Aṅguttara-Nikāya
III. Tika Nipāta
XIII. Kusināra Vagga

Sutta 124

Bharaṇḍu-Kālāma Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[276]

[1][pts] Evaṁ me sutaṁ:|| ||

Ekaṁ samayaṁ Bhagavā Kosalosu cārikaṁ caramāno yena Kapilavatthu tad avasari.|| ||

"Assosi kho Mahānāmo Sakko Bhagavā kira Kapilavatthuṁ anuppatto" ti.|| ||

Atha kho Mahānāmo Sakko yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ aṭṭhāsi.|| ||

Eka-m-antaṁ ṭhitaṁ kho Mahānāmaṁ Sakkaṁ Bhagavā etad avoca:|| ||

"Gaccha Mahānāma, Kapilavatthusmiṁ tathā-rūpaṁ āvasathaṁ jāna,||
yatth'ajja mayaṁ ekarattiṁ vihareyyāmā" ti.|| ||

[277] "Evaṁ bhante" ti kho Mahānāmo Sakko Bhagavato paṭi-s-sutvā Kapilavatthuṁ pavisitvā kevala-kappaṁ Kapilavatthuṁ anvābhiṇḍanto na addasa Kapilavatthusmiṁ tathā-rūpaṁ āvasathaṁ yattha Bhagavā ekarattiṁ vihareyya.|| ||

Atha ko Mahānāmo Sakko yena Bhagavā ten'upasaṅkami.|| ||

Upasaṅkamitvā Bhagavantaṁ etad avoca:|| ||

2. "N'atthi bhante Kapilavatthusmiṁ tathā-rūpo āvasato yatth'ajja Bhagavā ekarattiṁ vihareyya.|| ||

Ayaṁ bhante Bharaṇḍu Kālāmo Bhagavato purāṇa-sabrahma-cārī.|| ||

Tass'ajja Bhagavā assame ekarattiṁ viharatū" ti.|| ||

"Gaccha Mahānāma, sattharaṁ paññāpehī" ti.|| ||

"Evaṁ bhante" ti kho Mahānāmo Sakko Bhagavato paṭi-s-sutvā yena Bharaṇḍukassa Kālāmassa assamo ten'upasaṅkami.|| ||

Upasaṅkamitvā sattharaṁ paññā-petvā udakaṁ ṭhapetvā pādānaṁ dhovanāya yena Bhagavā ten'upasaṅkami.|| ||

Upasaṅkamitvā Bhagavantaṁ etad avoca:|| ||

"Santhato bhante santhāro,||
udakaṁ ṭhapitaṁ pādānaṁ dhovanāya.|| ||

Yassa dāni bhante Bhagavā kālaṁ maññatī" ti.|| ||

3. Atha kho Bhagavā yena Bharaṇḍukassa Kālāmassa assamo ten'upasaṅkami.|| ||

Upasan-kamitvā paññatte āsane nisīdi.|| ||

Nisajja kho Bhagavā pāde pakkhālesi.|| ||

Atha kho Mahānāmassa Sakkassa etad ahosi:|| ||

"Akālo kho ajja Bhagavantaṁ payirupāsituṁ,||
kilanto Bhagavā,||
sve dānāhaṁ Bhagavantaṁ payirupāsissāmī" ti.|| ||

Bhagavantaṁ abhivādetvā padakkhiṇaṁ katvā pakkāmi.|| ||

Atha kho Mahānāmo Sakko tassā rattiyā accayena yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinnaṁ kho Mahānāmaṁ Sakkaṁ Bhagavā etad avoca:|| ||

 

§

 

"Tayo kho'me Mahānāma sattāro santo savijjamānā lokasmiṁ.|| ||

Katame tayo?|| ||

Idha Mahānāma ekacco Satthā||
kāmānaṁ pariññaṁ paññāpeti,||
na rūpānaṁ pariññaṁ paññāpeti,||
na vedanānaṁ pariññaṁ paññāpeti.|| ||

Idha pana Mahānāma ekacco Satthā||
kāmānaṁ pariññaṁ paññāpeti,||
rūpānaṁ pariññaṁ paññāpeti,||
na vedanānaṁ [278] pariññaṁ paññāpeti.|| ||

Idha pana Mahānāma ekacco Satthā||
kāmānaṁ pariññaṁ paññāpeti,||
rūpānaṁ pariññaṁ paññāpeti,||
vedanānaṁ pariññaṁ paññāpeti.|| ||

Ime kho Mahānāma tayo Satthāro santo saṁvijj'amānā lokasmi.|| ||

■

Imesaṁ Mahānāma tiṇṇaṁ Satthārānaṁ ekā niṭṭhā,||
udāhu puthu niṭṭhā" ti?|| ||

5. Evaṁ vutto Bharaṇḍu Kālāmo Mahānāmaṁ Sakkaṁ etad avoca:|| ||

"'Ekā' ti Mahānāma vadehī" ti.|| ||

Evaṁ vutte Bhagavā Mahānāmaṁ Sakkaṁ etad avoca:|| ||

"'Nānā' ti Mahānāma vadehī" ti.|| ||

■

Dutiyam pi kho Bharaṇḍu Kālāmo Mahānāmaṁ Sakkaṁ etad avoca:|| ||

"'Ekā' ti Mahānāma vadehī" ti.|| ||

Dutiyam pi kho Bhagavā Mahānāmaṁ Sakkaṁ etad avoca:|| ||

"'Nānā' ti Mahānāma vadehī" ti.|| ||

■

Tatiyam pi kho Bharaṇḍu Kālāmo Mahānāmaṁ Sakkaṁ etad avoca:|| ||

"'Ekā' ti Mahānāma vadehī" ti.|| ||

Tatiyam pi kho Bhagavā Mahānāmaṁ Sakkaṁ etad avoca:|| ||

"'Nānā' ti Mahānāma vadehī" ti.|| ||

■

6. Atha kho Bharaṇḍussa Kālāmassa etad ahosi:|| ||

"Mahesakkhassa vat'amhi Mahānāmassa Sakkassa sammukhā samaṇena Gotamena yāva tatiyakaṁ apasādito.|| ||

Yan nūn-ā-haṁ Kapilavatthumhā pakkameyyan" ti.| ||

Atha kho Bharaṇḍu Kālemo Kapilavatthumhā pakkāmi,||
yaṁ Kapilavatthumhā pakkāmi,||
tathā pakkanto va ahosi na puna paccāgañchi.