Aṅguttara-Nikāya
III. Tika Nipāta
VI. Brāhmaṇa Vagga

Sutta 52

Dutiya Dve Brāhmaṇa (Dvejana) Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[156]

[1][pts][bodh][than] Evaṁ me sutaṁ.|| ||

Evaṁ me sutaṁ ekaṁ samayaṁ Bhagavā Sāvatthiyaṁ viharati.|| ||

Atha kho dve brāhmaṇā jiṇṇā vuḍḍhā mahallakā addhagatā vayo-anuppattā vīsaṁ-vassasatikā jātiyā,||
yena Bhagavā ten'upasaṅkamiṁsu.|| ||

Upasaṅkamitvā Bhagavatā saddhiṁ sammodiṁsu.|| ||

Sammodanīyaṁ kathaṁ sārāṇīyaṁ vīti-sāretvā eka-m-antaṁ nisīdiṁsu.|| ||

Eka-m-antaṁ nisinnā kho te brāhmaṇā Bhagavantaṁ etad avocuṁ:|| ||

"Mayam assu bho Gotama brāhmaṇā jiṇṇā vuḍḍhā mahallakā addhagatā vayo-anuppattā vīsaṁ-vassasatikā jātiyā.|| ||

Te c'amhā akata-kalyāṇā akata-kusalā akat-abhīruttāṇā.|| ||

Ovadatu no bhavaṁ Gotamo,||
anusāsatu no bhavaṁ Gotamo yaṁ amhākaṁ assa dīgha-rattaṁ hitāya sukhāyā" ti.|| ||

■

"Taggha tumhe brāhmaṇā jiṇṇā vuḍḍhā mahallakā addhagatā vayo-anuppattā vīsaṁ-vassasatikā jātiyā.|| ||

Te c'attha akata-kalyāṇā akata-kusalā akat-abhīruttāṇā.|| ||

Āditto kho ayaṁ brāhmaṇā loko jarāya vyādhinā maraṇena.|| ||

Evaṁ āditte kho brāhmaṇā loke jarāya vyādhinā maraṇena yo'dha kāyena saṁyamo,||
vācāya saṁyamo,||
manasā saṁyamo,||
taṁ tassa petassa tāṇaṁ ca lenañ ca dīpañ ca saraṇañ ca parāyanañ cā" ti.|| ||

 

---

 

Ādittasmiṁ agārasmiṁ yaṁ nīharati bhājanaṁ,||
Taṁ tassa hoti atthāya no ca yaṁ tattha ḍayhati.||
Evaṁ ādīpito loko jarāya maraṇena ca,||
Nīhareth'eva dānena dinnaṁ hoti sunīhaṭaṁ||
Yo'dha kāyena saññamo vācāya uda cetasā,||
Taṁ tassa petassa sukhāya hoti||
yaṁ jīvamano pakaroti puññan.|| ||