Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
III. Upari Paṇṇāsa
5. Saḷāyatana Vagga

Sutta 143

Anāthapiṇḍik'ovāda Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][than][upal] Evaɱ me sutaɱ:

Ekaɱ samayaɱ Bhagavā Sāvatthīyaɱ viharati Jetavane Anāthapiṇḍikassa ārāme.|| ||

Tena kho pana samayena Anāthapiṇḍiko gahapati ābādhiko hoti dukkhito bāḷhagilāno.|| ||

Atha kho Anāthapiṇḍiko gahapati aññataraɱ purisaɱ āmantesi:||
'ehi tvaɱ amho purisa,||
yena Bhagavā ten'upasaŋkama,||
upasaŋkamitvā mama vacanena Bhagavato pāde sirasā vandāhi.|| ||

'Anāthapiṇḍiko bhante,||
gahapati ābādhiko dukkhito bāḷhagilāno.|| ||

'So Bhagavato pāde sirasā vandatī' ti.|| ||

Yena c'āyasmā Sāriputto ten'upasaŋkama,||
upasaŋkamitvā mama vacanena āyasmato Sāriputtassa pāde sirasā vandāhi 'Anāthapiṇḍiko bhante,||
gahapati ābādhiko dukkhito bāḷhagilāno.|| ||

So āyasmato Sāriputtassa pāde sirasā vandatī' ti.|| ||

Evañ ca vadehi:||
'sādhu kira bhante,||
āyasmā Sāriputto yena Anāthapiṇḍikassa gahapatissa nivesanaɱ ten'upasaŋkamatu anukampaɱ upādāyā' ti.|| ||

'Evaɱ bhante'ti kho so puriso Anāthapiṇḍikassa gahapatissa paṭissutvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho so puriso Bhagavantaɱ etad avoca:||
'Anāthapiṇḍiko bhante,||
gahapati ābādhiko dukkhito bāḷhagilāno,||
so Bhagavato pāde sirasā vandatī' ti.|| ||

Yena c'āyasmā Sāriputto ten'upasaŋkami.|| ||

Upasaŋkamitvā āyasmantaɱ Sāriputtaɱ abhivādetvā eka-m-antaɱ nisīdi.|| ||

Eka-m-antaɱ nisinno kho so puriso āyasmantaɱ Sāriputtaɱ etad avoca:||
'Anāthapiṇḍiko bhante,||
gahapati ābādhiko dukkhito bāḷhagilāno,||
so āyasmato Sāriputtassa pāde sirasā vandati.|| ||

Evañ ca vadeti:||
sādhu kira bhante,||
āyasmā Sāriputto yena Anāthapiṇḍikassa gahapatissa nivesanaɱ ten'upasaŋkamatu anukampaɱ upādāyā' ti.|| ||

Adhivāsesi kho āyasmā Sāriputto tuṇhī-bhāvena.|| ||

Atha kho āyasmā Sāriputto nivāsetvā pattacīvaramādāya āyasmatā Ānandena pacchāsamaṇena yena Anāthapiṇḍikassa gahapatissa nivesanaɱ ten'upasaŋkami.|| ||

Upasaŋkamitvā [259] paññatte āsane nisīdi.|| ||

Nisajja kho āyasmā Sāriputto Anāthapiṇḍikaɱ gahapatiɱ etad avoca:||
'kacci te gahapati,||
khamanīyaɱ kacci te dukkhā vedanā paṭikkamanti,||
no abhikkamanti,||
paṭikkamosānaɱ paññāyanti no abhikkamo' ti.|| ||

Na me bhante Sāriputta khamanīyaɱ,||
na yāpanīyaɱ,bā'hā me dukkhā vedanā.|| ||

Abhikkhamanti no paṭikkamanti.|| ||

Abhikkamosānaɱ paññāyati no paṭikkamo' ti.|| ||

Seyyathā pi bhante Sāriputta,||
balavā puriso tiṇhena sikharena muddhani abhimantheyya,||
evam eva kho bhante Sāriputta,||
adhimattā vātā muddhani ūhananti.|| ||

Na me bhante Sāriputta,||
khamanīyaɱ,||
na yāpanīyaɱ,||
bā'hā me dukkhā vedanā abhikkamanti no paṭikkamanti.|| ||

Abhikkamosānaɱ paññāyati no paṭikkamoti.|| ||

Seyyathā pi bhante Sāriputta,||
balavā puriso daḷhena varattabandhena1 sīse sīsaveṭhanaɱ2 dadeyya,||
evam eva kho me bhante Sāriputta,||
adhimattā vātā sīsaɱ parikantanti.|| ||

