Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
I. Mūlapaṇṇāsa
5. Cūḷa Yamaka Vagga

Sutta 50

Māra Tajjaniya Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][upal] Evaɱ me sutaɱ:|| ||

Ekaɱ samayaɱ āyasmā Mahā Moggallāno Bhaggesu viharati Suɱsumāragire Bhesakaḷāvane Migadāye.|| ||

Tena kho pana samayena āyasmā Mahā Moggallāno abbhokāse caŋkamati.|| ||

2. Tena kho pana samayena Māro pāpimā āyasmato Mahā Moggallānassa kucchigato hoti koṭṭhamanupaviṭṭho.|| ||

Atha kho āyasmato Mahā Moggallānassa etad ahosi:|| ||

Kin nu kho me kucchi garugaru viya māsācitaɱ maññe ti.|| ||

Atha kho āyasmā Mahā Moggallāno caŋkamā orohitvā vihāraɱ pavisitvā paññatte āsane nisīdi.|| ||

Nisajja kho āyasmā Mahā Moggallāno paccattaɱ yoniso manasākāsi.|| ||

3. Addasā kho āyasmā Mahā Moggallāno Māraɱ pāpimantaɱ kucchigataɱ koṭṭham-anupaviṭṭhaɱ,||
disvāna Māraɱ pāpimantaɱ etad avoca:|| ||

Nikkhama pāpima,||
nikkhama pāpima,||
mā Tathāgataɱ vihesesi||
mā Tathāgatasāvakaɱ.|| ||

Mā te ahosi dīgha-rattaɱ ahitāya dukkhāyāti.|| ||

4. Atha kho Mārassa pāpimato etad ahosi:|| ||

"Ajānam eva kho maɱ ayaɱ samaṇo apassaɱ evam āha:|| ||

'Nikkhama pāpima,||
nikkhama pāpima,||
mā Tathāgataɱ vihesesi||
mā Tathāgatasāvakaɱ.|| ||

Mā te ahosi dīgha-rattaɱ ahitāya dukkhāyā' ti.|| ||

Yo pi'ssa so satthā,||
so pi maɱ n'eva khippaɱ jāneyya,||
kuto pana maɱ ayaɱ sāvako jānissatī" ti.|| ||

5. Atha kho āyasmā Mahā Moggallāno Māraɱ pāpimantaɱ etad avoca:|| ||

"Evam pi kho tāhaɱ pāpima jānāmi,||
mā tvaɱ maññittho:||
na maɱ jānātī ti||
Māro tvam asi pāpima.|| ||

Tuyhaɱ hi pāpima evaɱ hoti:|| ||

'Ajānam eva kho maɱ ayaɱ samaṇo apassaɱ evam āha:|| ||

Nikkhama pāpima,||
nikkhama pāpima,||
mā Tathāgataɱ vihesesi,||
mā Tathāgatasāvakaɱ.|| ||

Mā te ahosi dīgha-rattaɱ ahitāya dukkhāyā' ti.|| ||

Yo pi'ssa so satthā,||
so pi maɱ n'eva khippaɱ jāneyya,||
kuto pana maɱ ayaɱ sāvako jānissatī" ti.|| ||

6. Atha kho Mārassa pāpimato etad ahosi:|| ||

Jānam eva kho maɱ ayaɱ samaṇo passaɱ evam āha:|| ||

Nikkhama pāpima,||
nikkhama pāpima,||
mā Tathāgataɱ vihesesi,||
mā Tathāgatasāvakaɱ.|| ||

Mā te ahosi dīgha-rattaɱ ahitāya dukkhāyāti.|| ||

Atha kho Māro pāpimā [333] āyasmato Mahā Moggallānassa mukhato uggantvā paccaggaḷe aṭṭhāsi.|| ||

7. Addasā kho āyasmā Mahā Moggallāno Māraɱ pāpimantaɱ paccaggaḷe ṭhitaɱ||
disvāna Māraɱ pāpimantaɱ etad avoca:|| ||

Ettha pi kho tāhaɱ, pāpima passāmi,||
mā tvaɱ maññattho:|| ||

Na maɱ passatī ti.|| ||

Eso tvaɱ pāpima paccaggaḷe ṭhito.|| ||

8. Bhūtapubbāhaɱ pāpima Dūsī nāma māro ahosiɱ.|| ||

Tassa me Kāḷī nāma bhaginī tassā tvaɱ putto.|| ||

So me tvaɱ bhāgineyyo hosi.|| ||

Tena kho pana pāpima samayena Kakusandho Bhagavā arahaɱ Sammāsambuddho loke uppanno hoti.|| ||

