Ruṇṇa Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts][olds] Evaṁ me sutaṁ.|| ||

Ekaṁ samayaṁ Bhagavā Sāvatthiyaṁ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

Ruṇṇam idaṁ bhikkhave ariyassa vinaye yadidaṁ gītaṁ.|| ||

Ummattakam idaṁ bhikkhave ariyassa vinaye yadidaṁ naccaṁ.|| ||

Komārakam idaṁ bhikkhave ariyassa vinaye yadidaṁ ati-velaṁ danta-vidaṁ sakaṁ hasitaṁ.|| ||

Tasmātiha bhikkhave setughāto gīte||
setughāto nacce.|| ||

Alaṁ ve dhamma-pamoditānaṁ sataṁ sitaṁ sita-mattāyā' ti.|| ||