Na me bhante Sāriputta,||
khamanīyaɱ na yāpanīyaɱ,||
ba'hā me dukkhā vedanā abhikkamanti no paṭikkamanti.|| ||

Abhikkamosānaɱ paññāyati,||
no paṭikkamoti.|| ||

Seyyathā pi bhante Sāriputta,||
dakkho goghātako vā goghātakantevāsī vā tiṇhena govikantanena kucchiɱ parikanteyya,||
evam eva kho me bhante Sāriputta,||
adhimattā vātā kucchiɱ parikantanti.|| ||

Na me bhante Sāriputta,||
khamanīyaɱ na yāpanīyaɱ,||
ba'hā me dukkhā vedanā abhikkamanti no paṭikkamanti.|| ||

Abhikkamosānaɱ paññāyati no paṭikkamoti.|| ||

Seyyathā pi bhante Sāriputta,||
dve balavanto purisā dubbalataraɱ purisaɱ nānā bāhāsu gahetvā aŋgārakāsuyā santāpeyyuɱ samparitāpyeɱ,||
evam eva kho me bhante Sāriputta,||
adhimatto kāyasmiɱ ḍāho.|| ||

Na me bhante Sāriputta,||
khamanīyaɱ na yāpanīyaɱ bā'hā me dukkhā vedanā abhikkamanti no paṭikkamanti,||
abhikkamosānaɱ paññāyati no paṭikkamoti.|| ||

Tasmāt iha te gahapati,||
evaɱ sikkhitabbaɱ:||
'na cakkhuɱ upādiyissāmī.|| ||

Na ca me cakkhunissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
'na sotaɱ upādiyissāmi.|| ||

Na ca me sotanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
'na ghānaɱ upādiyissāmī.|| ||

Na ca me ghānanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
'na jivhaɱ upādiyissāmi.|| ||

Na ca me jivhanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
'na kāyaɱ upādiyissāmi.|| ||

Na ca me kāyanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
'na manaɱ upādiyissāmī.|| ||

Na ca me manonissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhītabbaɱ.|| ||

Tasmāt iha te gahapati,||
evaɱ sikkhitabba:||
'na rūpaɱ upādiyissāmi.|| ||

Na ca me rūpanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
'na saddaɱ upādiyissāmī.|| ||

Na ca me saddanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhītabbaɱ.|| ||

Tasmāt iha te gahapati,||
evaɱ sikkhitabba:||
'na gandhaɱ upādiyissāmi.|| ||

Na ca me gandhanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
'na rasaɱ upādiyissāmī.|| ||

Na ca me rasanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhītabbaɱ.|| ||

Tasmāt iha te gahapati,||
evaɱ sikkhitabba:||
'na phoṭṭhabbaɱ upādiyissāmi.|| ||

Na ca me phoṭṭhabbanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
'na dhammaɱ upādiyissāmī.|| ||

Na ca me dhammanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhītabbaɱ.|| ||

Tasmāt iha te gahapati,||
evaɱ sikkhitabba:||
'na cakkhu viññāṇaɱ upādiyissāmi.|| ||

Na ca me cakkhu-viññāṇanissitaɱ viññāṇaɱ bhavissatī'ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
'na sotaviññāṇaɱ upādiyissāmī.|| ||

Na ca me sota-viññāṇanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabba:||
'na ghānaviññāṇaɱ upādiyissāmi.|| ||

Na ca me ghāna-viññāṇanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
'na jivhāviññāṇaɱ upādiyissāmī.|| ||

Na ca me jivhā-viññāṇanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabba:||
'na kāyaviññāṇaɱ upādiyissāmi.|| ||

Na ca me kāya-viññāṇanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
'na manoviññāṇaɱ upādiyissāmī.|| ||

Na ca me mano viññāṇanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
'na cakkhusamphassaɱ upādiyissāmi.|| ||

Na ca me cakkhusamphassanissitaɱ [260] viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
'na sotasamphassaɱ upādiyissāmī.|| ||

Na ca me sotasamphassanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhītabbaɱ.|| ||

Tasmāt iha te gahapati,||
evaɱ sikkhitabbaɱ:||
'na ghānasamphassaɱ upādiyissāmi.|| ||

Na ca me ghānasamphassanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
'na jivhāsamphassaɱ upādiyissāmi.|| ||

Na ca me jivhāsamphassanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
'na kāyasamphassaɱ upādiyissāmi.|| ||

