Aṅguttara Nikāya
Catukka Nipāta
XII: Kesi Vagga

Sutta 111

Kesi Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[112]

[1][pts][than] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

2. Atha kho Kesi assa-damma-sārathī yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinnaṁ kho Kesiṁ assa-damma-sārathiṁ Bhagavā etad avoca:|| ||

2. "Tvaṁ ca khvāsi, Kesi, saññāto assa-damma-sārathi.|| ||

Kathaṁ ca pana tvaṁ Kesi, assa-dammaṁ vinesī" ti?|| ||

"Ahaṁ kho bhante assa-dammaṁ saṇhena pi vinemi,||
pharusena pi vinemi,||
saṇha-pharusena pi vinemī" ti.|| ||

Sace te Kesi, assa-dammo saṇhena pi vinayaṁ na upeti,||
pharusena pi vinayaṁ na upeti,||
saṇha-pharusena pi vinayaṁ na upeti,||
kinti naṁ karosīti?|| ||

Sace me bhante assa-dammo saṇhena vinayaṁ na upeti,||
pharusena pi vinayaṁ na upeti,||
saṇha-pharusena vinayaṁ na upeti,||
hanāmi naṁ bhante.|| ||

Taṁ kissa hetu?|| ||

Mā me ācariya-kulassa avaṇṇo ahosī ti.|| ||

Bhagavā pana bhante anuttaro purisa-damma-sārathi,||
kathaṁ pana bhante Bhagavā purisa-dammaṁ vinetī ti?|| ||

3. Ahaṁ kho Kesi, purisa-dammaṁ saṇhena pi vinemi,||
pharusena pi vinemi,||
saṇha-pharusena pi vinemi.|| ||

Tatr'idaṁ Kesi, saṇhasmiṁ:|| ||

Iti kāya-su-caritaṁ,||
iti kāya-su-caritassa vipāko.|| ||

Iti vacī-su-caritaṁ,||
iti vacī-su-caritassa vipāko.|| ||

Iti mano-su-caritacaṁ,||
iti mano-su-caritassa vipako.|| ||

Iti devā,||
iti manussā.|| ||

Tatr'idaṁ Kesi, pharusasmiṁ:|| ||

Iti kāya-du-c-caritaṁ,||
iti kāya-du-c-caritassa vipāko.|| ||

Iti vacī-du-c-caritaṁ,||
iti vacī-du-c-caritassa vipāko.|| ||

Iti mano-du-c-caritaṁ||
iti mano-du-c-caritassa vipāko.|| ||

Iti Nirayo,||
iti tiracchāna-yoni,||
iti petti-visayo.|| ||

Tair'idaṁ Kesi, saṇha-pharusasmiṁ:|| ||

Iti kāya-su-caritaṁ,||
iti kāya-su-caritassa vipāko.|| ||

Iti kāya-du-c-caritaṁ,||
iti kāya-du-c-caritassa vipāko.|| ||

Iti vacī-su-caritaṁ,||
iti vacī-su-caritassa vipāko.|| ||

Iti vaci-du-c-caritaṁ,||
iti vacī-du-c-caritassa vipāko.|| ||

Iti mano-su-caritaṁ,||
iti mano-su-caritassa vipāko.|| ||

Iti mano-du-c-caritaṁ,||
iti mano-du-c-caritassa vipāko.|| ||

Iti devā, iti manussā,||
iti Nirayo,||
iti tiracchāna-yoni,||
iti petti-visayo ti.|| ||

Sace te bhante purisa-dammo saṇhena vinayaṁ na upeti,||
[113] pharusena vinayaṁ na upeti,||
saṇha-pharusena vinayaṁ na upeti,||
kinti naṁ Bhagavā karotī ti?|| ||

Sace me Kesi, purisa-dammo saṇhena vinayaṁ na upeti,||
pharusena vinayaṁ na upeti,||
saṇha-pharusena vinayaṁ na upeti,||
hanāmi naṁ Kesi ti.|| ||

4. Na kho bhante Bhagavato pāṇātipāto kappati.|| ||

Atha ca pana Bhagavā evam āha —||
hanāmi naṁ Kesi ti.|| ||

Saccaṁ Kesi, na Tathāgatassa pāṇātipāto kappati.|| ||

Api ca so purisa-dammo saṇhena vinayaṁ na upeti,||
pharusena vinayaṁ na upeti,||
saṇha-pharusena vinayaṁ na upeti,||
na Tathāgato vattabbaṁ anusāsitabbaṁ maññati.|| ||

Na pi viññū sabrahma-cārī vattabbaṁ anusāsitabbaṁ maññanti.|| ||

Vadho hesa Kesi,||
ariyassa vinaye yaṁ na Tathāgato vattabbaṁ anusāsitabbaṁ maññati.|| ||

Na pi viññū sabrahma-cārī vattabbaṁ anusāsitabbaṁ maññantī ti.|| ||

So hi nūna bhante Sugatahato hoti yaṁ na Tathāgato vattabbaṁ anusāsitabbaṁ maññati.|| ||

Na pi viññū sabrahma-cārī vattabbaṁ anusāsitabbaṁ maññantī ti.|| ||

Abhikkantaṁ bhante, abhikkantaṁ bhante!|| ||

Seyyathā pi bhante, nikkujjitaṁ vā ukkujjeyya,||
paṭi-c-channaṁ vā vivareyya,||
mūḷhassa vā Maggaṁ ācikkheyya,||
andha-kāre vā tela-pajjotaṁ dhāreyya,||
cakkhu-manto rūpāni dakkhintī ti.|| ||

Evam evaṁ Bhagavatā aneka-pariyāyena Dhammo pakāsito,||
es'āhaṁ Bhagavantaṁ saraṇaṁ gacchāmi||
dhammaṁ ca||
bhikkhu-saṅghaṁ ca.|| ||

Upāsakaṁ maṁ bhante Bhagavā dhāretu ajja-t-agge pāṇupetaṁ saraṇaṁ gatanti.|| ||