Digha Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Dīgha Nikāya

Sutta 31

Sigālovada Suttantaɱ

Adapted from the digital version of the Sri Lanka Buddha Jayanti Tripitaka Series

 


[180]

[1][grim][pts][ati-nara][ati-kell] EVAṂ ME SUTAṂ.|| ||

Ekaɱ samayaɱ Bhagavā Rājagahe viharati veṭavane kalandakanivāpe.|| ||

Tena kho pana samayena sigālako gahapatiputto kālasseva vuṭṭhāya Rājagahā nikkhamitvā allavattho allakeso pañjaliko puthuddisā namassati,||
purattimaɱ disaɱ dakkhiṇaɱ disaɱ pacchimaɱ disaɱ uttaraɱ disaɱ heṭṭhimaɱ disaɱ uparimaɱ disaɱ.|| ||

[2] Atha kho Bhagavā pubbaṇhasamayaɱ nivāsetvā pattacīvaramādāya Rājagahaɱ piṇḍāya pāvisi.|| ||

Addasā kho Bhagavā sigālakaɱ gahapatiputtaɱ kālasseva vuṭṭhāya Rājagahā nikkhamitvā allavattaɱ allakesaɱ pañjalikaɱ puthudadisā namassantaɱ,||
puratthimaɱ disaɱ dakkhiṇaɱ disaɱ pacchimaɱ disaɱ uttaraɱ disaɱ heṭṭhimaɱ disaɱ uparimaɱ disaɱ.|| ||

Disvāna sigālakaɱ gahapatiputtaɱ etad avoca: kin nu kho tvaɱ gahapatiputta kālasseva uṭṭhāya Rājagahā nikkhamitvā allavattho allakeso pañjaliko puthuddisā [181] namassasi,||
puratthimaɱ disaɱ dakkhiṇaɱ disaɱ pacchimaɱ disaɱ uttaraɱ disaɱ heṭṭhimaɱ disaɱ uparimaɱ disanti?".|| ||

"Pitā maɱ bhante kālaɱ karonto evaɱ avaca:|| ||

'Disā tāta namasseyyāsī' ti.|| ||

So kho ahaɱ bhante pituvacanaɱ sakkaronto garukaronto mānento pūjento kālasseva vuṭṭhāya Rājagahā nikkhamitvā allavattho allakeso pañjaliko puthuddisā namassāmi,||
puratthimaɱ disaɱ dakkhiṇaɱ disaɱ pacchimaɱ disaɱ uttaraɱ disaɱ heṭṭhimaɱ disaɱ uparimaɱ disanti".|| ||

"Na kho gahapatiputta ariyassa vinaye evaɱ chaddisā namassitabbā" ti.|| ||

"Yathākathaɱ pana bhante ariyassa vinaye chaddisā namassitabbā?|| ||

Sādhu me bhante Bhagavā tathā dhammaɱ desetu yathā ariyassa vinaye chaddisā namassitabbā" ti.|| ||

Chaddisā|| ||

[3] Tena hi gahapatiputta suṇāhi,||
sādhukaɱ manasi karohi,||
bhāsissāmī' ti.|| ||

'Evaɱ bhante' ti kho sigālo gahapatiputto Bhagavato paccassosi.|| ||

Bhagavā etad avoca:|| ||

"Yato kho gahapatiputta ariyasāvakassa cattāro kammakilesā pahīṇā honti,||
catūhi ṭhānehi pāpakammaɱ na karoti,||
cha ca bhogānaɱ apāyamukhāni na sevati,||
so evaɱ cuddasapāpakāpagato,||
chaddisāpaṭicchādī,||
ubhayalokavijayāya paṭipanno hoti,||
tassa ayaɱ c'eva loko āraddho hoti paro ca loko.|| ||

So kāyassa bhedā param maraṇā sugatiɱ saggaɱ lokaɱ upapajjati.|| ||

Kammakilesā|| ||

[4] Katamassa cattāro kammakilesā pahīṇā honti? Pāṇātipāto kho gahapatiputta kammakileso,||
adinnādānaɱ kammakileso,||
kāmesu micchācāro kammakiloso,||
musāvādo kammakileso.|| ||