Kakusandhassa kho pana pāpima Bhagavato arahato Sammā-sambuddhassa Vidhura-Sañjīva nāma sāvakayugaɱ ahosi aggaɱ bhaddayugaɱ.|| ||

Yāvatā kho pana pāpima Kakusandhassa Bhagavato arahato Sammā-sambuddhassa sāvakā,||
nāssu'dha koci āyasmatā Vidhurena samasamo hoti yad idaɱ dhammadesanāya.|| ||

Iminā kho etaɱ pāpima pariyāyena āyasmato Vidhurassa Vidhūro Vidhūro t'veva samaññā udapādi.|| ||

Āyasmā pana pāpima Sañjīvo araññagato pi rukkhamūlagato pi suññāgāragato pi appakasiren'eva saññā-vedayita-nirodhaɱ samāpajjati.|| ||

Bhūtapubbaɱ pāpima āyasmā Sañjīvo aññatarasmiɱ rukkhamūle saññā-vedayita-nirodhaɱ samāpanno nisinno hoti.|| ||

Addasaɱsu kho pāpima gopālakā pasupālakā kassakā pathāvino āyasmantaɱ Sañjīvaɱ aññatarasmiɱ rukkhamūle saññā-vedayita-nirodhaɱ samāpajjitvā nisinnaɱ||
disvāna n'esaɱ etad ahosi:|| ||

Acchariyaɱ vata bho,||
abbhutaɱ vata bho,||
ayaɱ samaṇo nisinnako va kālakato,||
handa naɱ dahāmāti.|| ||

Atha kho te pāpima gopālakā pasupālakā kassakā pathāvino tiṇañ ca kaṭṭhañ ca gomayañ ca saŋkaḍḍhitvā āyasmato Sañjīvassa kāye upacinitvā aggiɱ datvā pakkamiɱsu.|| ||

Atha kho pāpima āyasmā Sañjīvo tassā rattiyā accayena tāya samāpattiyā vuṭṭhahitvā cīvarāni papphoṭetvā pubbaṇha-samayaɱ nivāsetvā pattacīvaraɱ ādāya gāmaɱ piṇḍāya pāvisi.|| ||

Addasaɱsu kho te pāpima gopālakā pasupālakā kassakā pathāvino āyasmantaɱ Sañjīvaɱ piṇḍāya carantaɱ||
disvāna n'esaɱ etad ahosi:|| ||

Acchariyaɱ vata bho,||
abbhutaɱ vata bho,||
ayaɱ samaṇo nisinnako va kālakato,||
svāyaɱ patisañjīvito [334] ti.|| ||

Iminā kho etaɱ pāpima pariyāyena āyasmato Sañjīvassa Sañjīvo Sañjīvo t'veva samaññā udapādi.|| ||

9. Atha kho pāpima Dūsissa Mārassa etad ahosi:|| ||

Imesaɱ kho ahaɱ bhikkhūnaɱ sīlavantānaɱ kalyāṇa-dhammānaɱ n'eva jānāmi āgatiɱ vā gatiɱ vā.|| ||

Yan nūnāhaɱ brāhmaṇa-gahapatike anvāviseyyaɱ:|| ||

Etha tumhe bhikkhū sīlavante kalyāṇa-dhamme akkosatha paribhāsatha rosetha vihesetha.|| ||

App'eva nāma tumhehi akkosiyamānānaɱ paribhāsiyamānānaɱ rosiyamānānaɱ vihesiyamānānaɱ siyā cittassa aññathattaɱ,||
yathā taɱ Dūsī Māro labhetha otāran ti.|| ||

Atha kho te pāpima Dūsī Māro brāhmaṇa gahapatike anvāvisi:|| ||

Etha tumhe, bhikkhū sīlavante kalyāṇa-dhamme akkosatha paribhāsatha rosetha vihesetha.|| ||

App'eva nāma tumhehi akkosiyamānānaɱ paribhāsiyamānānaɱ rosiyamānānaɱ vihesiyamānānaɱ siyā cittassa aññathattaɱ,||
yathā taɱ Dūsī Māro labhetha otāran ti.|| ||

