Aṅguttara-Nikāya
III. Tika Nipāta
III. Puggala Vagga

Sutta 21

Kāya-Sakkhī Suttaṁ aka Saviṭṭha Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

 

[1][pts][olds][bodh][upal] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati,||
Jetavane Anāthapiṇḍikassa ārāme.|| ||

Atha kho āyasmā ca Saviṭṭho||
āyasmā ca Mahā-Koṭṭhito||
yen'āyasmā Sāriputto||
ten'upasaṅkamiṁsu.|| ||

Upasaṅkamitvā||
āyasmatā Sāriputtena||
saddhiṁ sammodiṁsu.|| ||

Sammodanīyaṁ kathaṁ sārāṇīyaṁ vīti-sāretvā||
eka-m-antaṁ nisīdiṁsu.|| ||

Eka-m-antaṁ nisinnaṁ kho||
āyasmantaṁ Saviṭṭhaṁ||
ayasmā Sāriputto||
etad avoca:|| ||

"Tayo'me āvuso Saviṭṭha,||
puggalā santo saṁvijj'amānā lokasmiṁ.|| ||

Katame tayo?|| ||

Kāya-sakkhī,||
diṭṭhi-p-patto,||
saddhā-vimutto.|| ||

Ime kho āvuso||
tayo puggalā santo saṁvijj'amānā lokasmiṁ.|| ||

Imesaṁ āvuso tiṇṇaṁ puggalānaṁ||
katamo te puggalo khamati||
abhikkantataro ca||
paṇītataro cā" ti?|| ||

"Tayo'me āvuso Sāriputta,||
puggalā santo saṁvijj'amānā lokasmiṁ.|| ||

Katame tayo?|| ||

Kāya-sakkhī,||
diṭṭhi-p-patto,||
saddhā-vimutto.|| ||

Ime kho āvuso tayo puggalā||
santo saṁvijj'amānā lokasmiṁ.|| ||

Imesaṁ āvuso tiṇṇaṁ puggalānaṁ||
yvāyaṁ puggalo saddhā-vimutto,||
ayaṁ me puggalo khamati,||
imesaṁ tinṇaṁ puggalānaṁ||
abhikkantataro ca,||
paṇītataro ca.|| ||

Taṁ kissa hetu?|| ||

Imassa āvuso puggalassa||
saddh'indriyaṁ adhimattan" ti.|| ||

Atha kho āyasmā Sāriputto||
āyasmantaṁ Mahā Koṭṭhitaṁ||
etad avoca:|| ||

"Tayo me āvuso Koṭṭhita, puggalā||
santo saṁvijj'amānā lokasmiṁ.|| ||

Katame tayo?|| ||

Kāya-sakkhī,||
diṭṭhi-p-patto,||
saddhā-vimutto.|| ||

Ime kho āvuso tayo puggalā||
santo saṁvijj'amānā lokasmiṁ.|| ||

[119] Imesaṁ āvuso tiṇṇaṁ puggalānaṁ||
katamo te puggalo khamati,||
abhikkantataro ca||
paṇītataro cā" ti?|| ||

"Tayo'me āvuso Sāriputta, puggalā||
santo saṁvijj'amānā lokasmiṁ.|| ||

Katame tayo?|| ||

Kāya-sakkhī,||
diṭṭhi-p-patto,||
saddhā-vimutto.|| ||

Ime kho āvuso tayo puggalā||
santo saṁvijj'amānā lokasmiṁ.|| ||

Imesaṁ āvuso tiṇṇaṁ puggalānaṁ||
yvāyaṁ puggalo kāya-sakkhi,||
ayaṁ me puggalo khamati,||
imesaṁ tiṇṇaṁ puggalānaṁ||
abhikkantataro ca||
paṇītataro ca.|| ||

Taṁ kissa hetu?|| ||

Imassa āvuso puggalassa||
samādh'indriyaṁ adhimattan" ti.|| ||

Atha kho āyasmā Mahā Koṭṭhito||
āyasmantaṁ Sāriputtaṁ||
etad avoca:|| ||

"Tayo'me āvuso Sāriputta, puggalā||
santo saṁvijj'amānā lokasmiṁ.|| ||

Katame tayo?|| ||

Kāya-sakkhī,||
diṭṭhi-p-patto,||
saddhā-vimutto.|| ||

Ime kho āvuso tayo puggalā||
santo saṁvijj'amānā lokasmiṁ.|| ||

Imesaṁ āvuso tiṇṇaṁ puggalānaṁ||
katamo te puggalo khamati,||
abhikkantataro ca||
paṇītataro cā" ti?|| ||