Imassa cattāro kammakilesā pahīṇā hontī" ti.|| ||

Idam avoca Bhagavā.|| ||

Idaɱ vatvā sugato,||
athāparaɱ etad avoca satthā:|| ||

[182] pāṇātipātaɱ adinnādānaɱ musāvādo ca vuccati.|| ||

Paradāragamanañc'eva nappasaɱsanti paṇḍitā' ti.|| ||

Agatigamanāni|| ||

[5] Katamehi catūhi ṭhānehi pāpakammaɱ karoti?|| ||

Chandāgatiɱ gacchanto pāpakammaɱ karoti,||
dosāgatiɱ gacchanto pāpakammaɱ karoti,||
mohāgataɱ gacchanto pāpakammaɱ karoti,||
bhayāgatiɱ gacchanto pāpakammaɱ karoti.|| ||

Yato kho gahapatiputta ariyasāvako n'eva chandāgatiɱ gacchati,||
na dosāgatiɱ gacchati,||
na mohāgatiɱ gacchati,||
na bhayāgatiɱ gacchati,||
imehi catūhi ṭhānehi pāpakammaɱ na karotī' ti.|| ||

Idam avoca Bhagavā idaɱ vatvā sugato athāparaɱ etad avoca satthā:|| ||

Chandā dosā bhayā mohā yo dhammaɱ ativattati,||
Nihīyati tassa yaso kā'apakkhe'va candimā.|| ||

Chandā dosā bhayā mohā yo dhammaɱ nātivattati,||
Āpūrati tassa yaso1 sukkapakkhe'va2 candimā'ti.|| ||

Cha apāyamukhāni|| ||

[6] Katamāni cha bhogānaɱ apāyamukhāni na sevati? Surāmerayamajjapamādaṭṭhānānuyogo kho gahapatiputta bhogānaɱ apāyamukhaɱ.|| ||

Vikālavisikhācariyānuyogo bhogānaɱ apāyamukhaɱ.|| ||

Samajjābhicaraṇaɱ bhogānaɱ apāyamukhaɱ.|| ||

Jūtappamādaṭṭhānānuyogo bhogānaɱ apāyamukhaɱ.|| ||

Pāpamittānuyogo bhogānaɱ apāyamukhaɱ.|| ||

Ālassānuyogo bhogānaɱ apāyamukhaɱ.|| ||

Majjapanādīnavā|| ||

Cha kho'me gahapatiputta ādīnavā surāmerayamajjapamādaṭṭhānānuyoge:||
sandiṭṭhikā dhanajānī,||
kalahappavaḍḍhanī,||
rogānaɱ āyatanaɱ,||
akittisañjananī,||
[183] kopīnanidaɱsanī paññāyadubbalīkaraṇītv eva chaṭṭhaɱ padaɱ bhavati.|| ||

Ime kho gahapatiputta cha ādīnavā surāmerayamajjapamādaṭṭhānānuyoge.|| ||

Vikālacariyādīnāvā|| ||

Cha kho'me gahapatiputta ādīnavā vikālavisikhācariyānuyoge:||
attā'pi'ssa agutto arakkhito hoti puttadāro pi'ssa agutto arakkhito hoti,||
sāpateyyampi'ssa aguttaɱ arakkhitaɱ hoti,||
saŋkiyo ca hoti pāpakesu ṭhānesu,||
abhūtavacanaɱ ca tasmiɱ rūhati,||
bahūnañca dukkhadhammānaɱ purakkhato hoti.|| ||

Ime kho gahapatiputta cha ādīnavā vikālavisikhācariyānuyoge.|| ||

Samajjābhivaraṇādīnavā|| ||

Cha kho'me gahapatiputta ādīnavā samajjābhicaraṇe:||
kva naccaɱ,||
kva gītaɱ,||
kva vāditaɱ,||
kva akkhānaɱ,||
kva pāṇissaraɱ,||
kva kumbhathūṇan ti?|| ||

