Dussīla Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts][bodh][olds] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Dussīlassa bhikkhave,||
sīla-vipannassa||
hat'upaniso hoti sammā-samādhi.|| ||

Sammā-samādhimhi asati||
sammā-samādhi-vipannassa||
hat'upanisaṁ hoti yathā-bhūta-ñāṇa-dassanaṁ.|| ||

Yathā-bhūta-ñāṇa-dassane asati||
yathā-bhūta-ñāṇa-dassana-vipannassa||
hat'upaniso hoti nibbidā virāgo.|| ||

Nibbidā-virāge asati||
nibbidā virāga-vipannassa||
hat'upanisaṁ hoti vimutti-ñāṇa-dassanaṁ.|| ||

■

2. Seyyathā pi, bhikkhave, rukkho sākhā-palāsa-vipanno,||
tassa papaṭikā pi na pāripūriṁ gacchati.|| ||

Taco pi na [20] pāripūriṁ gacchati,||
pheggu pi na pāripuriṁ gacchati,||
sāro pi na pāripuriṁ gacchati.|| ||

■

Evam eva kho bhikkhave du-s-sīlassa||
sīla-vipannassa||
hat'upaniso hoti sammā-samādhi.|| ||

Sammā-samādhimhi asati||
sammā-samādhi-vipannassa||
hat'upanisaṁ hoti yathā-bhūta ñāṇa-dassanaṁ.|| ||

Yathā-bhūta-ñāṇa-dassane asati||
yathā-bhūta-ñāṇa-dassana-vipannassa||
hat'upaniso hoti nibbidā-virāgo.|| ||

Nibbidā-virāge asati||
nibbidā virāga-vipannassa||
hat'upanisaṁ hoti vimutti-ñāṇa-dassanaṁ.|| ||

Sīla-vato bhikkhave||
sīla-sampannassa||
upanissaya-sampanno hoti sammā-samādhi.|| ||

Sammā-samādhimhi sati||
sammā-samādhi-sampannassa||
upanissaya-sampannaṁ hoti yathā-bhūta-ñāṇa-dassanaṁ.|| ||

Yathā-bhuta-ñāṇa-dassane sati||
yathā-bhūta-ñāṇa-dassana-sampannassa||
upanissaya-sampanno hoti nibbidā-virāgo.|| ||

Nibbidā-virāge sati||
nibbidā virāga-sampannassa||
upanissaya-sampannaṁ hoti vimutti-ñāṇa-dassanaṁ.|| ||

■

Seyyathā pi bhikkhave rukkho sakhā-palāsa-sampanno,||
tassa papaṭikā pi pāripūriṁ gacchati.|| ||

Taco pi pāripūriṁ gacchati,||
pheggu pi pāripūriṁ gacchati,||
sāro pi pāripūriṁ gacchati.|| ||

■

Evam eva kho bhikkhave sīla-vato||
sīla-sampannassa||
upanissaya-sampanno hoti sammā-samādhi.|| ||

Sammā-samādhimhi sati||
sammā-samādhi-sampannassa||
upanissaya-sampannaṁ hoti yathā-bhūta-ñāṇa-dassanaṁ.|| ||

Yathā-bhuta-ñāṇa-dassane sati||
yathā-bhūta-ñāṇa-dassana-sampannassa||
upanissaya-sampanno hoti nibbidā-virāgo.|| ||

Nibbidā virāge sati||
nibbidā-virāga-sampannassa||
upanissaya-sampannaṁ hoti vimutti-ñāṇa-dassanan ti.|| ||