Aṅguttara Nikāya
Pañcaka Nipāta
11. Phāsu-Vihāra Vagga

Sutta 103

Mahā Cora Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[128]

[1][pts] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Pañcahi bhikkhave, aṅgehi samannāgato mahā-coro||
sandhim pi chindanti,||
nillopam pi harati,||
ekāgārikam pi karoti,||
paripanthe pi tiṭṭhati.|| ||

Katamehi pañcahi?|| ||

2. Idha, bhikkhave, mahā-coro,||
visama-nissito ca hoti,||
gahana-nissito ca,||
balava-nissito ca,||
bhoga-cāgī ca,||
eka-cārī ca.|| ||

 

§

 

3. Kathañ ca bhikkhave, mahā-coro visama-nissito hoti?|| ||

Idha bhikkhave mahā-coro nadī-viduggaṁ vā nissito hoti pabbata-visamaṁ vā.|| ||

Evaṁ kho bhikkhave mahā-coro visama-nissito hoti.|| ||

■

4. Kathañ ca bhikkhave, mahā-coro gahana-nissito hoti?|| ||

Idha bhikkhave mahā-coro tiṇa-ghanaṁ vā nissito hoti||
rukkha-gahanaṁ vā||
rodhaṁ vā||
mahā-vana-saṇḍaṁ.|| ||

Evaṁ kho bhikkhave mahā-coro gahana-nissito hoti.|| ||

■

5. Kathañ ca bhikkhave, mahā-coro balava-nissito hoti?|| ||

Idha bhikkhave mahā-coro rājānaṁ vā||
rāja-mahā-mattaṁ vā||
nissito hoti.|| ||

Tassa evaṁ hoti:|| ||

'Sace maṁ koci [129] kiñci vakkhati,||
ime rājāno vā||
rāja-mahā-mattā vā||
pariyodhāya atthaṁ bhaṇissantī' ti.|| ||

Sace naṁ koci kiñci āha,||
tyāssa rājāno vā||
rāja-mahā-mattā vā||
pariyodhāya atthaṁ bhaṇanti.|| ||

Evaṁ kho bhikkhave mahā-coro balava-nissito hoti.|| ||

■

6. Kathañ ca bhikkhave, mahā-coro bhoga-cāgī hoti?|| ||

Idha bhikkhave mahā-coro aḍḍho hoti maha-d-dhano mahā-bhogo.|| ||

Tassa evaṁ hoti:|| ||

'Sace maṁ koci kiñci vakkhati,||
ito bhogena paṭisantharissāmi' ti.|| ||

Sace naṁ koc kiñci āha,||
tato bhogena paṭisantharati.|| ||

Evaṁ kho bhikkhave mahā-coro bhoga-cāgī hoti.|| ||

■

7. Kathañ ca bhikkhave, mahā-coro ekacāri hoti?|| ||

Idha bhikkhave mahā-coro ekako niggahaṇāni kattā hoti.|| ||

Taṁ kissa hetu?|| ||

'Mā me guyhamantā bahiddhā sambhedaṁ agamaṁsu' ti.|| ||

Evaṁ kho bhikkhave mahā-coro ekacāri hoti.|| ||

Imehi kho bhikkhave, pañcahi aṅgehi samannāgato mahā-coro||
sandhim pi chindanti,||
nillopam pi harati,||
ekāgārikam pi karoti,||
paripanthe pi tiṭṭhati.|| ||

 

---

 

8. Evam eva kho bhikkhave,||
pañcahi dhammehi samannāgato pāpa-bhikkhu,||
khataṁ upahataṁ attāṇaṁ pariharati,||
sāvajjo ca hoti sānuvajjo viññunaṁ,||
bahuñ ca apuññaṁ pasavati.|| ||

Katamehi pañcahi?|| ||

9. Idha, bhikkhave, pāpa-bhikkhu,||
visama-nissito ca hoti,||
gahaṇa-nissito ca,||
balava-nissito ca,||
bhoga-cāhī ca,||
eka-cārī ca.|| ||

 

§

 

10. Kathaña bhikkhave, pāpa-bhikkhu visama-nissito hoti?|| ||

Idha bhikkhave pāpa-bhikkhu,||
visamena kāya-kammena samannāgato hoti,||
visamena vacī-kammena samannāgato hoti,||
visamena mano-kammena samannāgato hoti.|| ||

Evaṁ kho bhikkhave pāpa-bhikkhu visama-nissito hoti.|| ||

■

11. Kathañ ca bhikkhave, pāpa-bhikkhu gahaṇa-nissito hoti?|| ||

[130] Idha bhikkhave pāpa-bhikkhu,||
micichā-diṭṭhiko hoti,||
antaggāhi-kāya diṭṭhiyā samannāgato.|| ||

Evaṁ kho bhikkhave pāpa-bhikkhu gahaṇa-nissito hoti.|| ||

■

12. Kathañ ca bhikkhave, pāpa-bhikkhu balava-nissito hoti?|| ||

Idha bhikkhave pāpa-bhikkhu,||
rājānaṁ vā,||
rāja-mahā-mattaṁ vā nissito hoti.|| ||

Tassa evaṁ hoti:|| ||

'Sace maṁ koci kiñci vakkhati,||
ime me rājāno vā,||
rāja-mahā-mattā vā,||
pariyodhāya atthaṁ bhaṇissantī' ti.|| ||

Sace naṁ koci kiñci āha,||
tyāssa rājāno vā,||
rāja-mahā-mattā vā,||
pariyodhāya atthaṁ bhaṇnti.|| ||

Evaṁ kho bhikkhave pāpa-bhikkhu balava-nissito hoti.|| ||

■

13. Kathañ ca bhikkhave, pāpa-bhikkhu bhoga-cāgī hoti?|| ||

Idha bhikkhave pāpa-bhikkhu,||
lābhī hoti cīvara-piṇḍa-pāta-sen'āsana-gilāna-ppaccaya-bhesajja-parikkhārānaṁ.|| ||

Tassa evaṁ hoti:|| ||

'Sace maṁ koci kiñci vakkhati,||
ito lābhena paṭisantharissāmi' ti.|| ||

Sace naṁ koci kiñci āha,||
tato lābhena paṭisantharati.|| ||

Evaṁ kho bhikkhave pāpa-bhikkhu bhoga-cāgī hoti.|| ||

■

14. Kathañ ca bhikkhave, pāpa-bhikkhu eka-cārī hoti?|| ||

Idha bhikkhave pāpa-bhikkhu,||
ekako paccantimesu jana-padesu nivāsaṁ kappeti.|| ||

So tattha kulāni upasaṅkamanto lābhaṁ labhati.|| ||

Evaṁ kho bhikkhave pāpa-bhikkhu eka-cārī hoti.|| ||

Imehi kho bhikkhave, pañcahi dhammehi samannāgato pāpa-bhikkhu,||
khataṁ upahataṁ attāṇaṁ pariharati,||
sāvajjo ca hoti sānuvajjo viññūnaṁ,||
bahuñ ca apuññaṁ pasavati" ti.|| ||