Ime kho gahapatiputta cha ādīnavā samajjābhivaraṇe.|| ||

Jūtappamādādīnavā|| ||

Cha kho'me gahapatiputta ādīnavā jūtappamādaṭṭhānānuyoge:||
jayaɱ veraɱ pasavati,||
jito vittamanusocati,||
sandiṭṭhikā dhanajāni,||
sabhāgatassa1 vacanaɱ na rūhati,||
mittāmccānaɱ paribhūto hoti,||
āvāhavivāhakānaɱ apatthito hoti,||
akkhadhutto ayaɱ purisapuggalo nālaɱ dārabharaṇāyā' ti.|| ||

Ime kho gahapatiputta cha ādīnavā jūtappamādaṭṭhānānuyoge.|| ||

Pāpamittānuyogādīnavā|| ||

Cha kho'me gahapatiputta ādīnavā pāpamittānuyoge:||
ye dhuttā,||
ye soṇḍā,||
ye pipāsā,||
ye nekatikā,||
ye cañcanikā,||
ye sāhasikā,||
tyāssa mittā honti.|| ||

Te sahāyā.|| ||

[184] Ime kho gahapatiputta cha ādīnavā pāpamittānuyoge.|| ||

Ālassādīnāvā|| ||

Cha kho'me gahapatiputta ādīnavā ālassānuyoge:||
atisītanti kammaɱ na karoti,||
atiuṇhanti kammaɱ na karoti,||
atisāyanti kammaɱ na karoti,||
atipāto'ti kammaɱ na karoti,||
atichāto'smīti kammaɱ na karoti,||
atidhāto'smīti kammaɱ na karoti.|| ||

Tassa evaɱ kiccāpadesabahulassa viharato anuppannā c'eva bhogā nūppajjanti,||
uppannā ca bhogā parikkhayaɱ gacchanti.|| ||

Imo kho gahapati putta cha ādīnavā ālassānuyoge" ti.|| ||

Idam avoca Bhagavā,||
idaɱ vatvā sugato athāparaɱ etad avoca satthā:|| ||

[1] Sabhāye tassa (kam)|| ||

[7] "Hoti pānasakhā nāma hoti sammiyasammiyo|| ||

Yo ca atthesu jātesu sahāyo hoti so sakhā. 1|| ||

Ussūraseyyā paradārasevanā||
Verappasaŋgo ca anatthatā ca||
Pāpā ca mittā sukadariyatā ca||
Ete cha ṭhānā purisaɱ dhaɱsayanti.|| ||

Pāpamitto pāpasakho pāpaācāragocaro||
Asmā lokā parambhā ca ubhayā dhaɱsate naro.|| ||

Akkhitthiyo vāruṇī naccagītaɱ||
Divāsoppaɱ pāricariyā akāle||
Pāpā ca mittā sukadariyatā ca||
Ete cha ṭhānā purisaɱ dhaɱsayanti.|| ||

Akkhehi dibbanti suraɱ pivanti||
Yantitthiyo pāṇasamā paresaɱ||
[185] nihīnasevī na ca vuddhasevi||
Nihīyare kā'apakkhe'va cando.|| ||

Yo vāruṇī adhano akiñcano||
Pipāso pivaɱ pāpaɱ gato||
Udakamiva iṇaɱ vigāhati||
Akulaɱ4 kāhiti khippamattano.|| ||

Na divāsoppasīlena rattimuṭṭhānadessinā,||
Niccaɱ mattena soṇḍena sakkā āvasituɱ gharaɱ.|| ||

Atisītaɱ atiuṇhaɱ atisāyam idaɱ ahū,||
Iti vissaṭṭhakammanne atthā accenti māṇave.|| ||

Yo'dha sītañ ca uṇhañca tīṇā bhiyyo na maññati||
Karaɱ purisakiccāni so sukhā na vihāyatī" ti.|| ||

