Pāḷi English Dictionary
Sutta Search
Dhammatalk SearchAṅguttara Nikāya
Pañcaka Nipāta
10. Kakudha Vagga
Sutta 100
Kakudha Suttaṁ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṁ samayaṁ Bhagavā Kosambīyaṁ viharati Ghositārāme.|| ||
Tena kho pana samayena Kakudho nāma Koliyaputto āyasmato Mahā Moggallānassa upaṭṭhāko adhunā kāla-kato aññataraṁ mano-mayaṁ kāyaṁ upapanno||
tassa eva-rūpo atta-bhāva-paṭilābho hoti,||
seyyathā pi nāma dve vā tiṇi vā Māgadhakāni gāmakkhettāni.|| ||
So tena atta-bhāva-paṭilābhena n'eva attāṇaṁ no paraṁ vyābādheti.|| ||
Atha kho Kakudho deva-putto yen'āyasmā Mahā Moggallāno ten'upasaṅkami.|| ||
Upasaṅkamitvā āyasmantaṁ Mahā Moggallānaṁ abhivādetvā eka-m-antaṁ aṭṭhāsi.|| ||
Eka-m-antaṁ [123] ṭhito kho Kakudho deva-putto āyasmantaṁ Mahā Moggallānaṁ etad avoca:|| ||
"Devadattassa bhante eva-rūpaṁ icchāgataṁ uppajji:|| ||
'Ahaṁ bhikkhu-saṅghaṁ pariharissāmi' ti.|| ||
Saha cittuppādā ca bhante Devadatto tassā iddhiyā parihīno' ti.|| ||
Idam avoca Kakudho deva-putto,||
idaṁ vatvā āyasmantaṁ Mahā Moggallānaṁ abhivādetvā padakkhiṇaṁ katvā tatth'ev'antara-dhāyi.|| ||
Atha kho āyasmā Mahā Moggallāno yena Bhagavā ten'upasaṅkami.|| ||
Upasaṅkamitvā Bhagavantaṁ abhivādetvā eka-m-antaṁ nisidi.|| ||
Eka-m-antaṁ nisinno kho āyasmā Mahā Moggallāno Bhagavantaṁ etad avoca:|| ||
"Kakudho nāma bhante,||
Koliyaputto mam upaṭṭhāko adhunā kāla-kato aññataraṁ mano-mayaṁ kāyaṁ upapanno,||
tassa eva-rūpo atta-bhāva-paṭilābho,||
seyyathā pi nāma dve vā tiṇi vā Māgadhakāni gāmakkhettāni.|| ||
So tena atta-bhāva-paṭilābhena n'ev attāṇaṁ no paraṁ vyābādheti.|| ||
Atha kho bhante Kakudho deva-putto yenāhaṁ ten'upasaṅkami.|| ||
Upasaṅkamitvā maṁ abhivādetvā eka-m-antaṁ aṭṭhāsi.|| ||
Eka-m-antaṁ ṭhito kho bhante Kakudho deva-putto maṁ etad avoca:|| ||
'Devadattassa bhante, eva-rūpaṁ icchāgataṁ uppajji:
"Ahaṁ bhikkhu-saṅghaṁ pariharissāmi" ti|| ||
Saha cittuppādā ca bhante Devadatto tassā iddhiyā parihīno" ti.'|| ||
Idam avoca bhante, Kakudho deva-putto.
Idaṁ vatvā maṁ abhivādetvā padakkhiṇaṁ katvā tatth'ev'antara-dhāyi" ti.|| ||
"Kiṁ pana te Moggallāna,||
Kakudho deva-putto cetasā ceto paricca vidito||
'Yaṁ kiñaci Kakudho deva-putto bhāsati,||
sabbaṁ taṁ tath'eva hoti no aññathā'" ti?|| ||
"Cetasā ceto paricca vidito me bhante Kakudho deva-putto||
'Yaṁ kiñaci Kakudho deva-putto bhāsati,||
sabbaṁ taṁ tath'eva hoti no aññathā'" ti.|| ||
Rakkhass'etaṁ Moggallāna vācaṁ.|| ||
Rakkhass'etaṁ Moggallāna vācaṁ.|| ||
Idāni so mogha-puriso attanā va attāṇaṁ pātu-karissatiti.|| ||
Pañc'ime Moggallāna Satthāro santo saṁvijj'amānā lokasmiṁ.|| ||
Katame pañca?|| ||
[124] Idha Moggallāna, ekacco sattā a-parisuddhasīlo samāno||
'parisuddhasīlo'mbhi' ti paṭijānāti,||
'parisuddhaṁ me sīlaṁ||
pariyodātaṁ asaṅkiliṭṭhan' ti.|| ||
Tam enaṁ sāvakā evaṁ jānanti:|| ||
'Ayaṁ kho bhavaṁ Satthā a-parisuddhasīlo samāno||
"parisuddhasīlo'mhī" ti paṭijānāti,||
"parisuddhaṁ me sīlaṁ||
pariyodātaṁ asaṅkiliṭṭhan" ti.|| ||
Mayaṁ c'eva kho pana gihīnaṁ āroceyyāma,||
nāssassa manāpaṁ.|| ||
Yaṁ kho pan'assa amanāpaṁ,||
kathannu mayaṁ tena samudācareyyāma?|| ||
Sammannati kho pana cīvara-piṇḍa-pāta-sen'āsana-gilāna-ppaccaya-bhesajja-parikkhārena.|| ||
Yaṁ tumo karissati,||
tumo'va tena paññāyissatī' ti.|| ||
Eva-rūpaṁ kho Moggallāna,||
Satthāraṁ sāvakā silato rakkhananti.|| ||
Eva-rūpo ca pana Satthā sāvakehi sīlato rakkhaṁ paccāsiṁsati.