10. Atha kho te pāpima brāhmaṇa-gahapatikā anvāviṭṭhā Dūsinā Mārena bhikkhū sīlavante kalyāṇa-dhamme akkosanti paribhāsanti rosenti vihesenti:|| ||

"Ime pana muṇḍakā samaṇakā ibbhā kiṇhā bandhupādāpaccā||
'jhāyino'smā jhāyino'smā' ti||
pattakkhandhā adhomukhā madhurakajātā jhāyanti pajjhāyanti nijjhāyanti apajjhāyanti.|| ||

Seyyathā pi nāma ulūko rukkhasākhāya mūsikaɱ magayamāno jhāyati pajjhāyati nijjhāyati apajjhāyati,||
evam ev'ime muṇḍakā samaṇakā ibbhā kiṇhā bandhupādāpaccā:||
'jhāyino'smā jhāyino'smā' ti||
pattakkhandhā adhomukhā madhurakajātā jhāyanti pajjhāyanti nijjhāyanti apajjhāyanti.|| ||

Seyyathā pi nāma kotthu nadītīre macche magayamāno jhāyati pajjhāyati nijjhāyati apajjhāyati,||
evam ev'ime muṇḍakā samaṇakā ibbhā kiṇhā bandhupādāpaccā||
'jhāyino'smā jhāyino'smā' ti||
pattakkhandhā adhomukhā madhurakajātā jhāyanti pajjhāyanti nijjhāyanti apajjhāyanti.|| ||

Seyyathā pi nāma biḷāro sandhisamalasaŋkaṭīre mūsikaɱ magayamāno jhāyati pajjhāyati nijjhāyati apajjhāyati,||
evam ev'ime muṇḍakā samaṇakā ibbhā kiṇhā bandhupādāpacca||
'jhāyino'smā jhāyino'smā' ti||
pattakkhandhā adhomukhā madhurakajātā jhāyanti pajjhāyanti nijjhāyanti apajjhāyanti.|| ||

Seyyathā pi nāma gadrabho vahacchinno sandhisamalasaŋkaṭīre jhāyati pajjhāyati nijjhāyati apajjhāyati,||
evam ev'ime muṇḍakā samaṇakā ibbhā kiṇhā bandhupādāpaccā||
'jhāyino'smā, jhāyino'smā' ti||
pattakkhandhā adhomukhā madhurakajātā jhāyanti pajjhāyanti nijjhāyanti apajjhāyantī" ti.|| ||

Ye kho pana pāpima tena samayena manussā kālaɱ karonti,||
yebhuyyena kāyassa bhedā param maraṇā apāyaɱ duggatiɱ vinipātaɱ Nirayaɱ upapajjanti.|| ||

[335] 11. Atha kho pāpima Kakusandho Bhagavā arahaɱ Sammāsambuddho bhikkhū āmantesi:|| ||

Anvāviṭṭhā kho bhikkhave brāhmaṇa-gahapatikā Dūsinā Mārena:|| ||

'Etha tumhe, bhikkhū,||
sīlavante kalyāṇa-dhamme akkosatha paribhāsatha rosetha vihesetha.|| ||

App'eva nāma tumhehi akkosiyamānānaɱ paribhāsiyamānānaɱ rosiyamānānaɱ vihesiyamānānaɱ siyā cittassa aññathattaɱ yathā taɱ Dūsī Māro labhetha otāran ti.|| ||

Etha tumhe bhikkhave mettā-sahagatena cetasā ekaɱ disaɱ pharitvā viharatha,||
tathā dutiyaɱ, tathā tatiyaɱ, tathā catutthiɱ,||
iti uddham-adho tiriyaɱ sabbadhi sabbattatāya sabbāvantaɱ lokaɱ mettā-sahagatena cetasā vipulena mahaggatena appamāṇena averena abyāpajjhena pharitvā viharatha.|| ||

Karuṇāsahagatena cetasā ekaɱ disaɱ pharitvā viharatha,||
tathā dutiyaɱ, tathā tatiyaɱ, tathā catutthiɱ,||
iti uddham-adho tiriyaɱ sabbadhi sabbattatāya sabbāvantaɱ lokaɱ karuṇā-sahagatena cetasā vipulena mahaggatena appamāṇena averena abyāpajjhena pharitvā viharatha.|| ||