Na ca me kāyasamphassanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
'na manosamphassaɱ upādiyissāmi.|| ||

Na ca me manosamphassanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
'na cakkhusamphassajaɱ vedanaɱ upādiyissāmi.|| ||

Na ca me cakkhusamphassajavedanānissitaɱ1 viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
'na sotasamphassajaɱvedanaɱ upādiyissāmī.|| ||

Na ca me sotasamphassajavedanānissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhītabbaɱ.|| ||

Tasmāt iha te gahapati,||
evaɱ sikkhitabba:||
'na ghānasamphassajaɱ vedanaɱ upādiyissāmi.|| ||

Na ca me ghānasamphassajavedanānissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabba:||
'na jivhāsamphassajaɱ vedanaɱ upādiyissāmi.Na ca me jivhāsamphassajavedanānissitaɱ viññāṇaɱ bhavissatī' ti.|| ||

Evaɱ hi te gahapati sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
na kāyasamphassajaɱ vedanaɱ upādiyissāmi.Na ca me kāyasamphassajavedanānissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
'na manosamphassajaɱ vedanaɱ upādiyissāmi.|| ||

Na ca me manosamphassajavedanānissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

|| ||

Tasmāt iha te gahapati,||
evaɱ sikkhitabbaɱ:||
na paṭhavīdhātuɱ upādiyissāmi.|| ||

Na ca me paṭhavīdhātunissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
na āpodhātuɱ upādiyissāmi.|| ||

Na ca me āpodhātunissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
na tejodhātuɱ upādiyissāmi.|| ||

Na ca me tejodhātunissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
na vāyedhātuɱ upādiyissāmi.|| ||

Na ca me vayodhātunissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
na ākāsadhātuɱ upādiyissāmi.|| ||

Na ca me ākāsadhātunissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
na viññāṇadhātuɱ upādiyissāmi.|| ||

Na ca me viññāṇadhātunissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ na rūpaɱ upādiyissāmi.|| ||

Na ca me rūpanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
na vedanaɱ upādiyissāmi.|| ||

Na ca me vedanānissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
na saññaɱ upādiyissāmi.|| ||

Na ca me saññānissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
na sankhāre upādiyissāmi.|| ||

Na ca me sankhāranissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
na viññāṇaɱ upādiyissāmi.|| ||

Na ca me viññāṇanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
na ākāsānañcāyatanaɱ upādiyissāmi.|| ||

Na ca me ākāsānañcāyatananissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
na viññāṇañcāyatanaɱ upādiyissāmi,||
na ca me viññāṇañcāyatananissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
na ākiñcaññāyatanaɱ [261] upādiyissāmi.|| ||

Na ca me

Ākiñcaññāyatananissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
na n'eva-saññā-nāsaññāyatanaɱ upādiyissāmi.|| ||

Na ca me n'eva-saññā-nāsaññāyatananissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
na idha lokaɱ upādiyissāmi.|| ||

Na ca me idha lokanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha te gahapati,||
evaɱ sikkhitabbaɱ:||
na paralokaɱ upādiyissāmi.|| ||

Na ca me paralokanissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabbaɱ.|| ||

Tasmāt iha gahapati,||
evaɱ sikkhitabbaɱ:||
yampidaɱ1 diṭṭhaɱ sutaɱ mutaɱ viññātaɱ pattaɱ pariyesitaɱ anuvicaritaɱ3 manasā.|| ||

Tampi na upadiyissāmi.|| ||

Na ca me tannissitaɱ viññāṇaɱ bhavissatī' ti.|| ||

Evaɱ hi te gahapati,||
sikkhitabban ti.|| ||

Evaɱ vutte Anāthapiṇḍiko gahapati parodi,||
assūni pavattesi.|| ||

Atha kho āyasmā Ānando,||
Anāthapiṇḍikaɱ gahapatiɱ etad avoca:||
olīyasi kho tvaɱ gahapati,||
saɱsīdasi.|| ||

Kho tvaɱ gahapatī' ti.|| ||

Nāhaɱ bhante Ānanda,||
oliyyāmi,||
napi saɱsīdāmi.|| ||

Api ca me dīgha-rattaɱ satthā payirupāsito,||
manobhāvanīyā ca bhikkhu na ca me evarūpī dhammī kathā sutapubbā' ti.|| ||