Mittapaṭirūpakā|| ||

[8] Cattāro'me gahapatiputta amittā mittapaṭirūpakā1 veditabbā.|| ||

Aññadatthuharo amitto mittapaṭirūpako veditabbo,||
vacīparamo amitto mittapaṭirūpako veditabbo,||
anuppiyabhāṇī amitto mittapaṭirūpako veditabbo,||
apāyasahāyo amitto mittapaṭirūpako veditabbo.|| ||

Catūhi kho gahapatiputta ṭhānehi aññadatthuharo [186] amitto mittapaṭirūpako veditabbo.|| ||

Aññadatthuharo hoti appena bahumicchati,||
Bhayassa kiccaɱ karoti sevati atthakāraṇā.|| ||

Imehi kho gahapatiputta catūhi ṭhānehi aññadatthuharo amitto mittapaṭirūpako veditabbo.|| ||

Catūhi kho gahapatiputta ṭhānehi vacīparamo amitto mittapaṭirūpako veditabbo.|| ||

Atītena paṭisatharati anāgatena paṭisatharatiɱ,||
niratthakena saŋgaṇhāti,||
paccuppannesu kivecasu byasanaɱ dasseti.|| ||

Imehi kho gahapatiputta catūhi ṭhānehi vacīparamo amitto mittapaṭirūpako veditabbo.|| ||

Catūhi kho gahapatiputta ṭhanehi anuppiyabhāṇi amitto mittapaṭirūpako veditabbo.|| ||

Pāpakampi'ssaɱ3 anujānāti,||
kalyāṇampi'ssa anujānāti,||
sammukhā'ssa vaṇṇaɱ bhāsati,||
parammukhā'ssa avaṇṇaɱ bhāsati.|| ||

Imehi kho gahapatiputta catūhi ṭhānehi anuppiyabhāṇī amitto mittapaṭirūpa veditabbo.|| ||

Catūhi kho gahapatiputta ṭhānehi apāyasahāyo amitto mittapaṭirūpako veditabbo:||
surāmerayamajjapamādaṭṭhānānuyoge sahāyo hoti,||
vikālavisikhācariyānuyoge sahāyo hoti,||
samajjābhivaraṇe sahāyo hoti,||
jūtappamādaṭṭhānānuyoge sahāyo hoti.|| ||

Imehi kho gahapatiputta catūhi ṭhānehi apāyasahāyo amitto mittapaṭirūpako veditabbo'ti.|| ||

Idam avoca Bhagavā.|| ||

Idaɱ vatvā sugato athāparaɱ etad avoca satthā:|| ||

"Aññadatthuharo mitto yo ca mitto vacīparo,||
Anuppiyañ ca yo āha apāyesu ca yo sakhā.|| ||

Ete amitte cattāro iti viññāya paṇḍito,||
Ārakā parivajjeyya maggaɱ paṭibhayaɱ yathā" ti.|| ||

Suhadamittā|| ||

[9] [187] cattāro'me gahapatiputta mittā suhadā veditabbā:||
upakāro mitto suhado veditabbo,||
samānasukhadukkho mitto suhado veditabbo,||
atthakkhāyī mitto suhado veditabbo,||
anukampako mitto suhado veditabbo.|| ||

Catūhi kho gahapatiputta ṭhānehi upakāro mitto suhado veditabbo.|| ||

Pamattaɱ rakkhati,||
pamattassa sāpateyyaɱ rakkhati,||
bhītassa saraṇaɱ hoti,||
uppanne kiccakaraṇīye taddiguṇaɱ bhogaɱ anuppadeti.|| ||

Imehi kho gahapatiputta catūhi ṭhānehi upakāro mitto suhado veditabbo.|| ||

Catūhi kho gahapatiputta ṭhānehi samānasukhadukkho mitto suhado veditabbo:||
guyhamassa ācikkhati,||
guyhamassa parigūhati,||
āpadāsu na vijahati,||
jīvitampi'ssa atthāya pariccattaɱ hoti.|| ||