■
Puna ca paraṁ Moggallāna,||
idh'ekacco Satthā a-parisuddhājivo samāno||
'parisuddhājivo'mhi' ti paṭijānāti,||
'parisuddho me ajivo||
pariyodāto asaṅkiliṭṭho' ti.|| ||
Tam enaṁ sāvakā evaṁ jānatti:|| ||
'Ayaṁ kho bhavaṁ Satthā a-parisuddhājivo samāno||
"parisuddhājivo'mh" iti paṭijānāti,||
"parisuddho me ājivo||
pariyodāto asaṅkiliṭṭho" ti.|| ||
Mayaṁ c'eva kho pana gihīnaṁ āroceyyāma,||
nāssassa manāpaṁ.|| ||
Yaṁ kho pan'assa amanāpaṁ,||
kathannu mayaṁ tena samudācareyyāma?|| ||
Sammannati kho pana cīvara-piṇḍa-pāta-sen'āsana-gilāna-ppaccaya-bhesajja-parikkhārena.|| ||
Yaṁ tumo karissati,||
tumo'va tena paññāyissati" ti.|| ||
Eva-rūpaṁ kho Moggallāna||
Satthāraṁ sāvakā ājivato rakkhanti.|| ||
Eva-rūpo ca pana Satthā sāvakehi ājivato rakkhaṁ paccāsiṁsati.
■
Puna ca paraṁ Moggallāna,||
idh'ekacco Satthā a-parisuddha-Dhamma-desano samāno||
'parisuddhadhamma-desano'mhi' ti paṭijānāti,||
'parisuddho me Dhamma-desanā||
pariyodātā asaṅkiliṭṭhā' ti.|| ||
Tam enaṁ sāvakā evaṁ jānanti:|| ||
'Ayaṁ kho bhavaṁ Satthā a-parisuddha-Dhamma-desano samāno||
[125] "parisuddha-Dhamma-desanomhi" ti paṭijānāti,||
"parisuddhā me Dhamma-desanā||
pariyodātā asaṅkiliṭṭhā" ti.|| ||
Mayaṁ c'eva kho pana gihīnaṁ āroceyyāma,||
nāssassa manāpaṁ.|| ||
Yaṁ kho panassa amanāpaṁ,||
kathannu mayaṁ tena samudācareyyāma?|| ||
Sammannati kho pana cīvara-piṇḍa-pāta-sen'āsana-gilāna-ppaccaya-bhesajja-parikkhārena.|| ||
Yaṁ tumo karissati,||
tumo'va tena paññāyissati" ti.|| ||
Eva-rūpaṁ kho Moggallāna||
Satthāraṁ sāvakā Dhamma-desanato rakkhanti.|| ||
Eva-rūpo ca pana Satthā sāvakehi Dhamma-desanato rakkhaṁ paccāsiṁsati.
■
Puna ca paraṁ Moggallāna,||
idh'ekacco Satthā a-parisuddha-veyyākaraṇo samāno||
'parisuddhaveyyākaraṇo'mhi' ti paṭijānāti,||
'parisuddhaṁ me veyyākaraṇaṁ||
paridotaṁ asaṅkiliṭṭhan' ti.|| ||
Tam enaṁ sāvakā evaṁ jānanti:|| ||
"Ayaṁ kho bhavaṁ Satthā a-parisuddha-veyyākaraṇo samāno||
"parisuddhaveyyākaraṇo'mhi" ti paṭijānāti,||
"parisuddhaṁ me veyyākaraṇaṁ||
pariyodātaṁ asaṅkiliṭṭhan" ti.|| ||
Mayaṁ c'eva kho pana gihīnaṁ āroceyyāma,||
nāssassa manāpaṁ.|| ||
Yaṁ kho panassa amanāpaṁ||
kathannu mayaṁ tena samudācareyyāma.|| ||
Sammannati kho pana cīvara-piṇḍa-pāta-sen'āsana-gilāna-ppaccaya-bhesajja-parikkhārena.|| ||
Yaṁ tumo karissati,||
tumo'va tena paññāyissati" ti.|| ||
Eva-rūpaṁ kho Moggallāna||
Satthāraṁ sāvakā veyyākaraṇato rakkhanti.|| ||
Eva-rūpo ca pana Satthā sāvakehi veyyākaraṇato rakkhaṁ paccāsiṁsati.