Muditāsahagatena cetasā ekaɱ disaɱ pharitvā viharatha,||
tathā dutiyaɱ, tathā tatiyaɱ, tathā catutthiɱ,||
iti uddham-adho tiriyaɱ sabbadhi sabbattatāya sabbāvantaɱ lokaɱ muditā-sahagatena cetasā vipulena mahaggatena appamāṇena averena abyāpajjhena pharitvā viharatha.|| ||

Upekkhāsahagatena cetasā ekaɱ disaɱ pharitvā viharatha,||
tathā dutiyaɱ, tathā tatiyaɱ, tathā catutthiɱ,||
iti uddham-adho tiriyaɱ sabbadhi sabbattatāya sabbāvantaɱ lokaɱ upekkhā-sahagatena cetasā vipulena mahaggatena appamāṇena averena abyāpajjhena pharitvā viharathāti.|| ||

12. Atha kho te pāpima bhikkhū Kakusandhena Bhagavatā arahatā sammāsambuddhena evaɱ ovadiyamānā evaɱ anusāsiyamānā araññagatā pi, rukkhamūlagatā pi, suññāgāragatā pi mettā-sahagatena cetasā ekaɱ disaɱ pharitvā vihariɱsu||
tathā dutiyaɱ, tathā tatiyaɱ, tathā catutthiɱ,||
iti uddham-adho tiriyaɱ sabbadhi sabbattatāya sabbāvantaɱ lokaɱ mettā-sahagatena cetasā vipulena mahaggatena appamāṇena averena abyāpajjhena pharitvā vihariɱsu.|| ||

Karuṇā-sahagatena cetasā ekaɱ disaɱ pharitvā vihariɱsu,||
tathā dutiyaɱ, tathā tatiyaɱ, tathā catutthiɱ,||
iti uddham-adho tiriyaɱ sabbadhi sabbattatāya sabbāvantaɱ lokaɱ karuṇā-sahagatena cetasā vipulena mahaggatena appamāṇena averena abyāpajjhena pharitvā vihariɱsu.|| ||

Muditā-sahagatena cetasā ekaɱ disaɱ pharitvā vihariɱsu,||
tathā dutiyaɱ, tathā tatiyaɱ, tathā catutthiɱ,||
iti uddham-adho tiriyaɱ sabbadhi sabbattatāya sabbāvantaɱ lokaɱ muditā-sahagatena cetasā vipulena mahaggatena appamāṇena averena abyāpajjhena pharitvā vihariɱsu.|| ||

Upekkhāsahagatena cetasā ekaɱ disaɱ pharitvā vihariɱsu,||
tathā dutiyaɱ, tathā tatiyaɱ, tathā catutthiɱ,||
iti uddham-adho tiriyaɱ sabbadhi sabbattatāya sabbāvantaɱ lokaɱ upekkhā-sahagatena cetasā vipulena mahaggatena appamāṇena averena abyāpajjhena pharitvā vihariɱsu.|| ||

13. Atha kho pāpima Dūsissa Mārassa etad ahosi:|| ||

"Evam pi kho ahaɱ karonto imesaɱ bhikkhūnaɱ sīlavantānaɱ kalyāṇa-dhammānaɱ n'eva jānāmi āgatiɱ vā gatiɱ vā.|| ||

Yan nūnāhaɱ brāhmaṇa-gahapatike anvāviseyyaɱ:|| ||

Etha tumhe, bhikkhū sīlavante kalyāṇa-dhamme sakkarotha garukarotha mānetha [336] pūjetha,||
app'eva nāma tumhehi sakkarīyamānānaɱ garukarīyamānānaɱ māniyamānānaɱ pūjiyamānānaɱ siyā cittassa aññathattaɱ yathā naɱ Dūsī Māro labhetha otāran ti.|| ||

14. Atha kho te pāpima Dūsī Māro brāhmaṇa-gahapatike anvāvisi:|| ||

Etha tumhe, bhikkhū sīlavante kalyāṇa-dhamme sakkarotha garukarotha mānetha pūjetha.|| ||

App'eva nāma tumhehi sakkarīyamānānaɱ garukarīyamānānaɱ māniyamānānaɱ pūjiyamānānaɱ siyā cittassa aññathattaɱ yathā naɱ Dūsī Māro labhetha otāran ti.|| ||

