Aṅguttara Nikāya
Pañcaka Nipāta
III: Pañc'aṅgika Vagga

Sutta 30

Nāgita Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[30]

[1][pts][than][bodh] Evaṁ me sutaṁ:|| ||

Ekaṁ samayaṁ Bhagavā Kosalesu cārikaṁ caramāno mahatā bhikkhu-saṅghena saddhiṁ yena Icchānaṅgalaṁ nāma Kosalānaṁ brāhmaṇa-gāmo tad avasari.|| ||

Tatra sudaṁ Bhagavā Icchānaṅgale viharati Icchānaṅgala-vana-saṇḍe.|| ||

Assosuṁ kho Icchānaṅgalakā brāhmaṇa-gahapatikā:|| ||

"Samaṇo khalu bho Gotamo Sakya-putto Sakya-kulā pabba-jito Icchānaṅgalaṁ anuppatto Icchānaṅgale viharati Icchānaṅgala-vana-saṇḍe.|| ||

Taṁ kho pana bhavantaṁ Gotamaṁ evaṁ kalyāṇo kitti-saddo abbhu-g-gato:|| ||

'Iti pi so Bhagavā arahaṁ Sammā Sambuddho vijjā-caraṇa-sampanno Sugato loka-vidū anuttaro purisa-damma-sārathī Satthā deva-manussānaṁ Buddho Bhagavā' ti.|| ||

So imaṁ lokaṁ sa-devakaṁ sa-Mārakaṁ sa-brahmakaṁ sa-s-samaṇa-brāhmaṇiṁ pajaṁ sa-deva-manussaṁ sayaṁ abhiññā sacci-katvā pavedeti.|| ||

So dhammaṁ deseti ādi-kalyāṇaṁ majjhe kalyāṇaṁ pariyosāna-kalyāṇaṁ sātthaṁ savyañ janaṁ kevala-paripuṇṇaṁ parisuddhaṁ,||
Brahma-cariyaṁ pakāseti.|| ||

Sādhu kho pana tathā-rūpānaṁ arahataṁ dassanaṁ hotī" ti.|| ||

Atha kho Icchānaṅgalakā brāhmaṇa-gahapatikā tassā rattiyā accayena pahūtaṁ khādanīyaṁ bhojanīyaṁ ādāya yena Icchānaṅgala-vana-saṇḍo ten'upasaṅkamiṁsu.|| ||

Upasaṅkamitvā bahi-dvāra-koṭṭhake aṭṭhaṁsu uccā-saddā mahā-saddā.|| ||

[31] 2. Tena kho pana samayen'āyasmā Nāgito Bhagavato upaṭṭhāko hoti.|| ||

Atha kho Bhagavā āyasmantaṁ Nāgitaṁ āmantesi:|| ||

"Ke pan'ete Nāgita uccā-saddā mahā-saddā,||
kevaṭṭā maññe macche vilopen" ti?|| ||

"Ete bhante Icchānaṅgalakā brahmaṇa-gahapatikā pahutaṁ khādanīyaṁ bhojanīyaṁ ādāya bahi-dvāra-koṭṭhake ṭhitā Bhagavantaṁ yeva uddissa bhikkhu-saṅghañ cā" ti.|| ||

"Māhaṁ Nāgita yasena samāgamaṁ,||
mā ca mayā yaso.|| ||

Yo kho Nāgita na-y-imassa nekkhamma-sukhassa paviveka-sukhassa upasama-sukhassa samkhodha-sukhassa nikāma-lābhī assa akiccha-lābhī akasira-lābhī,||
yassāhaṁ nekkhamma-sukhassa paviveka-sukhassa upasama-sukhassa sambodha-sukhassa nikāma-lābhi akiccha-lābhi akasira-lābhi,||
so taṁ mīḷha-sukhaṁ middha-sukhaṁ lābha-sakkāra-siloka-sukhaṁ sādiyeyyā" ti.|| ||

"Adhivāsetu dāni bhanne Bhagavā, adhivāsetu Sugato.|| ||

Adhivāsana-kālo dāni bhante Bhagavato.|| ||

Yena yen'eva dāni bhante Bhagavā gamissati,||
tanninnā'va bhavissanti brāhmaṇa gahapatikā negamā c'eva jāna-padā ca.|| ||

Seyyathā pi bhante thulla-phusitake deve vassante yathāninnaṁ udakāni pavattanti,||
evam eva kho bhante yena yen'eva dāni Bhagavā gamissati,||
tanninnā'va bhavissanti brāhmaṇa-gahapatikā negamā c'eva jāna-padā ca.|| ||

Taṁ kissa hetu?|| ||

Tathāhi bhante Bhagavato sīla-paññāṇan" ti.|| ||

Māhaṁ Nāgita yasena samāgamo,||
mā ca mayā yaso.|| ||

Yo kho Nāgita na-y-imassa nekkhamma-sukhassa paviveka-sukhassa upasama-sukhassa samkhodha-sukhassa nikāma-lābhī assa akiccha-lābhī akasira-lābhī,||
yassāhaṁ nekkhamma-sukhassa paviveka-sukhassa upasama-sukhassa sambodha-sukhassa nikāma-lābhi akiccha-lābhi akasira-lābhi,||
so taṁ mīḷha-sukhaṁ middha-sukhaṁ lābha-sakkāra-siloka-sukhaṁ sādiyeyyā.|| ||

[32] Asita-pīta-khāyita-sāyitassa||
kho Nāgita||
uccāra-passāvo.|| ||

Eso tassa nissando.|| ||

Piyānaṁ||
kho Nāgita||
viparinā-maññathā-bhāvā uppajjanti||
soka-parideva-dukkha-domanass'upāyāsā.|| ||

Eso tassa nissando.|| ||

Asubha-nimittānuyogaṁ anuyuttassa||
kho Nāgita||
subha-nimitte pāṭikkūlyatā saṇṭhāti.|| ||

Eso tassa nissando.|| ||

Chassu||
kho Nāgita||
phass'āyatanesu anicc'ānupassīno viharato||
phasse pāṭi-k-kūlyatā saṇṭhāti.|| ||

Eso tassa nissando.|| ||

Pañcasu||
kho Nāgita||
upādāna-k-khandhesu udaya-b-bayānupassino viharato upādāne||
pāṭi-k-kūlyatā saṇṭhāti.|| ||

Eso tassa nissando" ti.|| ||

Pañc'aṅgika Vagga Tatiya.