Acinteyya Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts][than] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

2. Cattār'imāni bhikkhave acinteyyāti na cintetabbāni,||
yāni cintento ummādassa vighātassa bhāgī assa.|| ||

Katamāni cattāri?|| ||

Buddhānaṁ bhikkhave Buddhavisayo acinteyyo na cittetabbo,||
yaṁ cintento ummādassa vighātassa bhāgī assa.|| ||

Jhāyissa bhikkhave jhānavisayo acinteyyo na cintetabbo,||
yaṁ cintento ummādassa vighātassa bhāgī assa.|| ||

Kammavipāko bhikkhave acinteyo na cintetabbo,||
yaṁ cintento ummādassa vighātassa bhāgī assa.|| ||

Lokacintā bhikkhave acinteyyā na cintetabbā,||
yaṁ cintento ummādassa vighātassa bhāgī assa.|| ||

Imāni kho bhikkhave cattāri acinteyyāni na cintetabbāni,||
yāni cintento ummādassa vighātassa bhāgī assāti.|| ||