by The Rev. Richard Morris, M.A., LL.D., Second Edition, revised by A.K. Warder, B.A., Ph.D., Lecturer in Sanskrit in the University of Edinburgh

 


 

[1][pts][than][bodh] Evaɱ me sutaɱ.|| ||

Ekaɱ samayaɱ Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

Sukhumālo ahaɱ bhikkhave paramasukhumālo, accantasukhumālo.|| ||

Mama sudaɱ bhikkhave pitu nivesane pokkharaṇiyo kāritā honti.|| ||

Ekattha sudaɱ uppalaɱ pupphati,||
ekattha padumaɱ,||
ekattha puṇḍarīkaɱ,||
yāvad eva mama atthāya.|| ||

Na kho pan'assāhaɱ bhikkhave akāsikaɱ candanaɱ dhāremi.|| ||

Kāsikaɱ su me taɱ bhikkhave veṭhanaɱ hoti.|| ||

Kāsikā kañcukā,||
kāsikaɱ nivāsanaɱ,||
kāsiko uttarāsaŋgo.|| ||

Rattindivaɱ kho pana su me taɱ bhikkhave setacchattaɱ dhārīyati,||
mā naɱ phūsi sītaɱ vā uṇhaɱ vā rajo vā tiṇaɱ vā ussāvo vā ti.|| ||

Tassa mayhaɱ bhikkhave tayo pāsādā ahesuɱ,||
eko hemantiko,||
eko gimhiko,||
eko vassiko.|| ||

So kho ahaɱ bhikkhave vassike pāsāde vassike cattāro māse nippurisehi turiyehi paricāriyamāno na heṭṭhā pāsādaɱ orohāmi.|| ||

Yathā kho pana bhikkhave aññesaɱ nivesanesu dāsakammakaraporisassa kaṇājakaɱ bhojanaɱ diyyati bilaŋgadutiyaɱ.|| ||

Evam evassu me bhikkhave pitu nivesane dāsakammakaraporisassa sālimaɱsodano diyyati.|| ||

2. Tassa mayhaɱ bhikkhave evarūpāya iddhiyā samannāgatassa evarūpena ca accanta-sukhumālena etad ahosi:|| ||

'Assutavā kho puthujjano attanā jarādhammo samāno jaraɱ anatīto paraɱ jiṇṇaɱ disvā aṭṭīyati,||
harāyati,||
jigucchati,||
attānaɱ yeva atisitvā.|| ||

Aham pi kho'mhi jarādhammo jaraɱ anatīto,||
ahañ c'eva kho pana jarādhammo samāno jaraɱ anatīto,||
paraɱ jiṇṇaɱ disvā aṭṭīyeyyaɱ,||
harāyeyyaɱ,||
[146] jiguccheyyaɱ.|| ||

Na me taɱ assa paṭirūpan ti.|| ||

Tassa mayhaɱ bhikkhave iti paṭisañcikkhato yo yobbane yobbanamado so sabbaso pahiyyi.|| ||

Assutavā kho puthujjano attanā vyādhidhammo samāno vyādhiɱ anatīto,||
paraɱ vyādhitaɱ disvā aṭṭīyati,||
harāyati,||
jigucchati,||
attānaɱ yeva atiyitvā.|| ||

Aham pi kho'mhi vyādhidhammo,||
vyādhiɱ anatīto,||
ahañ c'eva kho pana vyādhidhammo samāno vyādhiɱ anatīto,||
paraɱ vyādhitaɱ disvā aṭṭīyeyyaɱ harāyeyyaɱ jiguccheyyaɱ.|| ||

Na me taɱ assa paṭirūpan ti.|| ||

Tassa mayhaɱ bhikkhave iti paṭisañcikkhato yo ārogye ārogyamado,||
so sabbaso pahiyyi.|| ||

Assutavā kho puthujjano attanā maraṇadhammo samāno maraṇaɱ anatīto paraɱ mataɱ disvā aṭṭīyati harāyati jigucchati,||
attānaɱ yeva atiyitvā.|| ||

Aham pi kho'mhi maraṇadhammo maraṇaɱ anatīto,||
ahañ c'eva kho pana maraṇadhammo samāno maraṇaɱ anatīto paraɱ mataɱ disvā aṭṭīyeyyaɱ harāyeyyaɱ jiguccheyyaɱ.|| ||

Na me taɱ assa paṭirūpan ti.|| ||

Tassa mayhaɱ bhikkhave iti paṭisañcikkhato yo jīvite jīvitamado,||
so sabbaso pahiyī ti.|| ||

 


Contact:
E-mail
Copyright Statement   Webmaster's Page