Aṅguttara Nikāya
Pañcaka Nipāta
11. Phāsu-Vihāra Vagga

Sutta 101

Sekha-Vesārajja Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[127]

[1][pts] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Pañc'ime bhikkhave sekha-vesārajja-karaṇā dhammā.|| ||

Katame pañca?|| ||

Idha, bhikkhave, bhikkhu saddho hoti,||
sīlavā hoti,||
bahu-s-suto hoti,||
āraddha-viriyo hoti,||
paññavā hoti.|| ||

 

§

 

Yaṁ kho bhikkhave a-s-saddhassa sārajjaṁ hoti,||
saddhassa taṁ sārajjaṁ na hoti.|| ||

Tasmāyaṁ dhammo sekha-vesārajja-karaṇo.|| ||

■

Yaṁ bhikkhave du-s-sīlassa sārajjaṁ hoti,||
sīla-vato taṁ sārajjaṁ na hoti.|| ||

Tasmāyaṁ dhammo sekha-vesārajja-karaṇo.|| ||

■

Yaṁ bhikkhave appasutassa sārajjaṁ hoti,||
bahu-s-sutassa taṁ sārajjaṁ na hoti.|| ||

Tasmāyaṁ dhammo sekha-vesārajja-karaṇo.|| ||

■

Yaṁ bhikkhave kusītassa sārajjaṁ hoti,||
āraddha-viriyassa taṁ sārajjaṁ na hoti.|| ||

Tasmāyaṁ dhammo sekha-vesārajja-karaṇo.|| ||

■

Yaṁ bhikkhave duppaññassa sārajjaṁ hoti,||
paññavato taṁ sārajjaṁ na hoti.|| ||

Tasmāyaṁ dhammo sekha-vesārajja-karaṇo.|| ||

Ime kho bhikkhave pañca sekha-vesārajja-karaṇā dhammā" ti.|| ||