Aṅguttara-Nikāya
III. Tika Nipāta
IX. Samaṇa Vagga

Sutta 83

Vajji-Putta Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[230]

[1][pts][than] Evaṁ me sutaṁ.|| ||

Ekaṁ samayaṁ Bhagavā Vesāliyaṁ viharati Mahāvano Kūmāgārasālāyaṁ.|| ||

Atha kho aññataro Vajji-puttako bhikkhū yena Bhagavā ten'upasaṅkami.|| ||

Upasaṅkamitvā kho so Vajji-puttako bhikkhu saddhiṁ sammodi,||
sammodanīyaṁ kathaṁ sārāṇīyaṁ vīti-sāretvā eka-m-antaṁ nisīdi.|| ||

Eka-m-antaṁ nisinno kho so Vajji-puttako bhikkhu Bhagavantaṁ etad avoca:|| ||

"Sādhikam idaṁ bhante diyaḍḍha-sikk-āpadasataṁ anvaddhamāsaṁ uddesaṁ āgacchati.|| ||

Nāhaṁ bhante ettha Sakkomi sikkhitun" ti.|| ||

"Sakkasi pana tvaṁ bhikkhū tīsu sikkhāsu sikkhituṁ:|| ||

Adhisīla-sikkhāya||
adhicitta-sikkhāya||
adhipaññā-sikkhāyā" ti?|| ||

"Sakkom'ahaṁ bhante tīsu sikkhāsu sikkhituṁ||
adhisīla-sikkhāya||
adhicitta-sikkhāya||
adipaññā-sikkhāyā" ti.|| ||

2. "Tasmātiha tvaṁ bhikkhū tīsu sukkhāsu sikkhassu||
adhisīla-sikkāya||
adicitta-sikkhāya||
adhipaññā-sikkāya.|| ||

Yato kho tvaṁ bhikkhu||
adhisīlam pi sikkhissasī,||
adhicittam pi sikkhissasi,||
adhipaññam pi sikkhissasi,||
tasmā tuyhaṁ bhikkhu||
adhisīlam pi sikkhato||
adhicittam pi sikkhato||
adhipaññam pi sikkhato||
rāgo pahiyyissati,||
doso pahiyyissati,||
moho pahiyyissati.|| ||

Se tvaṁ||
rāgassa pahāṇā||
dosassa pahāṇā||
mohassa pahāṇā||
yaṁ akusalaṁ taṁ na karissasi||
yaṁ pāpaṁ tvaṁ na sevissasī" ti.|| ||

 

§

 

3. Atha kho so bhikkhu aparena samayena||
adhisīlam pi sikkhi,||
adhicittam pi sikkhi,||
adhipaññam pi sikkhi.|| ||

Tassa [231] adhisīlam pi sikkhato||
adhicittam pi sikkhato||
adhipaññam pi sikkhato,||
rāgo pahiyyi,||
Doso pahiyyi,||
Moho pahiyyi.|| ||

So rāgassa pahāṇā||
dosassa pahānā||
mohassa pahāṇā||
yaṁ akusalaṁ taṁ nā kāsi||
yaṁ pāpaṁ taṁ na sevī.|| ||