Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Ekādasako Nipāto

Sutta 13

Adapted from the 1995 edition of the digital version of the Sri Lanka Buddha Jayanti Tripitaka Series.

Nandiya Suttaɱ

 


 

1. [pts] Ekaɱ samayaɱ Bhagavā Sakkesu viharati Kapilavatthusmiɱ Nigrodhārāme tena kho pana samayena Bhagavā Sāvatthiyaɱ vassāvāsaɱ upagantukāmo hoti. Assosi kho nandiyo Sakko ''Bhagavā kira Sāvatthiyaɱ vassāvāsaɱ upagantukāmo'' ti. Atha kho nandiyassa [335] sakkassa etad ahosi: yannūnāhampi Sāvatthiyaɱ vassāvāsaɱ upagaccheyyaɱ, tattha kammantaɱ yeva adhiṭṭhahissāmi, Bhagavantañ ca lacchāmi kālena kālaɱ dassanāyāti.|| ||

Atha kho Bhagavā Sāvatthiyaɱ vassāvāsaɱ upagañchi. Nandiyopi kho Sakko Sāvatthiyaɱ vassāvāsaɱ upagañchi. Tattha kammantañc'eva adhiṭṭhāsi. Bhagavantañ ca labhi kālena kālaɱ dassanāya.|| ||

Tena kho pana samayena sambahulā bhikkhu Bhagavato cīvarakammaɱ karonti ''niṭṭhitacīvaro Bhagavā temāsaccayena cārikaɱ pakkamissatī'' ti. Assosi kho nandiyo Sakko ''sambahulā kira bhikkhu Bhagavato cīvarakammaɱ karonti niṭṭhitacīvaro Bhagavā temāsaccayena cārikaɱ pakkamissatī'' ti. Atha kho nandiyo Sakko yena Bhagavā ten'upasaŋkami. Upasaŋkamitvā Bhagavantaɱ abhivādetvā eka-m-antaɱ nisīdi. Eka-m-antaɱ nisinno kho nandiyo Sakko Bhagavantaɱ etad avoca: sutaɱ me taɱ bhante 'sambahula kira bhikkhu Bhagavato cīvarakammaɱ karonti niṭṭhitacīvaro Bhagavā temāsaccayena cārikaɱ pakkamissatī' ti. Tesaɱ no bhante nānāvihārehi viharataɱ kenassa vihārena vihātabbanti. ?

Sādhu sādhu nandiya, etaɱ kho nandiya tumhādisānaɱ1 paṭirūpaɱ kulaputtānaɱ yaɱ tumhe Tathāgataɱ upasaŋkamitvā puccheyyātha 'tesaɱ no bhante nānāvihārehi viharataɱ kenassa vihārena vihātabba''nti.|| ||

1. Tumhākaɱ -sīmu.|| ||

[BJT Page 632]

Saddho kho nandiya ārādhako hoti. No assaddho sīlavā ārādhako hoti no dussīlo. Āraddhaviriyo ārādhako hoti no kusīto. Upaṭṭhitasati ārādhako hoti no muṭṭhassati. Samāhito ārādhako hoti no asamāhito, paññavā ārādhako hoti no duppañño. Imesu kho te nandiya chasu dhammesu patiṭṭhāya pañcasu dhammesu ajjhattaɱ sati upaṭṭhāpetabbā.|| ||

Idha tvaɱ nandiya Tathāgataɱ anussareyyāsi: ''Iti pi [336] so Bhagavā arahaɱ Sammā-sambuddho vijjā-caraṇa-sampanno sugato loka-vidū anuttaro purisadammasārathi satthā deva-manussānaɱ buddho Bhagavā'' ti. Iti kho te nandiya Tathāgataɱ ārabbha ajjhattaɱ sati upaṭṭhāpetabbā.|| ||

Puna ca paraɱ tvaɱ nandiya dhammaɱ anussareyyāsi, 'svākkhāto Bhagavatā dhammo sandiṭṭhiko akāliko ehipassiko opanayiko paccattaɱ veditabbo viññūhī ti. Iti kho te nandiya dhammaɱ ārabbha ajjhattaɱ sati upaṭṭhāpetabbā.|| ||

Puna ca paraɱ tvaɱ nandiya kalyāṇamitte anussareyyāsi, 'lābhā vata me suladdhaɱ vata me, yassa me kalyāṇamittā anukampakā atthakāmā ovādakā anusāsakā'' ti. Iti kho te nandiya kalyāṇamitte ārabbha ajjhattaɱ sati upaṭṭhāpetabbā.|| ||

Puna ca paraɱ tvaɱ nandiya attano cāgaɱ anussareyyāsi, 'lābhā vata me, suladdhaɱ vata me yohaɱ maccheramalapariyuṭṭhitāya pajāya vigatamalamaccherena cetasā agāraɱ ajjhāvasāmi muttacāgo payatapāṇī vossaggarato yācayogo dānasaɱvibhāgarato' ti. Iti kho te nandiya cāgaɱ ārabbha ajjhattaɱ sati upaṭṭhāpetabbā.|| ||

Puna ca paraɱ tvaɱ nandiya devatā anussareyyāsi 'yā devatā atikkammeva kabaliŋkārāhārabhakkhānaɱ1 devānaɱ sahavyataɱ aññataraɱ manomayaɱ kāyaɱ upapannā, tā karaṇīyaɱ attano na samanupassanti, katassa vā paticayaɱ. '

1. Kabaliŋkārabhakkhānaɱ - sīmu. Syā [pts]

[BJT Page 634]

seyyathā pi nandiya bhikkhu asamayavimutto karaṇīyaɱ attano na samanupassati, katassa vā paticayaɱ, evam eva kho nandiya yā tā devatā atikkammeva kabaliḍkārāhārabhakkhānaɱ devānaɱ sahavyataɱ aññataraɱ manomayaɱ kāyaɱ upapannā, tā karaṇīyaɱ [337] attano na samanupassanti katassa vā paticayaɱ. Iti kho te nandiya devatā ārabbha ajjhattaɱ sati upaṭṭhāpetabbā. Imehi kho nandiya ekādasahi dhammehi samannāgato ariyasāvako pajahateva pāpake akusaledhamme, na upādiyati.|| ||

seyyathā pi nandiya kumbho nikkujjo1 vamateva udakaɱ, no vantaɱ pacchā vamati. Seyyathā vā2 pana nandiya sukkhe tiṇadāye aggimukko3 ḍahaɱ yeva gacchati, no daḍḍhaɱ paccudāvattati.|| ||

Eva meva kho nandiya imehi ekādasahi dhammehi samannāgato ariyasāvako pajahate va pāpake akusale dhamme, na upādiyatī ti.|| ||

 


Contact:
E-mail
Copyright Statement   Webmaster's Page