Aṇguttara-Nikāya
Pañcaka-Nipāta
IV. Sumanā Vagga
Sutta 33
Uggaho Meṇḍakanattā Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][bodh] Evaṃ me sutaṃ.|| ||
Ekaṃ samayaṃ Bhagavā bhaddiye viharati Jātiyā vane.|| ||
Atha kho Uggaho Meṇḍakanattā yena Bhagavā tenupaṇkami.|| ||
Upasaṇkamitvā Bhagavannaṃ abhivādetvā eka-m-antaṃ nisīdi.|| ||
Eka-m-antaṃ nisinno kho Uggaho Meṇaṇakanattā Bhagavantaṃ etad avoca:|| ||
2. "Adhivāsetu me bhante Bhagavā svātanāya attacatuttho [37] bhattan" ti.|| ||
Adhivāsesi Bhagavā tuṇhī-bhāvena.|| ||
Atha kho Uggaho Meṇḍakanattā Bhagavato adhivāsanaṃ viditvā uṭṭhāy āsanā Bhagavantaṃ abhivādetvā padakkhiṇaṃ katvā pakkāmi.|| ||
Atha kho Bhagavā tassā rattiyā accayena pubbaṇha-samayaṃ nivāsetvā patta-cīvaram ādāya yena Uggahassa Meṇḍakanattuno nivesanaṃ ten'upasaṇkami.|| ||
Upasaṇkamitvā paññatte āsane nisīdi.|| ||
Atha kho Uggaho Meṇḍakanattā Bhagavannaṃ paṇītena khādanīyena bhojanīyena sahatthā santappesi sampavāresi.|| ||
Atha kho Uggaho Meṇḍakanattā Bhagavantaṃ bhuttāviṃ onīta-patta-pāṇiṃ eka-m-antaṃ nisīdi.|| ||
Eka-m-antaṃ nisinno kho Uggaho Meṇḍakanattā Bhagavantaṃ etad avoca:|| ||
"Imā me bhante kumāriyo patikulāni gamissanti.|| ||
Ovadatu tāsaṃ bhante Bhagavā,||
anusāsatu tāsaṃ bhante Bhagavā,||
yaṃ tāsaṃ assa dīgha-rattaṃ hitāya sukhāyā" ti.|| ||
Atha kho Bhagavā tā kumāriyo etad avoca:|| ||
■
3. Tasmātiha kumāriyo evaṃ sikkhitabbaṃ:|| ||
'Yassa mātā pitaro bhattuno dassanti attha-kāmā hitesino anukampakā anukampaṃ upādāya,||
tassa bhavissāma pubb'uṭṭhāyiniyo pacchā-nipātiniyo kiṃkārapaṭissāviniyo manāpacāriniyo piyavādiniyo' ti.|| ||
Evaṃ hi vo kumāriyo sikkhitabbaṃ.|| ||
■
Tasmātiha kumāriyo evaṃ sikkhitabbaṃ:|| ||
'Ye te bhattu garuno bhavissanti mātā ti vā pitā ti vā samaṇa-brāhmaṇā ti vā,||
te sakkarissāma garukarissāma,||
mānissāma,||
pūjessāma,||
abbhāgate ca āsanodakena patipūjessāmā' ti.|| ||
Evaṃ hi vo kumāriyo sikkhitabbaṃ.|| ||
■
Tasmātiha kumāriyo evaṃ sikkhitabbaṃ:|| ||
'Ye te bhattu abbhantarā kammantā uṇṇā ti vā kappāsā ti vā,||
tattha dakkhā bhavissāma analasā,||
tatrūpāyāya vimaṃsāya samannāgatā alaṃ kātuṃ alaṃ saṃvidhātun' ti.|| ||
Evaṃ hi vo kumāriyo sikkhitabbaṃ.|| ||
■
Tasmātiha kumāriyo evaṃ sikkhitabbaṃ:|| ||
'Yo so bhantu abbhantaro antojano,||
dāsā ti vā pessā ti [38] vā kamma-karā ti vā,||
tesaṃ katañ ca katato jānissāma,||
akatañ ca akatato jānissāma,||
gilāna-kānañ ca bal-ā-balaṃ jānissāma,||
khādanīyaṃ bhojanīyaṃ c'assa paccaṃsena vibhajissāmā' ti.|| ||
Evaṃ hi vo kumāriyo sikkhitabbaṃ.|| ||
■
Tasmātiha kumāriyo evaṃ sikkhitabbaṃ:|| ||
'Yaṃ bhattā āharissati dhanaṃ vā dhaññaṃ
vā rajataṃ vā jāta-rūpaṃ vā,||
taṃ ārakkhena guttiyā sampādessāma||
tattha ca bhavissāma adhuttī athenī asoṇḍī avināsikāyo' ti.|| ||
Evaṃ hi vo kumāriyo sikkhitabbaṃ.|| ||
Imehi kho kumāriyo pañcahi dhammehi samannāgato mātu-gāmo kāyassa bhedā param maraṇā manāpa-kāyikānaṃ devānaṃ saha-vyataṃ uppajjatī" ti.|| ||
Yo naṃ bharati sabbadā niccaṃ ātāpi ussuko||
Sabba-kāmaharaṃ posaṃ bhattāraṃ nātimaññeti.|| ||
Na cāpi sotthi bhattāraṃ issā-vādena rosaye||
Bhattu ca garuno sabbe paṭipujeti paṇḍitā.|| ||
Uṭṭhāhikā analasā saṃgahīta-parijjanā||
Bhattu manāpāṃ carati sambhataṃ anurakkhati.|| ||
Yā evaṃ vattatī nāri bhattu chanda-vasānugā||
Manāpā nāma te devā yattha sā upapajjatī ti.|| ||