Atha kho te pāpima brāhmaṇa-gahapatikā anvāviṭṭhā Dūsinā Mārena bhikkhū sīlavante kalyāṇa-dhamme sakkaronti garukaronti mānenti pūjenti.|| ||

Ye kho pana pāpima tena samayena manussā kālaɱ karonti,||
yebhuyyena kāyassa bhedā param maraṇā sugatiɱ saggaɱ lokaɱ upapajjanti.|| ||

15. Atha kho pāpima,||
Kakusandho Bhagavā arahaɱ Sammāsambuddho bhikkhū āmantesi:|| ||

Anvāviṭṭhā kho bhikkhave brāhmaṇa-gahapatikā Dūsinā Mārena:|| ||

"Etha tumhe, bhikkhū sīlavante kalyāṇa-dhamme sakkarotha garukarotha mānetha pūjetha.|| ||

App'eva nāma tumhehi sakkarīyamānānaɱ garukarīyamānānaɱ māniyamānānaɱ pūjiyamānānaɱ siyā cittassa aññathattaɱ yathā taɱ1 Dūsī Māro labhetha otāran ti."|| ||

Etha tumhe bhikkhave, asubhānupassī kāye viharatha,||
āhāre paṭikkūlasaññino,||
sabbaloke anabhiratasaññino,||
sabbasankhāresu aniccānupassino ti.|| ||

16. Atha kho te pāpima,||
bhikkhū Kakusandhena Bhagavatā arahatā Sammāsambuddhena evaɱ ovadiyamānā evaɱ anusāsiyamānā araññagatā pi, rukkhamūlagatā pi, suññāgāragatā pi||
asubhānupassī kāye vihariɱsu,||
āhāre paṭikkūlasaññino,||
sabbaloke anabhiratasaññino,||
sabbasaɱkhāresu aniccānupassino.|| ||

17. Atha kho pāpima, Kakusandho Bhagavā arahaɱ Sammāsambuddho pubbaṇha-samayaɱ nivāsetvā pattacīvaraɱ ādāya āyasmatā Vidhurena pacchā samaṇena gāmaɱ piṇḍāya pāvisi.|| ||

Atha kho pāpima Dūsī Māro aññataraɱ kumāraɱ anvāvisitvā sakkharaɱ gahetvā āyasmato Vidhurassa sīse pahāraɱ adāsi,||
sisaɱ vobhindi.|| ||

Atha kho pāpima āyasmā Vidhūro bhinnena sīsena lohitena gaḷantena Kakusandhaɱ yeva [337] Bhagavantaɱ arahantaɱ Sammāsambuddhaɱ piṭṭhito piṭṭhito anubandhi.|| ||

Atha kho pāpima Kakusandho Bhagavā arahaɱ Sammāsambuddho nāgāpalokitaɱ apalokesi:|| ||

Na cāyaɱ Dūsī Māro mattam aññāsīti.|| ||

Sahāpalokanāya ca pana pāpima Dūsī Māro tamhā ca ṭhānā cavi,||
mahānirayañ ca upapajjī.|| ||

18. Tassa kho pana pāpima mahānirayassa tayo nāmadheyyā honti:|| ||

Chaphassāyataniko iti pi,||
saŋkusamāhato iti pi,||
paccattavedaniyo iti pi.|| ||

Atha kho maɱ pāpima nirayapālā upasaŋkamitvā etad avocuɱ:|| ||

Yadā kho te mārisa saŋkunā saŋku hadaye samāgaccheyya.|| ||

Atha naɱ ājāneyyāsi:||
'vassasahassaɱ me niraye paccamānassā' ti.|| ||

So kho ahaɱ pāpima bahūni vassāni||
bahūni vassasatāni||
bahūni vassasahassāni||
tasmiɱ mahāniraye apacciɱ,||
dasa vassasahassāni tass'eva mahānirayassa ussade apacciɱ vuṭṭhānimaɱ nāma vedanaɱ vediyamāno.|| ||

Tassa mayhaɱ pāpima evarūpo kāyo hoti seyyathā pi manussassa,||
evarūpaɱ sīsaɱ hoti seyyathā pi macchassa.|| ||

 

Kīdiso nirayo āsi yattha Dūsī apaccatha.||
Vidhuraɱ sāvakam-āsajja Kakusandhañ ca brāhmaṇaɱ:|| ||