Imehi kho gahapatiputta catūhi ṭhānehi samānasukhadukkho mitto suhado veditabbo.|| ||

Catūhi kho pana gahapatiputta ṭhānehi atthakkhāyī mitto suhado veditabbo:||
pāpā nivāreti,||
kalyāṇe niveseti,||
assutaɱ sāveti,||
saggassa maggaɱ ācikkhati.|| ||

Imehi kho gahapatiputta catūhi ṭhānehi atthakkhāyī mitto suhado veditabbo.|| ||

Catūhi kho pana gahapatiputta ṭhānehi ānukampako mitto suhado veditabbo:||
abhavenassa na nandati,||
bhavenassa nandati,||
avaṇṇaɱ bhaṇamānaɱ nivāreti,||
vaṇṇaɱ bhaṇamānaɱ pasaɱsati.|| ||

Imehi kho gahapatiputta catūhi ṭhānehi ānukampako mitto suhado veditabbo" ti.|| ||

Idam avoca Bhagavā.|| ||

Idaɱ vatvā sugato,||
athāparaɱ etad avoca satthā:|| ||

[10] [188] "Upakāro ca yo mitto yo ca mitto sukhe dukhe||
Atthakkhāyī ca yo mitato yo ca mitto'nukampako.|| ||

Etepi mitte cattāro iti viññāya paṇḍito||
Sakkaccaɱ payirupāseyya mātā puttaɱ'va orasaɱ.|| ||

Paṇḍito sīlasampanno jalaɱ aggī va bhāsati||
Bhoge saɱharamānassa bhamarasseva irīyato||
Bhogā sannicayaɱ yanti vammiko'vupacīyatī.|| ||

Evaɱ bhoge samāhatvā alamatto kule gihī||
Catudhā vibhaje bhoge sa ve mittāni ganthati.|| ||

Ekena bhoge bhuñjeyya dvīhi kammaɱ payojaye||
Catutthañca nidhāpeyya āpadāsu bhavissatī" ti.|| ||

Chaddisāpaṭicchādanaɱ|| ||

[11] Kathañ ca gahapatiputta ariyasāvako chaddisāpaṭicchādī hoti?|| ||

Chayimā gahapatiputta disā veditabbā: puratthimā disā mātā-pitaro veditabbā.|| ||

Dakkhiṇā [189] disā ācariyā veditabbā.|| ||

Pacchimā disā puttadārā veditabbā. Uttarā disā mittāmaccā veditabbā.|| ||

Heṭṭhimā disā dāsakammakarā veditabbā. Uparimā disā samaṇa-brāhmaṇā veditabbā.|| ||

Pañcahi kho gahapatiputta ṭhānehi puttena puratthimā disā mātā-pitaro paccupaṭṭhātabbā:||
bhato nesambharissāmi1,||
kiccaɱ n'esaɱ karissāmi,||
kulavaɱsaɱ ṭhapessāmi,||
dāyajjaɱ paṭipacchāmi,||
atha vā pana petānaɱ kālakatānaɱ dakkhiṇaɱ anuppadassāmī" ti.|| ||

Imehi kho gahapatiputta pañcahi ṭhānehi puttena puratthimā disā mātā-pitaro paccupaṭṭhitā pañcahi ṭhānehi puttaɱ anukampanti:||
pāpā nivārenti,||
ka'yāṇe nivesenti,||
sippaɱ sikkhāpenti,||
patirūpena dārena saɱyojenti,||
samaye dāyajjaɱ niyyātenti.|| ||

Imehi kho gahapatiputta pañcahi ṭhānehi puttena puratthimā disāmātā-pitaro paccupaṭṭhitā imehi pañcahi ṭhānehi puttaɱ anukampanti.|| ||

