Aṅguttara-Nikāya
III. Tika Nipāta
VI. Brāhmaṇa Vagga

Sutta 57

Vaccha-Gotta Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[160]

[1][pts][than][bodh] Evaṁ me sutaṁ.|| ||

Evaṁ me sutaṁ ekaṁ samayaṁ Bhagavā Sāvatthiyaṁ viharati.|| ||

Atha kho Vacchagotto paribbājako yena Bhagavā ten'upasaṅkami upasaṅkamitvā Bhagavatā saddhiṁ sammodi.|| ||

Sammodanī kathaṁ sārāṇīyaṁ vīti-sāretvā.|| ||

Eka-m-antaṁ nisinno kho Vacchagotto paribbājako Bhagavantaṁ etad avoca:|| ||

"Sutaṁ me taṁ bho Gotama Samaṇo Gotamo evam āha:|| ||

'Mayham eva dānaṁ [161] dātabbaṁ,||
na aññesaṁ dānaṁ dātabbaṁ,||
mayham eva sāvakānaṁ dānaṁ dātabbaṁ,||
na aññesaṁ sāvakānaṁ dānaṁ dātabbaṁ,||
mayham eva dinnaṁ maha-p-phalaṁ,||
na aññesaṁ dinnaṁ maha-p-phalaṁ,||
mahham eva sāvakānaṁ dinnaṁ maha-p-phalaṁ,||
na aññesaṁ sāvakānaṁ dinnaṁ maha-p-phalan' ti.|| ||

Ye te bho Gotama evam āhaṁsu:||
Samaṇo Gotamo evam āha:|| ||

'Mayham eva dānaṁ dātabbaṁ,||
na aññesaṁ dānaṁ dātabbaṁ,||
mayham eva sāvakānaṁ dānaṁ dātabbaṁ,||
na aññesaṁ sāvakānaṁ dānaṁ dātabbaṁ,||
mayham eva dinnaṁ maha-p-phalaṁ,||
na aññesaṁ dinnaṁ maha-p-phalaṁ,||
mahham eva sāvakānaṁ dinnaṁ maha-p-phalaṁ,||
na aññesaṁ sāvakānaṁ dunnaṁ maha-p-phalan' ti.|| ||

Kacci te bhoto Gotamassa vutta-vādino?|| ||

Na ca bhavantaṁ Gotamaṁ abhutena abbh'ācikkhanti?|| ||

Dhammassa c'ānudhammaṁ vyākaronti?|| ||

Na ca koci saha-dhammiko vādānupāto gārayhaṁ ṭhānaṁ āgacchati?|| ||

Anabbhakkhātukāmā hi mayaṁ bhavantaṁ Gotaman" ti.|| ||

■

Ye te Vaccha evam āhaṁsu samaṇo Gotamo evam āha:|| ||

'Mayham eva dānaṁ dātabbaṁ,||
na aññesaṁ dānaṁ dātabbaṁ,||
mayham eva sāvakānaṁ dānaṁ dātabbaṁ,||
na aññesaṁ sāvakānaṁ dānaṁ dātabbaṁ,||
mayham eva dinnaṁ maha-p-phalaṁ,||
na aññesaṁ dinnaṁ maha-p-phalaṁ,||
mahham eva sāvakānaṁ dinnaṁ maha-p-phalaṁ,||
na aññesaṁ sāvakānaṁ dunnaṁ maha-p-phalan' ti.|| ||

Na me te vuttādino,||
abbh'ācikkhanti ca pana maṁ te asatā abhutena.|| ||

■

Yo kho Vaccha paraṁ dānaṁ dadantaṁ vāreti,||
so tiṇṇaṁ antarāya-karo hoti,||
tiṇṇaṁ pāripanathiko.|| ||

Katamesaṁ tiṇṇaṁ?|| ||

Dāyakassa puññantarāya-karo hoti,||
paṭiggāhakānaṁ lābhantarāya-karo hoti,||
pubb'eva kho pan'assa attā khato ca hoti upahato ca.|| ||

Yo kho Vaccha paraṁ dānaṁ dadantaṁ vāreti,||
so imesaṁ tiṇṇaṁ antarāya-karo hoti,||
tiṇṇaṁ pāripanthiko.|| ||

■

Ahaṁ kho pana Vaccha evaṁ vadāmi:|| ||

'Ye pi te candanikāya vā oligalle vā pāṇā,||
tatra pi yo thālidhovanaṁ vā sarāvadhopanaṁ vā chaḍḍeti.|| ||

Ye tattha pāṇā,||
te yena yāpentū' ti.|| ||

■

Tato nidānam pahaṁ Vaccha puññassa āgamaṁ vadāmi.|| ||

Ko pana vādo manussa-bhūte.|| ||

Api c'āhaṁ Vaccha sīla-vato dinnaṁ maha-p-phalaṁ vadāmi,||
no tathā du-s-sīle.|| ||

So ca hoti,||
pañc'aṅga-vi-p-pahīno pañc'aṅga-samannāgato.|| ||

■

Katamāni pañcaṅgāni pahīṇāni honti?|| ||

Kāma-c-chando pahīṇo hoti,||
vyāpādo pahīṇo hoti,||
thīna- [162] middhaṁ pahīnaṁ hoti.|| ||

Uddhacca-kukkuccaṁ pahīnaṁ hoti,||
vicikicchā pahīṇā hoti.|| ||

Imāni pañcaṅgāni pahīṇāni honti.|| ||

■

Katamehi pañcahaṅgehi samannāgato hoti?|| ||

Asekkhena sīla-k-khandhena samannāgato hoti,||
asekkhena samādhi-k-khandhena samannāgato hoti,||
asekkhena paññā-k-khandhena samannāgato hoti,||
asekkhena vimutti-k-khandhena samannāgato hoti.|| ||

Asekkhena vumuttiñāṇa-dassana-k-khandhena samannāgato hoti.|| ||

Imehi pañcaṅgehi samannāgato hoti.|| ||

Iti pañc'aṅga-vippahīṇe pañc'aṅga-samannāgate dinnaṁ maha-p-phalaṁ vadāmī" ti.|| ||

 

---

 

Iti kaṇhāsu setāsu rohiṇīsu harīsu vā,||
Kammāsāsu sarūpāsu gosu pārevatāsu vā.||
Yāsu kāsu ca etāsu danto jāyati puṅgavo,||
Dhorayho bala-sampanno kalyāṇa-javanikkamo.||
Tam eva bhāre yuñjanti nāssa vaṇṇaṁ parikkhare,||
Evam eva manussesu yasmiṁ kasmiñ ca jātiyaṁ.||
Khattiye brāhmaṇe vesse sudde caṇḍāla-pukkuse,||
Yāsu kāsu ca etāsu danto jāyati subbato.||
Dhammaṭṭho sīla-sampanno sacca-vādi hirī-mano,||
Pahīṇajātimaraṇo Brahma-cariyassa kevalī.||
Pannabhāro visaṁyutto katakicco anāsavo,||
Pāragū sabba-dhammānaṁ anupādāya nibbuto.||
Tasmiñ yeva viraje khette vipulā hoti dakkhiṇā,||
Bālā ca avijānantā dummedhā assutāvino.||
Bahiddhā dadanti dānā na hi sante upāsare,||
Yo ca sante upāsanti sappaññe dhīra-sammate.||
Saddhā ca tesaṁ sugate mūlajātā pati-ṭ-ṭhitā,||
Devalokañ ca te yanti kule vā idha jāyare.||
Anupubbena nibbāṇaṁ adhigacchanti paṇḍitā.|| ||