Na kho gahapati,||
gihīnaɱ odātavasanānaɱ evarūpī dhammī kathā paṭibhāti.|| ||

Pabbajitānaɱ kho gahapati,||
evarūpī dhammī kathā paṭibhātī' ti.|| ||

Tena hi bhante Sāriputta,gihīnaɱ odātavasanānaɱ evarūpī dhammī kathā paṭibhātu.|| ||

Santi hi bhante Sāriputta,||
kulaputtā apparajakkhajātikā,||
assavaṇatā Dhammassa parihāyanti.|| ||

Bhavissanti Dhammassa aññātāro' ti.|| ||

Atha kho āyasmā ca Sāriputto āyasmā ca Ānando,||
Anāthapiṇḍikaɱ gahapatiɱ iminā ovādena ovaditvā uṭṭhāy āsanā pakkamiɱsu.|| ||

Atha kho Anāthapiṇḍiko gahapati,||
acirapakkante āyasmante ca Sāriputte āyasmante ca [262] ānande kāyassa bhedā param maraṇā tusitaɱ kāyaɱ upapajji6.|| ||

Atha kho Anāthapiṇḍiko devaputto abhikkantāya rattiyā abhikkantavaṇṇo kevalakappaɱ Jetavanaɱ obhāsetvā yena Bhagavā ten'upasaŋkami,||
upasaŋkamitvā Bhagavantaɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhito kho Anāthapiṇḍiko devaputto Bhagavantaɱ gāthāhi ajjhabhāsi:|| ||

"Idaɱ hi taɱ Jetavanaɱ isisaŋghanisevitaɱ,||
Āvutthaɱ dhamma-rājena pītisañjananaɱ mama.|| ||

Kammaɱ vijjā ca dhammo ca silaɱ jīvitamuttamaɱ,||
Etena maccā sujjhanti na gottena dhanena vā.|| ||

Tasmā hi paṇḍito poso sampassaɱ atthamattano,||
Yoniso vicine dhammaɱ evaɱ tattha visujjhati.|| ||

Sāriputtova paññāya sīlena upasamena ca,||
Yo hi pāragato bhikkhu etāva paramo siyā'' ti.|| ||

Idam avoca Anāthapiṇḍiko devaputto,||
samanuñño satthā ahosi.|| ||

Atha kho Anāthapiṇḍiko devaputto samanuñño me satthāti Bhagavantaɱ abhivādetvā padakkhiṇaɱ katvā tatth'evantaradhāyi.|| ||

Atha kho Bhagavā tassā rattiyā accayena bhikkhu āmantesi:||
imaɱ bhikkhave rattiɱ aññataro devaputto abhikkantāya rattiyā abhikkantavaṇṇo kevalakappaɱ Jetavanaɱ obhāsetvā yenāhaɱ ten'upasaŋkami,||
upasaŋkamitvā maɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhito kho bhikkhave,||
so devaputto maɱ gāthāhi ajjhabhāsi:|| ||

"Idaɱ hi taɱ Jetavanaɱ isisaŋghanisevitaɱ,||
Āvutthaɱ dhamma-rājena pītisañjananaɱ mama.|| ||

Kammaɱ vijjā ca dhammo ca silaɱ jīvitamuttamaɱ,||
Etena maccā sujjhanti na gottena dhanena vā.|| ||

Tasmā hi paṇḍito poso sampassaɱ atthamattano,||
Yoniso vicine dhammaɱ evaɱ tattha visujjhati.|| ||

Sāriputtova paññāya sīlena upasamena ca,||
Yo hi pāragato bhikkhu etāva paramo siyāti.|| ||

[263] Idam avoca bhikkhave,||
so devaputto.|| ||

Samanuñño me satthāti maɱ abhivādetvā padakkhiṇaɱ katvā tatth'evantaradhāyī' ti.|| ||

Evaɱ vutte āyasmā Ānando Bhagavantaɱ etad avoca:||
'so hi nūna so bhante,||
Anāthapiṇḍiko devaputto bhavissati,||
Anāthapiṇḍiko bhante,||
gahapati āyasmante Sāriputte abhippasanno ahosī ti.|| ||

Sādhu sādhu, Ānanda,||
yāvatakaɱ kho Ānanda,||
takkāya pattabbaɱ,||
anuppattaɱ tayā.|| ||

Anāthapiṇḍiko so Ānanda,||
devaputto nāñño ti.|| ||

Idam avoca Bhagavā.|| ||

Attamano āyasmā Ānando Bhagavato bhāsitaɱ abhinandīti.|| ||

Anāthapiṇḍik'ovāda suttaɱ paṭhamaɱ


 

Contact:
E-mail
Copyright Statement   Webmaster's Page