Evamassa esā puratthimā disā paṭicchannā hoti khemā appaṭibhayā.|| ||

[12] Pañcahi kho gahapatiputta ṭhānehi antevāsinā dakkhiṇā disā ācariyā paccupaṭṭhātabbā:||
uṭṭhānena,||
upaṭṭhānena,||
sussūsāya,||
pāricariyāya,||
sakkaccaɱ sippapaṭiggahaṇena.|| ||

Imehi kho gahapatiputta pañcahi ṭhānehi antevāsinā dakkhiṇā disā ācariyā paccupaṭṭhitā,||
pañcahi ṭhānehi antevāsiɱ anukampanti:||
suvinītaɱ vinenti,||
suggahitaɱ gāhāpenti,||
sabbasippasutaɱ samakkhāyino bhavanti,||
mittāmaccesu paṭiyādenti5,||
disāsu parittānaɱ karonti.|| ||

Imehi kho gahapatiputta pañcahi ṭhānehi antevāsinā [190] dakkhiṇā disā ācariyā paccupaṭṭhitā,||
imehi pañcahi ṭhānehi antevāsiɱ anukampanti.|| ||

Evamassa esā dakkhiṇā disā paṭicchannā hoti khemā appaṭibhayā.|| ||

[13] Pañcahi kho gahapatiputta ṭhānehi sāmikena pacchimā disā bhariyā paccupaṭṭhātabbā:||
sammānanāya,||
anavamānanāya,||
anaticariyāya,||
issariyavossaggena,||
alaŋkārānuppadānena.|| ||

Imehi kho gahapatiputta pañcahi ṭhānehi sāmikena pacchimā disā bhariyā paccupaṭṭhitā,||
pañcahi ṭhānehi sāmikaɱ anukampati:||
susaɱvihitakammantā ca hoti,||
susaɱgahitaparijanā ca,||
anaticārinī ca,||
sambhataɱ anurakkhati,||
dakkhā ca hoti analasā sabbakiccesu.|| ||

Imehi kho gahapatiputta pañcahi ṭhānehi sāmikena pacchimā disā bhariyā paccupaṭṭhitā imehi pañcahi ṭhānehi sāmikaɱ anukampati.|| ||

Evamassa esā pacchimā disā paṭicchannā hoti khemā appaṭibhayā.|| ||

[14] Pañcahi kho gahapatiputta ṭhānehi kulaputtena uttarā disā mittāmaccā paccupaṭṭhātabbā:||
dānena,||
peyyavajjena,||
atthacariyāya,||
samānattatāya,||
avisavādanatāya.|| ||

Imehi kho gahapatiputta pañcahi ṭhānehi kulaputtena uttarā disā mittāmaccā paccupaṭṭhitā pañcahi ṭhānehi kulaputtaɱ anukampanti:||
pamattaɱ rakkhanti,||
pamattassa sāpateyyaɱ rakkhanti,||
bhītassa saraṇaɱ honti,||
āpadāsu na vijahanti,||
aparapajā c'assa paṭipūjenti.|| ||

Imehi kho gahapatiputta pañcahi ṭhānehi kulaputtena uttarā disā mittāmaccā paccupaṭṭhitā imehi pañcahi ṭhānehi kulaputtaɱ anukampanti.|| ||

Evamassa esā uttarā disā paṭicchannā hoti khemā appaṭibhayā.|| ||

[15] Pañcahi kho gahapatiputta ṭhānehi ayirakena [191] heṭṭhimā disā dāsakammakarā paccupaṭṭhātabbā:||
yathābalaɱ kammantasaɱvidhānena,||
bhattavetanānuppadānena,||
gilānupaṭṭhānena,||
acchariyānaɱ rasānaɱ saɱvibhāgena,||
samaye vossaggena.|| ||

Imehi kho gahapatiputta pañcahi ṭhānehi ayirakena heṭṭhimā disā dāsakammakarā paccupaṭṭhitā pañcahi ṭhānehi ayirakaɱ anukampanti.|| ||

Pubbuṭṭhāyino ca honti,||
pacchānipātino ca,||
dinnādāyino ca,||
sukatakammakarā ca,||
kittivaṇṇaharā ca.|| ||

