Arañña Senāsana Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts][than][olds] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

Catuhi bhikkhave dhammehi samannāgato bhikkhu nālaṁ araññe vana-pa-t-thāni pantāni sen'āsanāni paṭisevituṁ.|| ||

Katamehi catūhi?|| ||

Kāma-vitakkena,||
vyāpāda-vitakkena,||
vihiṁsā-vitakkena,||
duppañño hoti jaḷo ela-mūgo.|| ||

Imehi kho bhikkhave catūhi dhammehi samannāgato bhikkhu nālaṁ araññe vana-pa-t-thāni pantāni sen'āsanāni paṭisevitunti.|| ||

Catuhi bhikkhave dhammehi samannāgato bhikkhu alaṁ araññe vana-pa-t-thāni pantāni sen'āsanāni paṭisevituṁ.|| ||

Katamehi catūhi?|| ||

Nekkhamma-vitakkena,||
avyāpāda-vitakkena,||
avihiṁsā-vitakkena,||
paññavā hoti ajaḷo anela-mūgo.|| ||

Imehi kho bhikkhave catūhi dhammehi samannāgato bhikkhu alaṁ araññe vana-pa-t-thāni pantāni sen'āsanāni paṭisevitun ti.|| ||