Aṅguttara-Nikāya
III. Tika Nipāta
V. Cūḷa Vagga

Sutta 45

Paṇḍita Suttaṃ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[151]

[1][pts][bodh] Evaṃ me sutaṃ.|| ||

Evaṃ me sutaṃ ekaṃ samayaṃ Bhagavā Sāvatthiyaṃ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṃ.|| ||

Bhagavā etad avoca:|| ||

"Tīṇ'imāni bhikkhave paṇḍita-paññattāni sappurisa-paññattāni.|| ||

Katamānī tīṇi?|| ||

Dānaṃ bhikkhave paṇḍita-paññattaṃ sappurisa-paññataṃ.|| ||

Pabbajjā bhikkhave paṇḍita-paññattā sappurisa-paññattā.|| ||

Mātā-pitunnaṃ bhikkhave upaṭṭhānaṃ paṇḍita-paññattaṃ sappurisa-paññattaṃ.|| ||

Imāni kho bhikkhave tīṇi paṇḍita-paññattāni sappurisa-paññattānī" ti.|| ||

 

---

 

Sabbhī dānaṃ upaññattaṃ ahiṃsā saññamo damo,||
Mātā-pitu upaṭṭhānaṃ santānaṃ brahma-cārinaṃ.||
Sataṃ etāni ṭhānāni yāni sevetha paṇḍito,||
Ariyo dassana-sampanno sa lokaṃ bhajate sivan ti.|| ||