Aṅguttara-Nikāya
Pañcaka-Nipāta
4. Thera Vaggo

Sutta 86

Paṭisambidā-Patta Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[113]

[1][pts] EVAṀ ME SUTAṀ.|| ||

Ekaṁ samayaṁ Bhagavā Sāvatthiyaṁ viharati.|| ||

Pañcahi bhikkhave dhammehi samannāgato thero bhikkhu sabrahma-cārīnaṁ piyo ca hoti manāpo ca garu ca bhāvanīyo ca.|| ||

Katamehi pañcahi?|| ||

2. Attha-paṭisambidā-patto hoti,||
dhamma-paṭisambidā-patto hoti,||
nirutti-paṭisambidā-patto hoti,||
paṭibhāna-paṭisambidā-patto hoti||
yāni tāni sabrahma-cārīnaṁ uccāvacāni kiṁ-karaṇiyāni,||
tattha dakkho hoti analaso tatrūpāyāya vimaṁsāya samannāgato alaṁ kātuṁ alaṁ saṁvidhātuṁ.|| ||

Imehi kho bhikkhave pañcahi dhammehi samannāgato thero bhikkhu sabrahma-cārīnaṁ piyo ca hoti manāpo ca garu ca bhāvanīyo cā ti.|| ||