Sataɱ āsi ayosaŋku, sabbe paccattavedanā,||
īdiso nirayo āsi yattha Dūsī apaccatha,||
Vidhuraɱ sāvakam-āsajja Kakusandhañ ca brāhmaṇaɱ.|| ||

Yo etam-abhijānāti bhikkhu Buddhassa sāvako,||
Tādisaɱ bhikkhum-āsajja Kaṇha dukkhaɱ nigacchasi.|| ||

Majjhe sarassa tiṭṭhanti vimānā kappaṭhāyino,||
Veḷuriyavaṇṇā rucirā accimanto pabhassarā,||
Accharā tattha naccanti puthu nānattavaṇṇiyo.|| ||

Yo etam-abhijānāti bhikkhu Buddhassa sāvako,||
Tādisaɱ bhikkhum-āsajja Kaṇha dukkhaɱ nigacchasi.|| ||

Yo ve Buddhena cudito bhikkhu-saŋghassa pekkhato,||
Migāramātu pāsādaɱ pādaŋguṭṭhena kampayī.|| ||

Yo etam-abhijānāti bhikkhu Buddhassa sāvako,||
Tādisaɱ bhikkhum-āsajja Kaṇha dukkhaɱ nigacchasi.|| ||

Yo Vejayan taɱ pāsādaɱ pādaŋguṭṭhena kampayī,||
Iddhibalen'upatthaddho saɱvejesi ca devatā.|| ||

[338] Yo etam-abhijānāti bhikkhu Buddhassa sāvako,||
Tādisaɱ bhikkhum-āsajja Kaṇha dukkhaɱ nigacchasi.|| ||

Yo Vejayante pāsāde Sakkaɱ so paripucchati,||
Api āvuso jānāsi taṇhakkhayavimuttiyo||
Tassa Sakko viyākāsi pañhaɱ puṭṭho yathātathaɱ.|| ||

Yo etam-abhijānāti bhikkhu Buddhassa sāvako,||
Tādisaɱ bhikkhum-āsajja Kaṇha dukkhaɱ nigacchasi.|| ||

Yo Brahmānaɱ paripucchati Sudhammāyaɱ abhito sabhaɱ||
'Ajjā pi te āvuso diṭṭhi yā te diṭṭhi pure ahū,||
Passasi vītivattantaɱ Brahmaloke pabhassaraɱ'.|| ||

Tassa Brahmā viyākāsi anupubbaɱ yathātathaɱ:||
'Na me mārisa sā diṭṭhi yā me diṭṭhi pure ahu.|| ||

Passāmi vītivattantaɱ Brahmaloke pabhassaraɱ,||
So'haɱ ajja kathaɱ vajjaɱ: ahaɱ nicco'mhi sassato.'|| ||

Yo etam-abhijānāti bhikkhu Buddhassa sāvako,||
Tādisaɱ bhikkhum-āsajja Kaṇha dukkhaɱ nigacchasi.|| ||

Yo Mahāneruno kūṭaɱ vimokhena aphassayi,||
Vanaɱ Pubbavidehānaɱ, ye ca bhūmisayā narā.|| ||

Yo etam-abhijānāti bhikkhu Buddhassa sāvako,||
Tādisaɱ bhikkhum-āsajja Kaṇha dukkhaɱ nigacchasi.|| ||

Na ve aggi cetayati: ahaɱ bālaɱ ḍahāmi tī,||
Bālo va jalitaɱ aggiɱ āsajjana sa ḍayhati.|| ||

Evam eva tuvaɱ Māra āsajjana Tathāgataɱ,||
Sayaɱ ḍahi'ssasi attānaɱ, bālo aggiɱ va samphusaɱ.|| ||

Apuññaɱ pasavī Māro āsajjana Tathāgataɱ,||
Kin nu maññasi pāpima: na me pāpaɱ vipaccati.|| ||

Karoto cīyati pāpaɱ cirarattāya Andatitaka,||
Māra nibbinda Buddhamhā, āsaɱ mā kāsi bhikkhusu.|| ||

Iti Māraɱ aghaṭṭesi bhikkhu Bhesakaḷāvane,||
Tato so dummano yakkho tatth'ev'antaradhāyathāti.

MĀRATAJJANIYA SUTTAṂ DASAMAṂ

CŪḶAYAMAKAVAGGO PAÑCAMO

MŪLAPAṆṆĀSAṂ NIṬṬHITAṂ


Contact:
E-mail
Copyright Statement   Webmaster's Page