Imehi kho gahapatiputta pañcahi ṭhānehi ayirakena heṭṭhimā disā dāsakammakarā paccupaṭṭhitā imehi pañcahi ṭhānehi ayirakaɱ anukampanti.|| ||

Evamassa esā heṭṭhimā disā paṭicchannā hoti khemā appaṭibhayā.|| ||

[16] Pañcahi kho gahapatiputta ṭhānehi kulaputtena uparimā disā samaṇa-brāhmaṇā paccupaṭṭhātabbā:||
mettena kāyakammena,||
mettena vacīkammena,||
mettena manokammena,||
anāvaṭadvaratāya,||
āmisānuppadānena.|| ||

Imehi kho gahapatiputta pañcahi ṭhānehi kulaputtena uparimā disā samaṇa-brāhmaṇā paccupaṭṭhitā chahi ṭhānehi kulaputtaɱ anukampanti.|| ||

Pāpā nivārenti,||
kalyāṇe nivesenti,||
kalyāṇena manasā anukampanti,||
assutaɱ sāventi,||
sutaɱ pariyodapenti,||
saggassa maggaɱ ācikkhanti.|| ||

Imehi kho gahapatiputta chahi ṭhānehi kulaputtena uparimā disā samaṇabuhmaṇā paccupaṭṭhitā imehi chabhi ṭhānehi kulaputtaɱ anukampanti.|| ||

Evamassa esā uparimā disā paṭicchannā hoti khemā appaṭibhayā" ti.|| ||

Idam avoca Bhagavā.|| ||

Idaɱ vatvā sugato athāparaɱ etad avoca satthā:|| ||

[17] "Mātāpitā disā pubbā ācariyā dakkhiṇā disā||
[192] puttadārā disā paccā mittāmaccā ca uttarā.||
Dāsakammakarā heṭṭhā uddhaɱ samaṇa-brāhmaṇā||
Etā disā namasseyya alamatto kule gihī.||
Paṇḍito sīlasampanno sanho ca paṭibhānavā,||
Nivātavutti atthaddho tādiso labhate yasaɱ.||
Uṭṭhānako analaso āpadāsu na vedhati,||
Acchinnavutti medhāvī tādiso labhate yasaɱ.||
Saŋgāhako mittakaro vadaññū vītamaccharo,||
Netā vinetā anunetā tādiso labhate yasaɱ.||
Dānañca peyyavajjañca atthacariyā ca yā idha,||
Samānattatā ca dhammesu tattha tattha yathārahaɱ.||
Ete kho saŋgahā loke rathassāṇī'va yāyato,||
Ete ca saŋgahā nāssu na mātā puttakāraṇā,||
Labhetha mānaɱ pūjaɱ vā pitā vā puttakāraṇā.||
Yasmā ca saŋgahe ete samavekkhanti1 paṇḍitā,||
[193] tasmā mahattaɱ papponti pāsaɱsā ca bhavanti te" ti.|| ||

[18] Evaɱ vutte sigālako gahapatiputto Bhagavantaɱ etad avoca:||
abhikkantaɱ bhante,||
abhikkantaɱ bhante. seyyathā pi bhante nikkujjitaɱ vā ukkujjeyya,||
paṭicchannaɱ vā vivareyya,||
mūḷhassa vā maggaɱ ācikkheyya,||
adhakāre vā telapajjotaɱ dhāreyya cakkhumanto rūpāni dakkhantīti,||
evam eva Bhagavatā aneka-pariyāyena dhammo pakāsito.|| ||

Esāhaɱ bhante Bhagavantaɱ saraṇaɱ gacchāmi,||
dhammañca bhikkhusaŋgañca.|| ||

Upāsakaɱ maɱ Bhagavā dhāretu ajjatagge pāṇupetaɱ saraṇaɱ gatanti.|| ||

Sigāla Suttaɱ niṭṭhitaɱ aṭṭhamaɱ|| ||


Contact:
E-mail
Copyright Statement   Webmaster's Page