■
Puna ca paraṁ Moggallāna,||
idh'ekacco Satthā a-parisuddhañāṇa-dassano samāno||
'parisuddhañāṇa-dassan'omhi' ti paṭijānāti,||
'parisuddhaṁ me ñāṇa-dassanaṁ||
pariyodātaṁ asaṅkiliṭṭhan' ti.|| ||
Tam enaṁ sāvakā evaṁ jānanti:|| ||
"Ayaṁ kho bhavaṁ Satthā a-parisuddhañāṇa-dassano samāno||
"parisuddhañaṇadassano'mhi" ti paṭijānāti,||
"parisuddhaṁ me ñāṇa-dassanaṁ||
pariyodātaṁ asaṅkiliṭṭhan" ti.|| ||
Mayaṁ c'eva kho pana gihīnaṁ āroceyyāma,||
nāssassa manāpaṁ.|| ||
Yaṁ kho panassa amanāpaṁ,||
kathannu taṁ mayaṁ tena samudācareyyāma.|| ||
[126] Sammannati kho pana cīvara-piṇḍa-pāta-sen'āsana-gilāna-ppaccaya-bhesajja-parikkhārena.|| ||
Yaṁ tumo karissati,||
tumo'va tena paññāyissati" ti.|| ||
Eva-rūpaṁ kho Moggallāna,||
Satthāraṁ sāvakā ñāṇa-dassanato rakkhanti.|| ||
Eva-rūpo ca pana Satthā sāvakehi ñāṇa-dassanato rakkhaṁ paccāsiṁsati.|| ||
Ime kho Moggallāna,||
pañca Satthāro santo saṁvijj'amānā lokasmiṁ.
Ahaṁ kho pana Moggallāna,||
parisuddhasīlo samāno||
'parisuddhasīlo'mhi' ti paṭijānāmi,||
'parisuddhaṁ me sīlaṁ||
pariyodātaṁ asaṅkiliṭṭhan' ti.|| ||
Na ca maṁ sāvakā sīlato rakkhanti.|| ||
Na c'āhaṁ sāvakehi sīlato rakkhaṁ paccāsiṁsāmi.|| ||
■
Parisuddhājivo samāno||
'parisuddhājivo'mhi' ti paṭijānāmi,||
'parisuddho me ājivo||
pariyodāto asaṅkiliṭṭho' ti.|| ||
Na ca maṁ sāvakā ājivato rakkhanti.|| ||
Na c'āhaṁ sāvakehi ājivato rakkhaṁ paccāsiṁsāmi.|| ||
■
Parisuddhadhamma-desano samāno||
'parisuddhadhammadeno'mhi' ti paṭijānāmi,||
'parisuddhā me Dhamma-desanā||
pariyodātā asaṅkiliṭṭhā' ti.|| ||
Na ca maṁ sāvakā Dhamma-desanato rakkhanti.|| ||
Na c'āhaṁ sāvakehi Dhamma-desanato rakkhaṁ paccāsiṁsāmi.|| ||
■
Parisuddhaveyyākaraṇo samāno||
'parisuddhaveyyākaraṇo'mhi' ti paṭijānāmi,||
'parisuddhaṁ me veyyākaraṇaṁ||
pariyodātaṁ asaṅkiliṭṭhan' ti.|| ||
Na ca maṁ sāvakā veyyākaraṇato rakkhanti.|| ||
Na c'āhaṁ sāvakehi veyyākaraṇato rakkhaṁ paccāsiṁsāmi.|| ||
■
Parisuddhañāṇa-dassano samāno||
'parisuddhañāṇa-dassano'mhi' ti paṭijānāmi,||
'parisuddhaṁ me ñāṇa-dassanaṁ||
pariyodātaṁ asaṅkiliṭṭhan' ti.|| ||
Na ca maṁ sāvakā ñāṇa-dassanato rakkhanti.|| ||
Na c'āhaṁ sāvakehi ñāṇa-dassanato rakkhaṁ paccāsiṁsāmiti.|| ||
Kakudhavaggo pañcamo|| ||
