Aṅguttara Nikāya
Pañcaka Nipāta
5. Muṇḍarāja-Vagga

Sutta 44

Manāpadāyī Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[49]

[1][pts][bodh] Evaṁ me sutaṁ:|| ||

Ekaṁ samayaṁ Bhagavā Vesāliyaṁ viharati Mahāvane Kūṭāgāra-sālāyaṁ.|| ||

Atha kho Bhagavā pubbatha-samayaṁ nivāsetvā patta-cīvaram ādāya yena Uggassa gahapatino Vesālikassa nivesanaṁ ten'upasaṅkami.|| ||

Upasaṅkamitvā paññatte āsane nisīdi.|| ||

Atha kho Uggo gahapati Vesāliko yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinno kho Uggo gahapati Vesāliko Bhagavantaṁ etad avoca:|| ||

2. "Sammukhā me taṁ bhante Bhagavato sutaṁ,||
sammukhā paṭiggahītaṁ||
'manāpadāyī labhate manāpan' ti.|| ||

Manāpaṁ me bhante sāla-pupphakaṁ khādanīyaṁ.|| ||

Taṁ me Bhagavā patigaṇhātu anukampaṁ upādāyā ti.|| ||

Paṭiggahesi Bhagavā anukampaṁ upādāya.|| ||

■

"Sammukhā me taṁ bhante Bhagavato sutaṁ,||
sammukhā paṭiggahītaṁ||
'manāpadāyī labhate manāpan' ti.|| ||

Manāpaṁ me bhante sampanna-kolakaṁ sūkara-maṁsaṁ.|| ||

Taṁ me Bhagavā patigaṇhātu anukampaṁ upādāyā' ti.|| ||

Paṭiggahesi Bhagavā anukampaṁ upādāya.|| ||

■

"Sammukhā me taṁ bhante Bhagavato sutaṁ,||
sammukhā paṭiggahītaṁ||
'manāpadāyī labhate manāpan' ti.|| ||

Manāpaṁ me bhante nibbaddha-teḷakaṁ nāliya-sākaṁ.|| ||

Taṁ me Bhagavā patigaṇhātu anukampaṁ upādāyā" ti.|| ||

Paṭiggahesi Bhagavā anukampaṁ upādāya.|| ||

■

"Sammukhā me taṁ bhante Bhagavato sutaṁ,||
sammukhā paṭiggahītaṁ||
'manāpadāyī labhate manāpan' ti.|| ||

Manāpaṁ me bhante sālīnaṁ odano vicita-kāḷako aneka-sūpo aneka-vyañjano.|| ||

Taṁ me Bhagavā patigaṇhātu anunampaṁ upādāyā" ti.|| ||

Paṭiggahesi Bhagavā anukampaṁ upādāya.|| ||

■

[50] "Sammukhā me taṁ bhante Bhagavato sutaṁ,||
sammukhā paṭiggahītaṁ||
'manāpadāyī labhate manāpan' ti.|| ||

Manāpaṁ me bhante kāsikāni vatthāni.|| ||

Tāni me Bhagavā patigaṇhātu anukampaṁ upādāyā" ti.|| ||

Paṭiggahesi Bhagavā anukampaṁ upādāya.|| ||

■

"Sammukhā me taṁ bhante Bhagavato sutaṁ,||
sammukhā paṭiggahītaṁ||
'manāpadāyī labhate manāpan' ti.|| ||

Manāpaṁ me bhante pallaṅko goṇa-katthato paṭikatthato paṭalika-t-thato kādali-miga-pavara-paccattha-raṇo sa-uttaracchado ubhato lohita-kūpadhāno.|| ||

Api ca bhante mayam p'etaṁ jānāma 'n'etaṁ Bhagavato kappatī' ti,||
idaṁ me bhante candana-phalakaṁ agghati adhikasahassaṁ.|| ||

Taṁ me Bhagavā patigaṇhātu anukampaṁ upādāyā" ti.|| ||

Paṭiggahesi Bhagavā anukampaṁ upādāya.|| ||

 

§

 

Atha kho Bhagavā Uggaṁ gahapatiṁ Vesālikaṁ iminā anumodanīyena anumodi:|| ||

Manāpadāyī labhate manāpaṁ yo ujju-bhūtesu dadāti chandasā,||
Acchādanaṁ sayanaṁ ath'annapānaṁ nāna-p-pakārāni ca paccayāni.|| ||

Cattañ ca muttañ ca anaggahītaṁ khettūpame Arahante viditvā,||
So duccajaṁ sappuriso cajitvā manāpadāyī labhate manāpan ti.|| ||

 

§

 

Atha kho Bhagavā Uggaṁ gahapatiṁ Vesālikaṁ iminā anumodanīyena anumo-ditvā uṭṭhāy āsanā pakkāmi.|| ||

Atha kho Uggo gahapati Vesāliko aparena samayena kālam akāsi.|| ||

Kālakato ca Uggo gahapati Vesāliko aññataraṁ mano-mayaṁ kāyaṁ upapajjī.|| ||

Tena kho pana samayena Bhagavā Sāvatthiyaṁ viharati Jetavane Anāthapiṇḍikassa Ārāme.|| ||

Atha kho Uggo deva-putto abhikkantāya rattiyā abhikkanta-vaṇṇo kevala-kap- [51] paṁ Jetavanaṁ obhāsetvā yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ aṭṭhāsi.|| ||

Eka-m-antaṁ ṭhitaṁ kho Uggaṁ deva-puttaṁ Bhagavā etad avoca:|| ||

'Kacci te Ugga yathādhippāyo' ti?|| ||

'Taggha me bhante yathādhippāyo' ti.|| ||

Atha kho Bhagavā Uggaṁ deva-puttaṁ gāthāhi ajjhabhāsi:|| ||

Manāpa-dāyī labhate manāpaṁ,||
Aggassa dātā labhate pun'aggaṁ,||
Varassa dātā vara-lābhi hoti,||
Seṭṭhaṁ dado seṭṭham upeti ṭhānaṁ.|| ||

Aggadāyī varadāyī seṭṭha-dāyī ca yo naro,||
Dīghāyu yasavā hoti yattha yatth'upapajjatī" ti.|| ||