"Tayo'me āvuso Koṭṭhita, puggalā||
santo saṁvijj'amānā lokasmiṁ.|| ||

Katame tayo?|| ||

Kāya-sakkhī,||
diṭṭhi-p-patto,||
saddhā-vimutto.|| ||

Ime kho āvuso tayo puggalā||
santo saṁvijj'amānā lokasmiṁ.|| ||

Imesaṁ āvuso tiṇṇaṁ puggalānaṁ||
yvāyaṁ puggalo diṭṭha-p-patto,||
ayaṁ me puggalo khamati,||
imesaṁ tiṇṇaṁ puggalānaṁ||
abhikkantataro ca||
paṇītataro ca.|| ||

Taṁ kissa hetu?|| ||

Imassa āvuso puggalassa||
paññ'idriyaṁ adhimattan" ti.|| ||

Atha kho āyasmā Sāriputto||
āyasmantañ ca Saviṭṭhaṁ||
āyasmantañ ca Mahā Koṭṭhitaṁ||
etad avoca:|| ||

"Vyākataṁ kho āvuso amhehi sabbeh'eva yathā sakaṁ paṭibhānaṁ.|| ||

Āyām āvuso yena Bhagavā ten'upasaṅkamissāma.|| ||

Upasaṅkamitvā Bhagavato etam atthaṁ ārocessāma.|| ||

Yathā no Bhagavā vyākarissati,||
tathā naṁ dhāressāmā" ti.|| ||

"Evam āvuso" ti kho||
āyasmā ca Saviṭṭho||
ayāsmā ca Mahā Koṭṭhito||
āyasmato Sāriputtassa||
paccassosuṁ.|| ||

Atha koh||
āyasmā ca Sāriputto||
āyasmā ca Saviṭṭho||
āyasmā ca Mahā Koṭṭhito||
yena Bhagavā ten'upasaṅkamiṁsu.|| ||

Upasaṅkamitvā Bhagavantaṁ||
abhivādetvā||
eka-m-antaṁ nisīdiṁsu.|| ||

Ekaman- [120] taṁ nisinno kho||
āyasmā Sāriputto yāvatako ahosi||
āyasmatā ca Saviṭṭhena||
āyasmatā ca Mahā-Koṭṭhitena||
saddhiṁ kathā-sallāpo,||
taṁ sabbaṁ Bhagavato ārocesi.|| ||

"Na khv ettha Sāriputta||
sukaraṁ ekaṁ-sena vyākātuṁ,||
'Ayaṁ imesaṁ tinṇaṁ puggalānaṁ||
abhikkantataro ca||
paṇitataro cā' ti.|| ||

Ṭhānaṁ h'etaṁ Sāriputta||
vijjati yvāyaṁ||
puggalo saddhā-vimutto||
svāyaṁ Arahattāya paṭipanno.|| ||

Yvāyaṁ puggalo kāya-sakkhi svāyaṁ||
Sakad'āgāmī vā||
Anāgāmī vā.|| ||

Yo c'āyaṁ puggalo diṭṭhi-p-patto so p'assa||
Sakad'āgāmī vā||
Anāgāmī vā.|| ||

Na khv'ettha Sāriputta sukaraṁ ekaṁ-sena vyākātuṁ,||
'Ayaṁ imesaṁ tinṇaṁ puggalānaṁ||
abhikkantataro ca||
paṇitataro cā' ti.|| ||

Ṭhānaṁ h'etaṁ Sāriputta||
vijjati yvāyaṁ||
puggalo kāya-sakkhi||
svāyaṁ arahattāya paṭipanno.|| ||

Yvāyaṁ puggalo saddhā-vimutto svāyaṁ||
Sakad'āgāmī vā||
Anāgāmī vā.|| ||

Yo c'āyaṁ puggalo diṭṭhi-p-patto so'passa||
Sakad-āgāmi vā||
Anāgāmī vā.|| ||

Na khv'ettha Sāriputta sukaraṁ ekaṁ-sena vyākātuṁ,||
'Ayaṁ imesaṁ tinṇaṁ puggalānaṁ||
abhikkantataro ca||
paṇitataro cā' ti.|| ||

Ṭhānaṁ h'etaṁ Sāriputta||
vijjati yvāyaṁ puggalo diṭṭhi-p-patto||
svāyaṁ arahattāya paṭipanno.|| ||

Yvāyaṁ puggalo saddhā-vimutto svāyaṁ||
Sakad'āgāmī vā||
Anāgāmī vā.|| ||

Yo c'āyaṁ puggalo kāya-sakkhi so p'assa||
Sakad'āgāmī vā||
Anāgāmī vā.|| ||

Na khv'ettha Sāriputta sukaraṁ ekaṁ-sena vyākātuṁ,||
'Ayaṁ imesaṁ tinṇaṁ puggalānaṁ||
abhikkantataro ca||
paṇitataro cā' ti" ti.|| ||