Aṅguttara-Nikāya
Pañcaka-Nipāta
IV. Sumanā Vagga

Sutta 38

Saddha Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[42]

[1][pts][than][bodh] Evaṁ me sutaṁ:|| ||

Ekaṁ samayaṁ Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Pañc'ime bhikkhave saddhe kula-putte ānisaṁsā.|| ||

Katame pañca?|| ||

2. Ye te bhikkhave loke santo sappurisā,||
te saddhaṁ yeva paṭhamaṁ anukampanti,||
no tathā a-s-saddhaṁ;||
Saddhaṁ yeva paṭhamaṁ upasaṅkamantā upasaṅkamanti,||
no tathā a-s-saddhaṁ;||
saddhass'eva paṭhamaṁ patigaṇhantā patigaṇhanti,||
no tathā a-s-saddhaṁ;||
saddhass'eva paṭhamaṁ dhammaṁ desentā desenti,||
no tathā a-s-saddhaṁ.|| ||

Saddho kāyassa bhedā param maraṇā sugatiṁ saggaṁ lokaṁ uppajjati.|| ||

Ime kho bhikkhave pañca saddhe kula-putte ānisaṁsā.|| ||

3. Seyyathā pi, bhikkhave, subhumiyaṁ cātu-m-mahā-pathe mahā-nigrodho samantā pakkhīnaṁ paṭisaraṇaṁ hoti,||
evam [43] eva kho bhikkhave saddho kula-putto bahuno janassa paṭisaraṇaṁ hoti||
bhikkhūnaṁ bhikkhunīnaṁ upasakānaṁ upāsikānan" ti.|| ||

 

Sākhā-patta-phal'ūpeto khandhimā va mahā-dumo,||
mūlavā phala-sampanno patiṭṭhā hoti pakkhinaṁ.||
Manorame āyatane sevanti naṁ vihaṅgamā,||
chāyaṁ chāy-atthikā yanti phalatthā phala-bhojino.||
Tath'eva sīlampannaṁ saddhaṁ purisa-puggalaṁ,||
nivāta-vuttiṁ atthaddhaṁ sorataṁ sakhilaṁ muduṁ||
vīta-rāgā vīta-dosā vīta-mohā anāsavā,||
puñña-k-khettāni lokasmiṁ sevanti tādisaṁ naraṁ.||
Te tassa dhammaṁ desenti sabba-dukkhā panūdanaṁ,||
yaṁ so dhammaṁ idhaññāya parinibbāti anāsavo ti.|| ||